ചന്ദ്രയാനും ആദിത്യക്കും ശേഷം 8000 കോടി ബജറ്റില്‍ ഇനി 'സമുദ്രയാൻ'; 'മത്സ്യ 6000' എന്ന സമുദ്രപേടകത്തിൽ യാത്ര

ഇന്ത്യയുടെ ആദ്യത്തെ ഒരു ആഴക്കടൽ ദൗത്യം  'മത്സ്യ 6000' എന്ന സമുദ്രപേടകത്തിൽ മുങ്ങിപ്പൊങ്ങിയെത്തുമ്പോള്‍ എന്തൊക്കെ അറിവുകളും വിലപ്പെട്ട നിധികളുമായിരിക്കും ലഭിക്കുക?.ഭൗമശാസ്ത്ര മന്ത്രാലയവും നാഷണൽ ഇൻസ്റ്റിറ്റ്യൂട്ട് ഓഫ് ഓഷ്യൻ ടെക്നോളജിയും (എൻഐഒടി ) ചേർന്നാണ് ഇന്ത്യയുടെ ആദ്യത്തെ മനുഷ്യ ദൗത്യമായ 'സമുദ്രയാൻ' രൂപീകരിച്ചിരിക്കുന്നത്. ബെംഗലൂരു ജിയോളജിക്കൽ സർവേ ഓഫ് ഇന്ത്യയിലെ സീനിയർ ജിയോളജിസ്റ്റായ അരുണ്‍ കെ ശ്രീധർ പര്യവേഷണത്തെക്കുറിച്ചു വിശദീകരിക്കുന്നു. 

മധ്യ ഇന്ത്യന്‍ മഹാസമുദ്രത്തില്‍ (Central Indian Ocean) 75,000 ചതുരശ്രകിലോമീറ്റര്‍   വിസ്തൃതിയുള്ള  പ്രദേശമാണ് ഇന്റർനാഷണൽ സീബെഡ് അതോറിറ്റി ഇന്ത്യയ്ക്ക് ഗവേഷണം ചെയ്യാൻ അനുവദിച്ചിരിക്കുന്നത്. ഈ ഭാഗത്തെ കടലിൽ 6000 മീറ്റർ അല്ലെങ്കിൽ 6 കിലോമീറ്റർ ആഴത്തിൽ ഗവേഷണം നടത്താനാണു ഒരുക്കം. 

2018ലാണ് ആഴക്കടൽ പര്യവേക്ഷണ ദൗത്യത്തിനു തുടക്കം

സമുദ്രയാന്‍ മിഷന്റെ 5 വർഷത്തെ ബജറ്റ് 8000 കോടി രൂപയാണ്, 'മത്സ്യ 6000' എന്ന സമുദ്രപേടകത്തിലായിരിക്കും ഗവേഷക സംഘം പര്യവേക്ഷണം നടത്തുക. കടലിനടിയില്‍ 6 കിലോമീറ്റര് ആഴത്തില്‍ 12 മണിക്കൂര്‍ വരെ ഈ പേടകത്തിനു തങ്ങാൻ കഴിയും.  പ്രത്യേക സാഹചര്യങ്ങളിൽ, 96 മണിക്കൂറിൽ കൂടുതൽ കടലിനടിയിൽ തങ്ങാൻ ഇതിന് കഴിയും. മൂന്ന് സമുദ്രയാത്രികരായിരിക്കും കടലിനടിയിലേക്ക് പോയി കടൽത്തട്ട് പര്യവേക്ഷണം ചെയ്യുന്നത് ചെന്നൈയ്ക്കടുത്തുള്ള ഇന്ത്യൻ മഹാസമുദ്ര മേഖലയിൽ അന്തർവാഹിനിയുടെ പരീക്ഷണം വിജയകരമായി നടന്നു.

