ബ്ലൈൻഡ് വനിതാ ഫുട്ബോൾ ലോകകപ്പ് കൊച്ചിയിൽ; സ്വന്തം മണ്ണിൽ കിരീടം ലക്ഷ്യമിട്ട് ഇന്ത്യ

ന്യൂഡൽഹി ∙ അടുത്ത വർഷം ഇന്ത്യയിൽ വച്ചു നടക്കുന്ന വനിതാ ബ്ലൈൻഡ് ഫുട്ബോൾ ലോകകപ്പിന് കൊച്ചി ആതിഥേയത്വം വഹിക്കും. കഴിഞ്ഞ വർഷം ഇംഗ്ലണ്ടിൽ നടന്ന പ്രഥമ വനിതാ ബ്ലൈൻഡ് ഫുട്ബോൾ ലോകകപ്പിൽ നാലാം സ്ഥാനക്കാരായ ഇന്ത്യൻ ടീമിന് ഇത്തവണ സ്വന്തം മണ്ണിൽ കിരീടം നേടുകയാണ് ലക്ഷ്യം.

അർജന്റീനയാണ് നിലവിൽ ലോക ചാംപ്യൻമാർ. പത്തോളം രാജ്യങ്ങൾ പങ്കെടുക്കുന്ന ലോകകപ്പ് അടുത്ത വർഷം പകുതിയോടെയാണ് കൊച്ചിയിൽ ആരംഭിക്കുക.

മലപ്പുറം സ്വദേശി ഇ.അപർണയാണ് ഇന്ത്യൻ ടീമിലെ മലയാളി സാന്നിധ്യം. സുനിൽ ജെ.മാത്യുവാണു ടീമിന്റെ പരിശീലകൻ. മാനേജർ എം.സി.റോയ്.  ബ്ലൈൻഡ് ഫുട്ബോളിൽ ഒരു ടീമിൽ 5 കളിക്കാരാണ് ഉണ്ടാകുക. കാഴ്ച പരിമിതിയുള്ള 4 പേരും കാഴ്ചശക്തിയുള്ള ഗോൾ കീപ്പറും.  തട്ടുമ്പോൾ ശബ്ദമുണ്ടാകുന്ന പന്താണു ഉപയോഗിക്കുന്നത്.