മികായേൽ സ്റ്റാറെയുടെ പിൻഗാമി എത്താൻ വൈകുമോ?; ഇടക്കാല കോച്ചാകാൻ പുരുഷോത്തമൻ

കൊച്ചി ∙ മികായേൽ സ്റ്റാറെയുടെ പിൻഗാമി എത്തും വരെ കേരള ബ്ലാസ്റ്റേഴ്സിന്റെ താൽക്കാലിക ചുമതല മലയാളിയായ സഹപരിശീലകൻ ടി.ജി.പുരുഷോത്തമനെ ഏൽപിക്കുമെന്നു സൂചന. ബ്ലാസ്റ്റേഴ്സ് റിസർവ് ടീം പരിശീലകനും യൂത്ത് ഡവലപ്മെന്റ് ഹെഡുമായ തോമാസ് കോർസിനാകും പരിശീലന ഒരുക്കങ്ങളുടെ ചുമതല.

പുതിയ ഹെഡ് കോച്ച് ടീമിനൊപ്പം ചേരുന്നതു വരെ പുരുഷോത്തമനും തോമാസ് കോർസും ടീമിന്റെ ചുമതല നിർവഹിക്കുമെന്നു കഴിഞ്ഞ ദിവസം ബ്ലാസ്റ്റേഴ്സ് പ്രഖ്യാപിച്ചിരുന്നു. 22ന് കൊച്ചിയിൽ കൊൽക്കത്ത മുഹമ്മദൻസിനെതിരെയാണ് ബ്ലാസ്റ്റേഴ്സിന്റെ അടുത്ത മത്സരം.

പുരുഷോത്തമൻ ഗോൾ കീപ്പറായിരിക്കെ കേരളം രണ്ടുവട്ടം സന്തോഷ് ട്രോഫി നേടിയിരുന്നു. 2023 മുതൽ കേരള ബ്ലാസ്റ്റേഴ്സ് സഹപരിശീലകനാണ്.