‘ഇന്ത്യ ജയിച്ച’ ന്യൂസീലൻഡ് നാട്ടിൽ വീണു; ക്രൈസ്റ്റ്ചർച്ചിലെ ഒന്നാം ടെസ്റ്റിൽ ഇംഗ്ലണ്ടിന് 8 വിക്കറ്റ് ജയം

ക്രൈസ്റ്റ്ചർച്ച് ∙ ഒരു മാസം മുൻപ് ഇന്ത്യയിൽ പരമ്പര തൂത്തുവാരി മടങ്ങിയ ന്യൂസീലൻഡിന് സ്വന്തം മണ്ണിൽ തോൽവിയോടെ തുടക്കം. ന്യൂസീലൻഡിനെതിരായ ഒന്നാം ടെസ്റ്റിൽ ഇംഗ്ലണ്ടിന് 8 വിക്കറ്റിന്റെ അനായാസ ജയം. രണ്ടാം ഇന്നിങ്സിൽ ഇന്നലെ 254 റൺസിന് ഓൾഔട്ടായ ആതിഥേയർക്ക് ഇംഗ്ലണ്ടിന് മുൻപിൽ വയ്ക്കാനായത് 104 റൺസ് വിജയലക്ഷ്യം. വെറും 2 വിക്കറ്റ് നഷ്ടത്തിൽ അനായാസം ലക്ഷ്യം കണ്ട സന്ദർശകർ ഒരുദിവസം ബാക്കിനിൽക്കെയാണ് ജയമുറപ്പിച്ചത്.

സ്കോർ: ന്യൂസീലൻഡ് 348, 254. ഇംഗ്ലണ്ട് 499, രണ്ടിന് 104.

2 ഇന്നിങ്സുകളിലായി 10 വിക്കറ്റ് വീഴ്ത്തിയ ഇംഗ്ലിഷ് പേസർ ബ്രൈഡൻ കാർസാണ് പ്ലെയർ ഓഫ് ദ് മാച്ച്. തോ‍ൽവിയോടെ ലോക ടെസ്റ്റ് ചാംപ്യൻഷിപ് പോയിന്റ് പട്ടികയിൽ നാലാം സ്ഥാനത്തേക്ക് താഴ്ന്ന കിവീസിന്റെ ഫൈനൽ പ്രതീക്ഷകൾ മങ്ങി.