മാലദ്വീപിനെ ഗോൾ മഴയിൽ മുക്കി, ഇന്ത്യന്‍ വനിതകൾക്ക് 11–1 ന്റെ വമ്പൻ വിജയം

ബെംഗളൂരു∙ ഫിഫ സൗഹൃദ ഫുട്ബോൾ ടൂർണമെന്റിലെ രണ്ടാം മത്സരത്തിൽ മാലദ്വീപിനെ ഗോൾ മഴയിൽ മുക്കി ഇന്ത്യൻ വനിതകൾ. ഇന്നലെ നടന്ന മത്സരത്തിൽ 11–1നാണ് ആതിഥേയരായ ഇന്ത്യയുടെ ജയം. ആദ്യ മത്സരത്തിൽ 14–0ന് ഇന്ത്യ വിജയിച്ചിരുന്നു. 4 ഗോളുകൾ നേടിയ അരങ്ങേറ്റ താരം ലിൻഗ്ഡെകിമ്മാണ് ഇന്നലെ ഇന്ത്യൻ ആക്രമണത്തിനു ചുക്കാൻ പിടിച്ചത്.

12, 16, 56, 59 മിനിറ്റുകളിലായിരുന്നു ലിൻഗ്ഡെകിമിന്റെ ഗോളുകൾ. കജോൾ ഡിസൂസ (15), പൂജ (41), എൻ.സിബാനി ദേവി (45+1), സിമ്രാൻ ഗുരുങ് (62, 68), കെ.ഭൂമിക ദേവി (71) എന്നിവരാണ് ഇന്ത്യയുടെ മറ്റു സ്കോറർമാർ. മാലദ്വീപ് ക്യാപ്റ്റൻ ഹവ ഹനീഫ സെൽഫ് ഗോൾ (71) വഴങ്ങി. മറിയം റിഫയാണ് സന്ദർശകരുടെ ആശ്വാസ ഗോൾ നേടിയത്.