ദേശീയ ടീമിലേക്ക് താരങ്ങളെ വിട്ടുനൽകണം; ക്ലബ്ബുകളോട് അഭ്യർഥിച്ച് ഇന്ത്യൻ ഫുട്ബോൾ ടീം പരിശീലകൻ

ന്യൂഡൽഹി ∙ ഏഷ്യൻ ഗെയിംസ്, എഎഫ്സി അണ്ടർ 23 ഫുട്ബോൾ, ലോകകപ്പ് യോഗ്യതാ മത്സരങ്ങൾ എന്നിവയ്ക്ക് ഒരുങ്ങാൻ ദേശീയ ടീം ക്യാംപിലേക്കു താരങ്ങളെ വിട്ടുനൽകണമെന്ന് ഇന്ത്യൻ ഫുട്ബോൾ പരിശീലകൻ ഇഗോർ സ്റ്റിമാച്ച് ഐഎസ്എൽ ക്ലബ്ബുകളോട് അഭ്യർഥിച്ചു. സമൂഹമാധ്യമത്തിൽ പങ്കുവച്ച കുറിപ്പിലൂടെയാണ് സ്റ്റിമാച്ച് ഐഎസ്എൽ ക്ലബ്ബുകളോട് പരസ്യമായ അഭ്യർഥന നടത്തിയത്. 

നേരത്തേ, എഎഫ്സി അണ്ടർ 23 ക്യാംപിലേക്കു താരങ്ങളെ വിട്ടുനൽകാൻ മുംബൈ സിറ്റി എഫ്സി, കൊൽക്കത്ത ഈസ്റ്റ് ബംഗാൾ ടീമുകൾ വിസമ്മതിച്ചിരുന്നു. ഇതിന്റെ കൂടി പശ്ചാത്തലത്തിലാണു ക്രൊയേഷ്യക്കാരൻ കോച്ചിന്റെ പരസ്യ ‘ഇടപെടൽ’. ഇതേ ആവശ്യമുന്നയിച്ച് ഐഎസ്എൽ ക്ലബ്ബുകളുമായി സ്റ്റിമാച്ച് നാളെ വെർച്വൽ ചർച്ചയും നടത്തും.

English Summary: indian coach Igor Stimach's request to ISL clubs