പരമ്പര നഷ്ടമായെങ്കിലും തലയുയർത്തി വിൻഡീസ്; ഇംഗ്ലണ്ടിനെതിരെ റെക്കോർഡ് റൺചേസ് വിജയം

ഗ്രോസ് ലെ (സെന്റ് ലൂസിയ) ∙ ട്വന്റി20 പരമ്പര നഷ്ടമായെങ്കിലും ഉശിരനൊരു റൺചേസ് വിജയത്തോടെ ഇംഗ്ലണ്ടിനെ കീഴടക്കിയ വെസ്റ്റിൻഡീസ് പരാജയഭാരത്തിൽനിന്നു തലയുയർത്തി. 4–ാം ട്വന്റി20യിൽ ആദ്യം ബാറ്റു ചെയ്ത ഇംഗ്ലണ്ട് ഫിൽ സോൾട്ടിന്റെയും ജേക്കബ് ബെതേലിന്റെയും അർധസെഞ്ചറികളുടെ മികവിൽ 20 ഓവറിൽ 5 വിക്കറ്റ് നഷ്ടത്തിൽ 218 റൺസെടുത്തു.

മറുപടി ബാറ്റിങ്ങി‍ൽ, 24 പന്തിൽ 54 റൺസുമായി ഷായ് ഹോപ്പും 31 പന്തിൽ 68 റൺസുമായി എവിൻ ലെവിസും തകർത്താടിയപ്പോൾ വിൻഡീസിനു വിജയം എളുപ്പമായി. കരീബിയൻ മണ്ണിൽ വെസ്റ്റിൻഡീസ് ടീമിന്റെ ഏറ്റവും ഉയർന്ന വിജയകരമായ റൺചേസാണിത്. സ്കോർ: ഇംഗ്ലണ്ട് – 20 ഓവറിൽ 5ന് 218; വെസ്റ്റിൻഡീസ് – 19 ഓവറിൽ 5ന് 221.