ആണവവികിരണമൊക്കെ ഈ പുഴുക്കൾക്ക് പുല്ലാണ്! ചേർണോബിലിൽ നിന്ന് അദ്ഭുതം

ആണവ റിയാക്ടർ ദുരന്തം നടന്ന യുക്രെയ്നിലെ ചേർണോബിലിൽ സ്ഥിതി ചെയ്യുന്ന നിരോധിതമേഖലയിൽ ജീവിക്കുന്ന ചില പുഴുക്കൾക്ക് ആണവ വികിരണത്തോട് പ്രതിരോധം ഉടലെടുത്തെന്ന് പുതിയ പഠനം. ചേർണോബിൽ വികിരണമേഖലയിൽ, നിയമപ്രകാരം അനുവദനീയമായതിനേക്കാൾ ആറ് മടങ്ങ് വികിരണം ഉണ്ടെന്നാണ് കണക്ക്. എന്നാൽ ഈ പുഴുക്കളിൽ ജനിതക പരിശോധന നടത്തിയപ്പോൾ അവയ്ക്ക് ആണവവികിരണം കാരണം യാതൊരു തകരാറുമില്ലെന്നു തെളിഞ്ഞു. ഇതിന്റെ കാരണം തേടി കൂടുതൽ പരിശോധനകൾ നടത്താൻ ഒരുങ്ങുകയാണ് ശാസ്ത്രജ്ഞർ.

ആണവ വിസ്ഫോടനം നടന്ന സ്ഥലമായ യുക്രെയ്നിലെ ചേർണോബിലിൽ വികിരണമേഖലയിലുള്ള ചില ചെന്നായ്ക്കൾക്ക് കാൻസറിനോട് പ്രതിരോധം ഉടലെടുത്തെന്ന് ഈ വർഷം മറ്റൊരു പഠനം പുറത്തിറങ്ങിയിരുന്നു. യുഎസിലെ പ്രശസ്ത സർവകലാശാലയായ പ്രിൻസ്റ്റൺ സർവകലാശാലയിലെ ഗവേഷകരാണ് പഠനം നടത്തിയത്. റേഡിയേഷൻ ചികിത്സയ്ക്ക് വിധേയരായ കാൻസർ രോഗികൾക്ക് ലഭിക്കുന്ന നിലയിലുള്ള പ്രതിരോധമാണ് ചെന്നായ്ക്കൾക്ക് സംഭവിച്ചതെന്ന് ശാസ്ത്രജ്ഞർ പറയുന്നു

ലോകത്തെ ഏറ്റവും വലിയ ആണവ ദുരന്ത സ്മരണകൾ നിലനിൽക്കുന്നതാണ് യുക്രെയ്‌നിലെ ചേർണോബിൽ ആണവ നിലയം. 37 വർഷം മുൻപ് സംഭവിച്ച, ലോകത്തിലെ ഏറ്റവും വലിയ ആണവദുരന്തമായ ചേർണോബിൽ സംഭവത്തിന്‌റെ അപകടകരമായ വിഷവസ്തുക്കൾ ഇന്നും വഹിക്കുന്ന സ്ഥലമാണ് ചേർണോബിൽ.

യുക്രെയ്ൻ സോവിയറ്റ് യൂണിയന്‌റെ ഭാഗമായ റിപ്പബ്ലിക്കായി നിന്ന 1986ലാണു ചേർണോബിൽ വിസ്‌ഫോടനം നടന്നത്. നിരവധി പേരുടെ മരണത്തിനിടയാക്കിയ സംഭവത്തിൽ നിന്നുയർന്ന ആണവ അവശിഷ്ടങ്ങളും വികിരണങ്ങളും തലമുറകളുടെ ആരോഗ്യത്തെ ബാധിച്ചു. ചേർണോബിൽ മേഖലയിലെ ഭൂമി പോലും ആണവവസ്തുക്കളാൽ മലീമസമായി. ഇന്നും നൂറു ടണ്ണോളം ഭാരമുള്ള ആണവ അവശിഷ്ടങ്ങൾ റിയാക്ടർ നിലനിന്നിരുന്ന മേഖലയിലുണ്ടെന്നാണു റിപ്പോർട്ട്.

ചേർണോബിലിലെ നാലാം റിയാക്ടറിന്റെ ഘടനാപരമായ പാളിച്ചകളും മോശമായ പ്രവർത്തന സംവിധാനങ്ങളുമാണു ദുരന്തത്തിനു വഴിവച്ചത്. ഇതെത്തുടർന്ന് ചുറ്റും തഴച്ചുവളർന്നു നിന്നിരുന്ന മരങ്ങളുടെ ഇലകൾ ചുവന്നു. അങ്ങനെയാണു റെഡ് ഫോറസ്റ്റ് എന്ന പേര് ഈ മരക്കൂട്ടത്തിന് വന്നുചേർന്നത്.അന്നു രൂപമെടുത്ത വികിരണസ്വഭാവമുള്ള പുകമേഘം യൂറോപ്പിനെ ഒട്ടേറെ ആഴ്ചകളാണ് ഭീതിയിലാഴ്ത്തിയത്.

ഈ ആണവവികിരണശേഷിയുള്ള വസ്തുക്കൾ പുറത്തെത്തി പരക്കുന്നതു തടയാനായി ചേർണോബിലിൽ സുരക്ഷിതമായ ബന്തവസ് ഘടന ഒരുക്കിയിരുന്നു. പത്തുവർഷങ്ങൾക്കു ശേഷം സ്റ്റീലിൽ നിർമിച്ച ഒരു വമ്പൻ കൺഫൈൻമെന്‌റ് ആർക്കിന്‌റെയും പണി തുടങ്ങി. 2017ൽ ആണ് ഈ ഘടന പൂർത്തീകരിച്ചത്.

Read More: 2024ല്‍ പരിഗണിക്കാവുന്ന കുറഞ്ഞ വിലയുള്ള 5 സ്മാര്‍ട്ട് വാച്ചുകള്‍

170 കോടി ഡോളർ ചെലവിലായിരുന്നു ഇതിന്‌റെ നിർമാണം.ഘട്ടം ഘട്ടമായി ആണവമാലിന്യം നീക്കം ചെയ്യാനും വികിരണഭീഷണി ഒഴിവാക്കാനും ലക്ഷ്യമിട്ടുള്ളതായിരുന്നു ഈ ആർക്ക്. ഒരു ചുഴലിക്കാറ്റ് ഉണ്ടായാൽ പോലും അതിനെ ചെറുക്കാൻ ശേഷിയുള്ളവിധം കരുത്തുറ്റതായിട്ടായിരുന്നു ആർക്ക് നിർമിച്ചത്. നിലയത്തിൽ പണ്ട് ഉപയോഗിച്ചിരുന്ന ആണവ ഇന്ധന റോഡുകൾ പ്രത്യേകം നിർമിച്ച കൂളന്‌റ് ടാങ്കുകളിലാണു സൂക്ഷിച്ചിരിക്കുന്നത്..