ലോകം കാത്തിരിക്കുന്ന വിവാഹ മാമാങ്കത്തിന് ജൂൺ 29ന് തുടക്കം; ‘അൻഡിലിയ’ ഒരുങ്ങി
Mail This Article
അനന്ത്– അംബാനി രാധിക മെർച്ചന്റ് വിവാഹത്തിന്റെ ആഘോഷങ്ങൾ ജൂൺ 29ന് ആരംഭിക്കും. അംബാനിയുടെ മുംബൈയിലുള്ള വസതിയായ അൻഡിലിയയിൽ പ്രത്യേക പൂജ നടത്തിയാണ് ചടങ്ങുകൾക്ക് തുടക്കം കുറിക്കുന്നതെന്ന് അടുത്തവൃത്തങ്ങൾ അറിയിച്ചു. അടുത്ത മാസം നടക്കാനിരിക്കുന്ന വിവാഹ ആഘോഷങ്ങളുടെ മുന്നോടിയായാണ് ഈ സ്വകാര്യ ചടങ്ങ് നടക്കുന്നത്.
വിവാഹത്തിനുള്ള ഒരുക്കങ്ങളെല്ലാം ഇതിനോടകം തന്നെ പുർത്തിയായതായാണ് വിവരം. പ്രശസ്ത ഫാഷൻ സ്റ്റൈലിസ്റ്റുകളായ റിയ കപൂറും ശലീന നതാനിയുമാണ് വധൂ വരന്മാരുടെ വിവാഹലുക്ക് ഒരുക്കുന്നത്. വധൂവരന്മാരുടെ ഔട്ട്ഫിറ്റ് തയാറാക്കുന്നത് പ്രശസ്ത ഡിസൈനർമാരായ അബുജാനിയും സന്ദീപ് ഖോശ്ലയുമാണ്.
മൂന്ന് ദിവസത്തെ ആഘോഷമാണ്. ജൂലൈ 12ന് മുംബൈ ജിയോ കൺവെൻഷൻ സെന്ററിലാണു വിവാഹം. ജുലൈ 12ന് നടക്കുന്ന ചടങ്ങ് ശുഭ് വിവാഹ് എന്നും 13ലേത് ശുഭ് ആശിർവാദ്, 14ന് നടക്കുന്ന ചടങ്ങ് മംഗൾ ഉത്സവ് എന്നുമാണ് അറിയപ്പെടുന്നത്. ഈ വർഷ ആദ്യം ഗുജറാത്തിലെ ജാംനഗറിൽ അനന്ത്–രാധിക വിവാഹത്തിന്റെ ഒന്നാംഘട്ട പ്രീവെഡ്ഡിങ് ആഘോഷങ്ങൾ നടന്നിരുന്നു. മാർച്ച് 29 മുതൽ ജൂൺ 1 വരെ ഇറ്റലിയിൽ നിന്നാരംഭിച്ച് ഫ്രാൻസിൽ അവസാനിച്ച ആഡംബര കപ്പൽയാത്രയിലായിരുന്നു രണ്ടാംഘട്ട പ്രീവെഡ്ഡിങ് ആഘോഷങ്ങൾ നടന്നത്.
ലോകത്തിലെ തന്നെ ഹൈ–പ്രൊഫൈൽ വിവാഹങ്ങളിലൊന്നാണ് അനന്ത്–രാധിക വിവാഹം. റിലയൻസ് മേധാവി മുകേഷ് അംബാനിയുടെയും നിത അംബാനിയുടെയും ഇളയമകനാണ് അനന്ത്. വിവിധ മേഖലയിൽ നിന്നുള്ള പ്രമുഖർ വിവാഹത്തിൽ പങ്കെടുക്കും.