സ്വർണ ഇറക്കുമതി റെക്കോർഡിൽ: കയറ്റുമതി ഇടിഞ്ഞു

മുംബൈ∙ നവംബർ മാസത്തിൽ രാജ്യത്തെ കയറ്റുമതിയിൽ ഇടിവ്. 4.85% ആണു കുറഞ്ഞത്. അതേസമയം, മുൻവർഷം ഇതേ മാസവുമായി താരതമ്യം ചെയ്യുമ്പോൾ ഇറക്കുമതിയിൽ 27% വർധനയുണ്ട്.

സ്വർണത്തിന്റെ ഇറക്കുമതി കുതിച്ചുയർന്നതാണു കാരണം.14.8 ബില്യൻ ഡോളറിന്റെ സ്വർണമാണ് കഴിഞ്ഞ നവംബറിൽ ഇറക്കുമതി ചെയ്തത്. ഇത് റെക്കോർഡ് നിരക്കാണ്. ഉത്സവ സീസണോടനുബന്ധിച്ച് ഡിമാൻഡ് ഉയർന്നതാണ് സ്വർണ ഇറക്കുമതി മൂന്നിരട്ടിയിലേറെ ഉയരാൻ കാരണം. 

 ഇറക്കുമതി ഉയർന്നതോടെ വ്യാപാരക്കമ്മിയും ഉയർന്നു. ഇറക്കുമതിയും കയറ്റുമതിയും തമ്മിലുള്ള വിടവു സൂചിപ്പിക്കുന്ന വ്യാപാരക്കമ്മി 37.84 ബില്യൻ ഡോളറായാണ് ഉയർന്നത്. കഴിഞ്ഞ ഒക്ടോബറിൽ കയറ്റുമതിയിൽ 17.25% വർധന രേഖപ്പെടുത്തിയിരുന്നു. ഏപ്രിൽ മുതൽ നവംബർ വരെയുള്ള കാലയളവിൽ രാജ്യത്തിന്റെ കയറ്റുമതിയിൽ 2.17% വർധനയുണ്ട്.