ലോകകപ്പ് മത്സരങ്ങൾ നേരിട്ടു കണ്ടവർ 1,25,0307; ഒരു മാച്ചിൽ ശരാശരി 26,000 കാണികൾ വീതം

അഹമ്മദാബാദ് ∙ രാജ്യാന്തര ക്രിക്കറ്റിലെ റെക്കോർഡുകൾ പലതും തിരുത്തിക്കുറിച്ച 2023 ഏകദിന ലോകകപ്പ്, കാണികളുടെ എണ്ണത്തിലും റെക്കോർഡിട്ടു. 6 ആഴ്ച നീണ്ടുനിന്ന ലോകകപ്പിനിടെ 1,25,0307 കാണികൾ‌ സ്റ്റേഡിയങ്ങളിലെത്തി മത്സരങ്ങൾ‌ കണ്ടു. ഐസിസി ടൂർണമെന്റുകളുടെ ചരിത്രത്തിലെ സർവകാല റെക്കോർഡാണിത്.

10,16,420 കാണികളെത്തിയ 2015 ഏകദിന ലോകകപ്പായിരുന്നു ഇതിനു മുൻപ് കൂടുതൽ കാണികളെത്തിയ ലോകകപ്പ് ടൂർണമെന്റ്. എന്നാൽ ഇത്തവണ നോക്കൗട്ട് മത്സരങ്ങൾ തുടങ്ങും മുൻപേ ഈ കണക്ക് തിരുത്തപ്പെട്ടിരുന്നു.

48 മത്സരങ്ങൾ നടന്ന 13–ാമത് ഏകദിന ലോകകപ്പിൽ ഒരു മത്സരത്തിൽ ശരാശരി 26,000 കാണികളെത്തിയതായാണ് രാജ്യാന്തര ക്രിക്കറ്റ് കൗൺസിലിന്റെ കണക്ക്.