ആദ്യ പകുതിയിൽ 2 ഗോൾ പിന്നിൽ; 2–ാം പകുതിയിൽ 3 ഗോൾ തിരിച്ചടിച്ച് യുണൈറ്റഡിന് ജയം

ലണ്ടൻ∙ ആദ്യപകുതിയിൽ രണ്ടു ഗോളുകൾക്ക് പിന്നിലായി മറ്റൊരു തോൽവിയെ ഉറ്റുനോക്കിയ മാഞ്ചസ്റ്റർ യുണൈറ്റഡിന്, രണ്ടാം പകുതിയിൽ മൂന്നു ഗോൾ തിരിച്ചടിച്ച തകർപ്പൻ വിജയം. ഇറ്റാലിയൻ ക്ലബ് അറ്റലാന്റയെയാണ് രണ്ടിനെതിരെ മൂന്നു ഗോളുകൾക്ക് യുണൈറ്റഡ് വീഴ്ത്തിയത്. യുണൈറ്റഡിനായി മാർക്കസ് റാഷ്ഫോർഡ് (53), ഹാരി മഗ്വയർ (75), ക്രിസ്റ്റ്യാനോ റൊണാൾഡോ (81) എന്നിവർ ഗോൾ നേടി. അറ്റലാന്റയുടെ ഗോളുകൾ മാരിയോ പസാലിച് (15), മെറീഹ് ഡീമിറൽ (28) എന്നിവർ നേടി.

വിജയത്തോടെ ഗ്രൂപ്പ് എഫിൽ മൂന്നു കളികളിൽനിന്ന് ആറു പോയിന്റുമായി യുണൈറ്റഡ് ഒന്നാം സ്ഥാനത്തെത്തി. അറ്റലാന്റ നാലു പോയിന്റുമായി രണ്ടാമതുണ്ട്. ഗ്രൂപ്പിലെ മറ്റൊരു മത്സരത്തിൽ സ്വിസ് ക്ലബ് യങ് ബോയ്സിനെ തോൽപ്പിച്ച വിയ്യാ റയലിനും നാലു പോയിന്റുണ്ടെങ്കിലും അവർ മൂന്നാമതാണ്. ഒന്നിനെതിരെ നാലു ഗോളുകൾക്കാണ് വിയ്യാ റയലിന്റെ വിജയം. ആൽബർട്ടോ മൊറേനോയുടെ ഇരട്ടഗോളുകളാണ് വിയ്യാ റയലിന് മികച്ച വിജയം സമ്മാനിച്ചത്.

∙ ബയൺ കുതിപ്പ്

ഗ്രൂപ്പ് ഇയിൽ ജർമൻ ചാംപ്യൻമാരായ ബയൺ മ്യൂണിക്കിന്റെ വിജയക്കുതിപ്പ് തുടരുന്നു. ഗ്രൂപ്പിലെ മൂന്നാം മത്സരത്തിൽ ബയൺ പോർച്ചുഗീസ് ക്ലബ് ബെൻഫിക്കയെ തോൽപ്പിച്ചു. എതിരില്ലാത്ത നാലു ഗോളുകൾക്കാണ് ബയണിന്റെ വിജയം. ലിറോയ് സാനെയുടെ ഇരട്ടഗോളുകളും (70, 84), സൗസ സോറെസിന്റെ (80) സെൽഫ് ഗോളും ലെവൻഡോവസ്കിയുടെ (82) ഗോളുമാണ് ബയണിന് മികച്ച വിജയം സമ്മാനിച്ചത്.

ഗ്രൂപ്പിലെ മറ്റൊരു മത്സരത്തിൽ ഡൈനാമോ കീവിനെതിരെ ജെറാർഡ് പിക്വേ നേടിയ ഗോളിൽ ബാർസിലോന വിജയത്തോടെ ‘രക്ഷപ്പെട്ടു’. 36–ാം മിനിറ്റിൽ ജോർഡി ആൽബയുടെ പാസിൽനിന്നാണ് പിക്വെ ടീമിന്റെ വിജയഗോൾ നേടിയത്. ഗ്രൂപ്പ് ഇയിൽ മൂന്നു കളികളും ജയിച്ച ബയൺ ഒൻപതു പോയിന്റുമായി ഒന്നാമതാണ്. തോറ്റെങ്കിലും ബെൻഫിക്ക നാലു പോയിന്റുമായി രണ്ടാമതുണ്ട്. ഡൈനാമോ കീവിനെ തോൽപ്പിച്ച ആദ്യ ജയം സ്വന്തമാക്കിയ ബാർസയ്ക്ക് മൂന്നു പോയിന്റും മൂന്നാം സ്ഥാനവും.

∙ ഒരു ഗോളടിച്ച യുവെയും മുന്നോട്ട്

ഗ്രൂപ്പ് എച്ചിൽ റഷ്യൻ ക്ലബ് സെനിത് സെന്റ് പീറ്റേഴ്സ്ബർഗിനെതിരെ അവസാന നിമിഷം നേടിയ ഗോളിൽ യുവെന്റസും വിജയം നേടി. സമനിലയിലേക്കെന്ന് കരുതിയ മത്സരത്തിന്റെ 86–ാം മിനിറ്റിൽ കുലുസേവ്ക്സിയാണ് യുവെയുടെ വിജയഗോൾ നേടിയത്. വിജയത്തോടെ മൂന്നു കളികളിൽനിന്ന് ഒൻപതു പോയിന്റുമായി യുവെ ഒന്നാം സ്ഥാനം നിലനിർത്തി.

മാൽമോയെ എതിരില്ലാത്ത നാലു ഗോളുകൾക്ക് വീഴ്ത്തിയ നിലവിലെ ചാംപ്യൻമാരായ ചെൽസി ആറു പോയിന്റുമായി ഗ്രൂപ്പിൽ രണ്ടാം സ്ഥാനത്താണ്. ഇരട്ട പെനൽറ്റികൾ ലക്ഷ്യത്തിലെത്തിച്ച് ഇരട്ടഗോൾ നേടിയ ജോർജീഞ്ഞോ (21, 57), ക്രിസ്റ്റൻസൻ (9), കയ് ഹാവെർട്സ് (48) എന്നിവരാണ് ചെൽസിക്കായി ഗോൾ നേടിയത്.

∙ ഗ്രൂപ്പ് ‘ജി’യിൽ സാൽസ്ബർഗ് ആധിപത്യം

ഗ്രൂപ്പ് ജിയിൽ വോൾഫ്സ്ബർഗിനെ ഒന്നിനെതിരെ മൂന്നു ഗോളുകൾക്ക് തോൽപ്പിച്ച് ആർബി സാൽസ്ബർഗ് ഒന്നാം സ്ഥാനത്തു തുടരുന്നു. മൂന്നു കളികളിൽനിന്ന് ഏഴു പോയിന്റാണ് സാൽസ്ബർഗിന്റെ സമ്പാദ്യം.

ഫ്രഞ്ച് ക്ലബ് ലീലുമായി ഗോൾരഹിത സമനില വഴങ്ങിയ സെവിയ്യ മൂന്നു പോയിന്റുമായി രണ്ടാം സ്ഥാനത്തുണ്ട്. ലീലിനും വോൾഫ്സ്ബർഗിനും രണ്ടു പോയിന്റു വീതം.

English Summary: UEFA Champions League 2021-22, Live