'ബോട്ട്' ഉപയോക്താക്കളുടെ ഡാറ്റ ഡാർക്​വെബിൽ, ചോര്‍ച്ചയിൽ അന്വേഷണം; പ്രത്യാഘാതങ്ങൾ ഇങ്ങനെ

7.5 ദശലക്ഷത്തിലധികം ബോട്ട്( BoAt) ഉപഭോക്താക്കളുടെ പേര്, വിലാസം, ബന്ധപ്പെടാനുള്ള നമ്പർ, ഇമെയിൽ ഐഡി, ഉപഭോക്തൃ ഐഡി എന്നീ വിവരങ്ങൾ ഡാർക് വെബിൽ പ്രത്യക്ഷപ്പെട്ടതായി റിപ്പോർട്ടുകൾ . ഇന്ത്യന്‍ വെയറബ്ള്‍സ് കമ്പനിയായ ബോട്ടിന്റെ ഉപകരണങ്ങള്‍ വാങ്ങിയവരുടെ സ്വകാര്യ വിവരങ്ങളാണ് ചോര്‍ന്നത്. റിപ്പോര്‍ട്ട് പ്രകാരം ഏകദേശം 75 ലക്ഷം പേരുടെ ഡാറ്റയാണ് സൈബര്‍ ആക്രമികള്‍ ചോര്‍ത്തി ഡാര്‍ക് വെബില്‍ വില്‍പ്പനയ്ക്കു വച്ചിരിക്കുന്നതെന്നാണ് അവകാശവാദം. 

ഈ സംഭവത്തിൽ ബോട്ട് അന്വേഷണം പ്രഖ്യാപിച്ചതായും വിവരങ്ങളുണ്ട്. ഏപ്രിൽ 5നാണ് 'ShopifyGUY' എന്ന ഹാക്കർ 2GBയിൽ കൂടുതൽ ബോട്ട് ഉപഭോക്തൃ ഡാറ്റ ഡാർക്​വെബിൽ വിൽപ്പനക്കായി എത്തിച്ചത്. നിസാര തുകയ്ക്കു ആർക്കും കൈമാറാൻ തയാറാണെന്നു ഇയാൾ അവകാശപ്പെടുകയും ചെയ്തതോടെ ആശങ്ക ഉയരുകയായിരുന്നു.

അറിയേണ്ട കാര്യങ്ങൾ ഇതാ:

വെളിപ്പെടുത്തിയ ഡാറ്റ: ഏകദേശം 7.5 ദശലക്ഷം ബോട്ട് ഉപഭോക്താക്കളുടെ പേരുകൾ, വിലാസങ്ങൾ, ഫോൺ നമ്പറുകൾ, ഇമെയിൽ വിലാസങ്ങൾ, ഉപഭോക്തൃ ഐഡികൾ എന്നിവ ഡാർക്ക് വെബിൽ ചോർന്നതായി റിപ്പോർട്ടുണ്ട്.

ഉറവിടം:ഹാക്കർ ShopifyGUY  2024 ഏപ്രിൽ ആദ്യം BoAt Lifestyleന്റെ ഡാറ്റാബേസ് ലംഘിച്ചതായി അവകാശപ്പെടുന്നു.

അപകടസാധ്യതകൾ: ഈ ഡാറ്റ ചോർച്ച ഉപയോക്താക്കളെ ഫിഷിങ് ആക്രമണങ്ങൾ, ഐഡൻ്റിറ്റി മോഷണം, സാമ്പത്തിക തട്ടിപ്പുകൾ എന്നിവയിലേക്ക് നയിച്ചേക്കാം.,

ജാഗ്രത പാലിക്കുക: വ്യക്തിപരമോ സാമ്പത്തികമോ ആയ വിവരങ്ങൾ വെളിപ്പെടുത്തുന്നതിനായി  ശ്രമിക്കുന്ന ആവശ്യപ്പെടാത്ത ഇമെയിലുകൾ, കോളുകൾ അല്ലെങ്കിൽ സന്ദേശങ്ങൾ എന്നിവയിൽ ജാഗ്രത പാലിക്കുക

ക്രെഡൻഷ്യലുകൾ മാറ്റുക: boAt-നും മറ്റ് അക്കൗണ്ടുകൾക്കുമായി നിങ്ങൾ ഒരേ ഇമെയിലും പാസ്‌വേഡും കോമ്പിനേഷൻ ഉപയോഗിക്കുകയാണെങ്കിൽ, അവ ഉടനടി മാറ്റുന്നത് പരിഗണിക്കുക.

അക്കൗണ്ടുകൾ നിരീക്ഷിക്കുക:  ബാങ്ക് സ്റ്റേറ്റ്മെന്റുകളും ക്രെഡിറ്റ് റിപ്പോർട്ടുകളും നിരീക്ഷിക്കുക.