ഓഖി, ബിപോർജോയ്, ഫെയ്ഞ്ചൽ...ചുഴലിക്കാറ്റിന് പേരു കിട്ടുന്നതെവിടുന്ന്?

ഇന്ത്യൻ മഹാസമുദ്രത്തിൽ വീശുന്ന ഫെയ്ഞ്ചൽ ചുഴലിക്കാറ്റുമൂലം ഇന്ത്യയിൽ ചില പ്രദേശങ്ങളിൽ കനത്ത മഴ പെയ്തു. ചുഴലിക്കാറ്റുകൾക്കെല്ലാത്തിനും പേരുകളുണ്ട്. കാര്യം മനുഷ്യരെ കഷ്ടത്തിലാക്കുന്നവയാണെങ്കിലും പല ചുഴലിക്കാറ്റുകൾക്കും പെട്ടെന്നോർമിക്കുന്ന പേരുകളുണ്ട്. 

ചുഴലിക്കാറ്റുകൾക്ക് എങ്ങനെയാണ് പേരുകൾ ലഭിക്കുന്നത്?ലോക കാലാവസ്ഥാ സംഘടനയുടെ മാർഗനിർദേശങ്ങളനുസരിച്ചാണ് ഈ പേര് നൽകുന്നത്. ചുഴലിക്കാറ്റുകൾക്ക് പേര് നൽകുന്നതിന് പല മാനദണ്ഡങ്ങളുണ്ട്. രാഷ്ട്രീയപരമായോ, മതപരമായോ സൂചനകൾ നൽകുന്നതാകരുത്, ആരുടെയും വികാരങ്ങളെ വ്രണപ്പെടുത്തുന്നതാകരുത്, ഉച്ചരിക്കാൻ എളുപ്പമായിരിക്കണം, പരമാവധി 8 അക്ഷരങ്ങളേ പേരിൽ കാണാവൂ തുടങ്ങിയ മാർഗനിർദേശങ്ങളുണ്ട്.

ഓരോ സമുദ്രമേഖലയുമായി ബന്ധപ്പെട്ടുള്ള കാലാവസ്ഥാ പാനലുകളാണ് അവിടങ്ങളിൽ ഉദ്ഭവിക്കുന്ന ചുഴലിക്കാറ്റുകൾക്ക് പേരു നൽകുന്നത്. ഈ പാനലുകളിലെ അംഗരാഷ്ട്രങ്ങളാണ് പേരുകൾ നാമനിർദേശം ചെയ്യുന്നത്.

ഫെൻഗൽ ചുഴലിക്കാറ്റിന് ആ പേര് നാമനിർദേശം നൽകിയത് സൗദി അറേബ്യയാണ്. അറബി വാക്കാണ് ഫെൻഗൽ.ഗുജറാത്തിൽ കഴിഞ്ഞവർഷമെത്തിയ ബിപോർജോയ് ചുഴലിക്കാറ്റിന് ബംഗാളി ഭാഷയിൽ ദുരന്തം എന്നാണർഥം. ബംഗ്ലദേശാണ് ഈ പേര് ചുഴലിക്കാറ്റിന് നൽകിയത്. ഓഖി ചുഴലിക്കാറ്റിനും പേര് നൽകിയത് ബംഗ്ലദേശായിരുന്നു.