ലക്ഷ്യങ്ങൾ

∙മധ്യ ഇന്ത്യൻ മഹാസമുദ്ര തടത്തിലെ 75,000 ചതുരശ്ര കിലോമീറ്റർ പ്രദേശത്ത് നിന്ന് പോളിമെറ്റാലിക് നോഡ്യൂളുകൾ ഖനനം ചെയ്യും

∙കാലാവസ്ഥാ വ്യതിയാനത്തിന്റെ രൂപീകരണത്തെക്കുറിച്ചുള്ള  ഗവേഷണ പ്രവർത്തനങ്ങൾ 

∙ടൈഡൽ എനർജി പ്ലാന്റ് സ്ഥാപിക്കാനുള്ള ഗവേഷണം

∙കടലിനടിയിലേക്കു 3 ഓഷ്യനോട്ടുകളെ വഹിച്ചുകൊണ്ട് പോകും, നിർണായകമായ ഗവേഷണ പ്രവർത്തനങ്ങൾ നടത്തും.

ആഴക്കടലിലെ വിലമതിക്കാനാകാത്ത ധാതു നിക്ഷേപങ്ങൾ 

കടലിലെ ധാതുക്കൾ കൂടുതലും സമുദ്ര ഉപരിതലത്തിനടിയിൽ 1 മുതൽ 6 കിലോമീറ്റർ വരെ ആഴത്തിൽ സ്ഥിതിചെയ്യുന്നു. 

പോളിമെറ്റാലിക് അല്ലെങ്കിൽ മാംഗനീസ് നോഡ്യൂളുകൾ 

സമുദ്രോപരിതലത്തിൽ നിന്ന് 4 മുതൽ 6 കിലോമീറ്റർ വരെ താഴെയായാണ് ഇത്തരം ഉരുളക്കിഴങ്ങു പോലെയുള്ള നൊഡ്യൂളുകൾ കാണപ്പെടുന്നത്. മാംഗനീസും അനുബന്ധ ഹൈഡ്രോക്സൈഡുകളും സമുദ്രജലത്തിൽ ഒരു ന്യൂക്ലിയസിനു (ഇത് ഒരു സ്രാവിന്റെ പല്ലോ ക്വാർട്സ് തരികളോ ആകാം)  ചുറ്റുമായി നിക്ഷേപിക്കപ്പെടുന്നു.  ഇത്തരത്തിലുള്ള നിക്ഷേപം  ഏകദേശം 4-14 സെന്റിമീറ്റർ വ്യാസമുള്ള ഉരുളക്കിഴങ്ങ് ആകൃതിയിലുള്ള നോഡ്യൂളുകൾ ഉണ്ടാക്കുന്നു. 

ദശലക്ഷം വർഷത്തിൽ 1-15 മില്ലിമീറ്റർ എന്ന നിരക്കിൽ അവ വളരെ സാവധാനത്തിൽ വളരുന്നു. പോളിമെറ്റാലിക് / മാംഗനീസ് നോഡ്യൂളുകൾ  റെയർ ഏർത്സ്, കോബാൾട്ട്, നിക്കൽ, ചെമ്പ്, മോളിബ്ഡിനം, ലിഥിയം, യിട്രിയം എന്നിവയുൾപ്പെടെ നിരവധി മൂലകങ്ങളാൽ സമ്പന്നമാണ് . പോളിമെറ്റാലിക് നോഡ്യൂളുകളുടെ ഏറ്റവും വലിയ നിക്ഷേപം മെക്സിക്കോയ്ക്കും ഹവായിക്കും ഇടയിലുള്ള പസഫിക് സമുദ്രത്തിൽ ക്ലാരിയൻ ക്ലിപ്പർട്ടൺ ഫ്രാക്ചർ സോൺ എന്നറിയപ്പെടുന്ന ഒരു പ്രദേശത്ത്  കാണപ്പെടുന്നു

