കൊളംബിയയെ വീഴ്ത്തി; പെറുവിനു പ്രതീക്ഷ

സാവോ പോളോ ∙ കോപ്പ അമേരിക്ക ഫുട്ബോളിൽ കൊളംബിയയെ കീഴടക്കിയ പെറു നോക്കൗട്ട് പ്രതീക്ഷകൾ സജീവമാക്കി (2–1). വെനസ്വേല– ഇക്വഡോർ പോരാട്ടം സമനിലയായി (2–2). 

ഗോയിയാനിയ ഒളംപിക്കോ സ്റ്റേഡിയത്തിൽ, 17–ാം മിനിറ്റിൽ സെർജിയോ പിയ പെറുവിന്റെ ആദ്യ ഗോൾ നേടി. 53–ാം മിനിറ്റിൽ മിഗുവേൽ ബോർഹയുടെ പെനൽറ്റി ഗോളിലൂടെ കൊളംബിയ ഒപ്പമെത്തിയെങ്കിലും 11 മിനിറ്റിനപ്പുറം വിധി അവർക്കെതിരായി. കൊളംബിയൻ ഡിഫൻഡർ യെറി മിനയുടെ സെൽഫ് ഗോളിൽ പെറുവിനു വിജയം. ഉദ്ഘാടന മത്സരത്തിൽ ബ്രസീലിനോടു 4–0നു തോറ്റതോടെ സകലരും എഴുതിത്തള്ളിയ പെറുവിന്റെ ഉയിർത്തെഴുന്നേൽപ്പായി ഈ വിജയം. 2 കളിയിൽ 3 പോയിന്റോടെ ഗ്രൂപ്പ് ബിയിൽ പെറു 3–ാം സ്ഥാനത്ത്. 4 പോയിന്റുള്ള കൊളംബിയ 2–ാം സ്ഥാനത്തു തുടരുന്നു. ഒന്നാം സ്ഥാനക്കാരായ ബ്രസീലിന് 6 പോയിന്റ്. ഗ്രൂപ്പിലെ ആദ്യ 4 സ്ഥാനക്കാരാണു നോക്കൗട്ടിലെത്തുക. 

ഗ്രൂപ്പ് ബിയിലെ പിന്നാക്കക്കാരായ വെനസ്വേലയും ഇക്വഡോറും സമനിലയോടെ കളി അവസാനിപ്പിച്ചതും പെറുവിനു തുണയായി. 2 കളിയിൽ ഇക്വഡോറിന് ഒരു പോയിന്റ്. വെനസ്വേലയ്ക്കു 3 കളിയിൽ 2 പോയിന്റ്. ഇതുവരെ കോപ്പ അമേരിക്ക കിരീടം നേടിയിട്ടില്ലാത്ത ടീമുകളാണു വെനസ്വേലയും ഇക്വഡോറും. 

English Summary: Copa America  - Peru vs Columbia match live