ഫ്രാൻസിൽ അറസ്റ്റിലായ ടെലിഗ്രാം സ്ഥാപകൻ,ആരാണ് പവെൽ ദുറോവ്?; അറിയേണ്ടതെല്ലാം

ആപ്പുമായി ബന്ധപ്പെട്ട കുറ്റങ്ങൾക്ക് ഓഗസ്റ്റ് 24ന് പാരീസ് വിമാനത്താവളത്തിൽ വച്ചാണ് ഫ്രഞ്ച് പൊലീസ്, ടെലിഗ്രാം ചീഫ് എക്‌സിക്യൂട്ടീവ് പവെൽ ദുറോവിനെ അറസ്റ്റ് ചെയ്തത്. അസർബൈജാനിൽ നിന്ന് സ്വകാര്യ ജെറ്റിൽ യാത്ര ചെയ്യുകയായിരുന്നു ദുറോവ്  .15.5 ബില്യൺ ഡോളർ ആസ്തിയുള്ള റഷ്യൻ വംശജനായ സംരഭകനായ പവെൽ ദുറോവിന്റെ അറസ്റ്റിൽ ഇലോൺ മസ്കുള്‍പ്പടെ പ്രതികരണവുമായി എത്തി..

റഷ്യ ഉപേക്ഷിച്ച ദുറോവ്

2006-ൽ  സഹസ്ഥാപകനായ "റഷ്യൻ ഫെയ്സ്ബുക്ക്" എന്ന് വിളിക്കപ്പെടുന്ന VKontakte-ൽ നിന്നാണ് സോഷ്യൽ മീഡിയയുടെ ലോകത്തേക്കുള്ള ദുറോവിന്റെ യാത്ര ആരംഭിച്ചത്. VKontakte പെട്ടെന്ന് റഷ്യയിലെ ഏറ്റവും വലിയ സോഷ്യൽ നെറ്റ്‌വർക്കിങ് സൈറ്റായി മാറി, പക്ഷേ റഷ്യൻ സർക്കാരുമായി ഉരസലുണ്ടായതോടെ സൈറ്റ് ഉപേക്ഷിച്ചു ദുബായിലേക്കു താമസം മാറ്റി.

2013ൽ, എൻക്രിപ്ഷ്യന്‍ പോലുള്ള സവിശേഷതകളോടെ ഉപയോക്തൃ സ്വകാര്യതയ്‌ക്ക് ഊന്നൽ നൽകുന്ന ഒരു സന്ദേശമയയ്‌ക്കൽ അപ്ലിക്കേഷനായ ടെലിഗ്രാം ആരംഭിിച്ചതോടെ ദുറോവ് വീണ്ടും ശക്തനായി മാറി.

ദുറോവ് 2021ൽ ഫ്രഞ്ച് പൗരനായിത്തീർന്നു, യുണൈറ്റഡ് അറബ് എമിറേറ്റുകളിലും കരീബിയനിലെ ഇരട്ട ദ്വീപ് രാഷ്ട്രമായ സെൻ്റ് കിറ്റ്‌സ് ആൻഡ് നെവിസിലും പൗരത്വമെടുത്തതായും റിപ്പോർട്ടുണ്ട്.

റഷ്യയുടെയും കണ്ണിലെ കരട്

2018ൽ, ഉപയോക്താക്കളുടെ എൻക്രിപ്റ്റ് ചെയ്ത സന്ദേശങ്ങളിലേക്ക് സ്റ്റേറ്റ് സെക്യൂരിറ്റി സേവനങ്ങൾക്ക് ആക്സസ് അനുവദിക്കാൻ ദുറോവ് വിസമ്മതിച്ചതിനെ തുടർന്ന് ആപ്പ ബ്ലോക്ക് ചെയ്യാൻ റഷ്യ ശ്രമിച്ചു.

2022ൽ റഷ്യ യുക്രെയ്ൻ അധിനിവേശം ആരംഭിച്ചതിന് ശേഷം, യുദ്ധത്തെക്കുറിച്ചും ചുറ്റിപ്പറ്റിയുള്ള രാഷ്ട്രീയത്തെക്കുറിച്ചും  ഫിൽട്ടർ ചെയ്യാത്തതും ചിലപ്പോൾ തെറ്റിദ്ധരിപ്പിക്കുന്നതുമായ ഉള്ളടക്കത്തിന്റെ പ്രധാന ഉറവിടമായി ടെലിഗ്രാം മാറിയെന്നും ആരോപണം ഉയർന്നിരുന്നു.

എന്തിനാണ് അറസ്റ്റ്?

പ്രായപൂർത്തിയാകാത്തവർക്കെതിരായ അതിക്രമങ്ങൾ തടയുന്ന ഏജൻസിയായ ഫ്രാൻസിലെ OFMIN, ദുറോവിനെതിരെ ചുമത്തിയ കുറ്റങ്ങളിൽ വഞ്ചന, മയക്കുമരുന്ന് കടത്ത്, സൈബർ ഭീഷണിപ്പെടുത്തൽ, സംഘടിത കുറ്റകൃത്യങ്ങൾ എന്നിവ ഉൾപ്പെടുന്നുവെന്ന് ഉദ്യോഗസ്ഥരെ ഉദ്ധരിച്ച് എഎഫ്പി വാർത്താ ഏജൻസി റിപ്പോർട്ട് ചെയ്യുന്നു.