ഐലൻഡ് ആർക്കുകൾ പോലുള്ള സജീവ സമുദ്ര ടെക്റ്റോണിക് ക്രമീകരണങ്ങളിൽ ആണ് പോളിമെറ്റാലിക് അല്ലെങ്കിൽ സീബെഡ് കൂറ്റൻ സൾഫൈഡ് നിക്ഷേപങ്ങളും. രൂപം കൊള്ളുന്നത്. ഇതുപോലെയുള്ള നിക്ഷേപങ്ങൾ ഹൈഡ്രോതെർമൽ പ്രവർത്തനവും ഹൈഡ്രോതെർമൽ വെന്റുകളുമായി ബന്ധപ്പെട്ടിരിക്കുന്നു (  ഒരു ഹൈഡ്രോതെർമൽ വെന്റ് എന്നത് കടലിന്റെ  അടിത്തട്ടിലെ ഒരു വിള്ളലാണ്), അതിൽ നിന്ന്  ധാതുക്കളാൽ സമ്പന്നമായ ജിയോതെർമൽ വെള്ളം പുറന്തള്ളപ്പെടുന്നു). പോളിമെറ്റാലിക് സൾഫൈഡ് ധാതുക്കൾ ചെമ്പ്, സ്വർണ്ണം, ഈയം, വെള്ളി, മറ്റ് ലോഹങ്ങൾ എന്നിവയാൽ സമ്പന്നമാണ്. 

കടലിനടിയിലെ പ്രക്രിയകളും കാലാവസ്ഥാ വ്യതിയാനവും 

കടലിനടിയിലെ മണ്ണിടിച്ചിൽ കരയിലെ മണ്ണിടിച്ചിലിനേക്കാൾ വളരെ വലുതാണ്. കടലിനടിയിലെ വലിയ മണ്ണിടിച്ചിൽ മീഥെയ്ൻ വാതകം പുറത്തുവിടാൻ സാധ്യത ഉണ്ട്. ഇത്തരത്തിൽ കടലിനടിയിലെ മണ്ണിടിച്ചിലും പെട്ടെന്നുള്ള കാലാവസ്ഥാ വ്യതിയാനത്തിന്റെ ഘടകങ്ങളും തമ്മിൽ ശ്രദ്ധേയമായ ബന്ധമുണ്ട്

ബ്ലൂ എകോണമി

സമുദ്ര പരിസ്ഥിതിയുടെ ചൂഷണം, സംരക്ഷണം, പുനരുജ്ജീവനം എന്നിവയുമായി  ബന്ധപ്പെട്ട സാമ്പത്തിക ശാസ്ത്രത്തിലെ ഒരു പദമാണ്  നീല സമ്പദ് വ്യവസ്ഥ. പരമ്പരാഗത മത്സ്യബന്ധനം, അക്വാകൾച്ചർ, സമുദ്ര ഗതാഗതം,  സമുദ്ര ടൂറിസം അല്ലെങ്കിൽ മറ്റ് പരമ്പരാഗത ഉപയോഗങ്ങൾ മുതൽ തീരദേശ പുനരുപയോഗ ഊർജ്ജം, കടൽത്തീര ഖനനം, ബയോപ്രോസ്പെക്ടിങ് തുടങ്ങിയ  കൂടുതൽ ഉയർന്നുവരുന്ന പ്രവർത്തനങ്ങൾ വരെ ഇതിൽ ഉൾപ്പെടാം. 

2030 ഓടെ നവ ഇന്ത്യ എന്ന  കേന്ദ്രസർക്കാരിന്റെ കാഴ്ചപ്പാടിന്റെ ആറാമത്തെ ഘട്ടമാണ് നീല സമ്പദ് വ്യവസ്ഥ. സമുദ്രങ്ങളുടെ സുസ്ഥിരമായ ഉപയോഗത്തിലൂടെ,  വരുമാനം സൃഷ്ടിക്കുന്നതിനും തൊഴിലവസരങ്ങള്‍ സൃഷ്ടിക്കുന്നതിനും അവസരങ്ങള്‍ നല്കിക്കൊണ്ട് സാമ്പത്തിക വളർച്ച വര്ദ്ധിപ്പിക്കുന്നതിനും  നീല  സമ്പദ് വ്യവസ്ഥയ്ക്കും വലിയ പങ്ക് ഉണ്ട് .

'MATSYA 6000' submersible under construction at National Institute of Ocean Technology at Chennai. India’s first manned Deep Ocean Mission ‘Samudrayaan’ plans to send 3 humans in 6-km ocean depth in a submersible