ഡച്ച് ഗ്രാൻപ്രിയിൽ മാക്സ് വേർസ്റ്റപ്പന്റെ അപ്രമാദിത്യം തകർന്നു; താരമായി ലാൻഡ് നോറിസ്

സണ്ട്ഫോർട്ട് (നെതർലൻഡ്സ്) ∙ ഡച്ച് ഗ്രാൻപ്രിയിൽ നാട്ടുകാരൻ മാക്സ് വേർസ്റ്റപ്പന്റെ അപ്രമാദിത്യം തകർത്ത് ലാൻഡ് നോറിസ്. ഫോർമുല വൺ ഡച്ച് ഗ്രാൻപ്രിയിൽ അജയ്യനായിരുന്ന റെഡ് ബുൾ ഡ്രൈവർ മാക്സ് വേർസ്റ്റപ്പനെ രണ്ടാം സ്ഥാനത്താക്കി മക്‌ലാരന്റെ ലാൻഡോ നോറിസ് ജേതാവായി. നോറിസിന്റെ കരിയറിലെ രണ്ടാം ഫോർമുല വൺ വിജയമാണിത്.

ഒന്നാമനായി റേസ് തുടങ്ങിയ ട്രിപ്പിൾ ലോക ചാംപ്യൻ വേർസ്റ്റപ്പനെ 22.896 സെക്കൻഡുകൾക്ക് പിന്നിലാക്കിയാണ് ഇരുപത്തിനാലുകാരൻ നോറിസ് സണ്ട്ഫോർട്ട് ട്രാക്കിൽ ജേതാവായത്. ആറാമതു റേസ് തുടങ്ങിയ ഫെറാറിയുടെ ചാൾസ് ലെക്ലയർ മൂന്നാമനായി ചെക്കേഡ് ഫ്ലാഗ് കടന്നു.