മോദി സ്റ്റേഡിയത്തിൽ ഇന്ത്യയ്ക്ക് നിർണായക ടെസ്റ്റ്; ആശംസ നേർന്ന് മോദി സ്റ്റേഡിയത്തിൽ– ചിത്രങ്ങൾ
Mail This Article
അഹമ്മദാബാദ് ∙ മൂന്നാം ടെസ്റ്റിലെ കനത്ത തോൽവിയുടെ നിരാശ മറന്ന്, ലോക ടെസ്റ്റ് ചാംപ്യൻഷിപ് ഫൈനലിൽ സ്ഥാനമുറപ്പിക്കാനുള്ള നിർണായക പോരാട്ടത്തിന് ഇറങ്ങുന്ന ടീം ഇന്ത്യയ്ക്ക് ആശംസ നേരാൻ ഒരു വിവിഐപി അഹമ്മദാബാദിലെ നരേന്ദ്ര മോദി സ്റ്റേഡിയത്തിലെത്തി; സാക്ഷാൽ ഇന്ത്യൻ പ്രധാനമന്ത്രി നരേന്ദ്ര മോദി തന്നെ! ഓസ്ട്രേലിയൻ പ്രധാനമന്ത്രി ആന്റണി ആൽബനീസിനൊപ്പമാണ് അദ്ദേഹം സ്റ്റേഡിയത്തിലെത്തിയത്. സ്റ്റേഡിയത്തിലെത്തിയ ഇരുവരെയും ബിസിസിഐ പ്രസിഡന്റ് റോജർ ബിന്നി, സെക്രട്ടറിയും ആഭ്യന്തരമന്ത്രി അമിത് ഷായുടെ മകനുമായ ജയ് ഷാ എന്നിവർ ചേർന്നു സ്വീകരിച്ചു.
ടെസ്റ്റ് മത്സരത്തിനു മുന്നോടിയായി ഇന്ത്യൻ നായകൻ രോഹിത് ശർമയ്ക്കുള്ള ടെസ്റ്റ് ക്യാപ് ഇന്ത്യൻ പ്രധാനമന്ത്രിയും, ഓസീസ് നായകൻ സ്റ്റീവ് സ്മിത്തിനുള്ള ടെസ്റ്റ് ക്യാപ് ഓസീസ് പ്രധാനമന്ത്രിയും സമ്മാനിച്ചു. തുടർന്ന് ഇരുവരും സ്റ്റേഡിയം വലംവച്ച് കാണികളെ അഭിവാദ്യം ചെയ്തു.
സ്റ്റേഡിയത്തിലെ പ്രത്യേക പവലിയനിൽ സൂക്ഷിച്ചിരിക്കുന്ന ഇന്ത്യയും ഓസ്ട്രേലിയയും തമ്മിൽ നടന്ന പഴയകാല ആവേശപ്പോരാട്ടങ്ങളുടെ ഓർമചിത്രങ്ങൾ ഇരുവരും സന്ദർശിച്ചു. മുൻ ഇന്ത്യൻ താരവും പരിശീലകനുമായിരുന്ന കമന്റേറ്റർ രവി ശാസ്ത്രി ഓരോ ചിത്രങ്ങളുടെയും പ്രത്യേകതകൾ ഇരുവർക്കും വിവരിച്ചുനൽകി. തുടർന്ന് ക്യാപ്റ്റൻമാർക്കൊപ്പം വീണ്ടും ഗ്രൗണ്ടിലേക്ക്. അവിടെ ദേശീയഗാനത്തിനായി അണിനിരന്ന ഇരു ടീമുകളിലെയും താരങ്ങളെയും ക്യാപ്റ്റൻമാർ പ്രധാനമന്ത്രിമാർക്ക് പരിചയപ്പെടുത്തി. തുടർന്ന് താരങ്ങൾക്കൊപ്പം ദേശീയ ഗാനത്തിനും ഒപ്പം നിന്ന ശേഷമാണ് ഇരുവരും ഗ്രൗണ്ട് വിട്ടത്.
ഇന്ത്യ–ഓസ്ട്രേലിയ നാലാം ടെസ്റ്റിന്റെ ആദ്യ ദിനത്തിൽ റെക്കോർഡ് കാണികളാണ് സ്റ്റേഡിയത്തിലെത്തിയത്. 1,32,000 കാണികളെ ഉൾക്കൊള്ളാൻ കഴിയുന്ന അഹമ്മദാബാദ് സ്റ്റേഡിയത്തിൽ ഒരു ലക്ഷത്തിലധികം കാണികൾ എത്തിയെന്നാണ് റിപ്പോർട്ട്. ടെസ്റ്റ് ക്രിക്കറ്റിന്റെ ചരിത്രത്തിൽ ഒരുദിവസം ഏറ്റവും കൂടുതൽ കാണികളെത്തിയത് 2013–14ലെ ആഷസ് പരമ്പരയിലാണ്. പരമ്പരയിലെ നാലാം ടെസ്റ്റ് മത്സരം കാണാൻ 91,112 പേരാണ് മെൽബൺ ക്രിക്കറ്റ് ഗ്രൗണ്ടിലെത്തിയത്.
English Summary: PM Modi, Anthony Albanese in Motera for India-Australia Test