പന്തു കളിക്കാൻ എന്തു പ്രായം!; 58–ാം വയസ്സിലും കളി തുടരാൻ കസുയോഷി മിയുറ

ടോക്കിയോ ∙ പ്രഫഷനൽ ഫുട്ബോളിലെ ഏറ്റവും പ്രായമേറിയ താരം എന്ന ഖ്യാതിയുള്ള ജപ്പാൻകാരൻ കസുയോഷി മിയുറ അടുത്ത സീസണിലും കളി തുടരും. അടുത്ത ഫെബ്രുവരിയിൽ 58 വയസ്സ് തികയുന്ന ഫോർവേഡ് മിയുറ സുസുക ക്ലബ്ബുമായി പുതിയ കരാർ ഒപ്പുവയ്ക്കുമെന്ന് ജാപ്പനീസ് ന്യൂസ് ഏജൻസി റിപ്പോർട്ട് ചെയ്തു.

പ്രഫഷനൽ കരിയറിൽ മിയുറയുടെ 40–ാം സീസണായിരിക്കും അത്. തൊണ്ണൂറുകളിൽ ജപ്പാൻ ദേശീയ ടീമിനു വേണ്ടി 89 കളികളിൽ 55 ഗോളുകൾ നേടിയ മിയുറ ക്ലബ് കരിയറിൽ 16 ക്ലബ്ബുകൾക്കു വേണ്ടി കളിച്ചിട്ടുണ്ട്. 1986ൽ ബ്രസീലിയൻ ക്ലബ് സാന്റോസിനു വേണ്ടിയാണ് ക്ലബ് കരിയർ തുടങ്ങിയത്. പിന്നീട് ഇറ്റലി, ക്രൊയേഷ്യ, ഓസ്ട്രേലിയ, പോർച്ചുഗൽ തുടങ്ങിയ രാജ്യങ്ങളിലെല്ലാം കളിച്ചു. 1992ൽ ഏഷ്യൻ ഫുട്ബോളർ ഓഫ് ദ് ഇയർ പുരസ്കാരം നേടി.