ലോകകപ്പ് യോഗ്യതാ മത്സരം: അർജന്റീനയ്ക്കും ബ്രസീലിനും തോൽവി

ബ്യൂനസ് ഐറിസ് ∙ ഖത്തർ ലോകകപ്പിലെ ഗ്രൂപ്പ് മത്സരത്തിൽ സൗദി അറേബ്യയോടു പരാജയപ്പെട്ടതിനു ശേഷം തോൽവിയറിയാതെ കുതിച്ച അർജന്റീനയെ ഒടുവിൽ യുറഗ്വായ് വീഴ്ത്തി. ലാ ബൊംബോനേറ സ്റ്റേഡിയത്തിൽ നടന്ന ലോകകപ്പ് യോഗ്യതാ മത്സരത്തിൽ യുറഗ്വായുടെ വിജയം 2–0ന്. പുതിയ കോച്ച് അർജന്റീനക്കാരനായ മാർസെലോ ബിയേൽസയുടെ കീഴിൽ യുറഗ്വായ് ടീമിന്റെ ഏറ്റവും വലിയ വിജയമാണിത്. റൊണാൾഡ് അരൗജോ, ഡാർവിൻ ന്യൂനസ് എന്നിവരാണ് യുറഗ്വായുടെ ഗോളുകൾ നേടിയത്.

കൊളംബിയ 2–1നു ബ്രസീലിനെയും തോൽപിച്ചു. യോഗ്യതാ റൗണ്ടിൽ ബ്രസീലിന്റെ തുടർച്ചയായ 2–ാം തോൽവിയാണിത്. നാലാം മിനിറ്റിൽ ഗബ്രിയേൽ മാർട്ടിനെല്ലിയിലൂടെ ബ്രസീൽ ലീഡ് നേടിയെങ്കിലും 75, 79 മിനിറ്റുകളിലായി സ്ട്രൈക്കർ ലൂയിസ് ഡയസാണ് കൊളംബിയയുടെ 2 ഗോളുകൾ തിരിച്ചടിച്ച കളി വരുതിയിലാക്കി.