26 ലക്ഷം സ്വർണനാണയങ്ങൾ, പെട്ടി നിറയെ രത്നങ്ങൾ; കടലിൽ മുങ്ങിയ ഇന്ത്യൻ മഹാനിധി!
![lost-indian-treasure-grosvenor-shipwreck Representative image. Photo credit: : :VisualField/ istock.com](https://img-mm.manoramaonline.com/content/dam/mm/mo/children/wonder-world/images/2024/7/13/lost-indian-treasure-grosvenor-shipwreck.jpg?w=1120&h=583)
Mail This Article
1782 ഓഗസ്റ്റിൽ ദക്ഷിണാഫ്രിക്കയിലെ പോണ്ടോലാൻഡ് തീരത്തിനു സമീപം ഒരു കപ്പൽ തകർന്നു. ഗ്രോസ്വെനോർ എന്നറിയപ്പെട്ട ആ കപ്പൽ പവിഴപ്പുറ്റിലിടിച്ചാണ് തകർന്നത്. മൂന്നു പായകളുണ്ടായിരുന്ന ഈ കപ്പൽ 729 ടൺ ഭാരം വഹിച്ചിരുന്നു. ഇംഗ്ലണ്ടിലേക്കു തിരികെപ്പോകുകയായിരുന്നു ഈ കപ്പൽ. ഈ കപ്പലിനെപ്പറ്റി പിന്നീട് പ്രചരിച്ചതനുസരിച്ച് ഇതിൽ 26 ലക്ഷം സ്വർണനാണയങ്ങൾ, 1400 സ്വർണക്കട്ടികൾ, വജ്രങ്ങളും മറ്റ് രത്നങ്ങളുമടങ്ങിയ 19 പെട്ടികൾ എന്നിവയുണ്ടായിരുന്നു. ഇന്ത്യയിലെ പ്രശസ്തമായ മയൂരസിംഹാസനവും ഇതിലുണ്ടായിരുന്നെന്ന് ചിലർ വാദമുയർത്തുന്നു. കപ്പലിലടങ്ങിയ ഈ വലിയ സമ്പത്ത് ഇന്ത്യയിൽ നിന്നുള്ളതായിരുന്നത്രേ. അന്നത്തെ മദ്രാസ് തുറമുഖത്തു നിന്നാണ് ഈ കപ്പൽ പുറപ്പെട്ടത്. ശ്രീലങ്കയിലെ ട്രിങ്കോമാലിയിലെത്തിയശേഷം ദക്ഷിണാഫ്രിക്ക ചുറ്റി ഇംഗ്ലണ്ടിലേക്കു പോകുകയായിരുന്നു കപ്പൽ.
![178964030 Representative image. Photo Credits: itakefotos4u/ istock.com](https://img-mm.manoramaonline.com/content/dam/mm/mo/config-assets/mo-default.jpg)
123 പേരാണ് ഈ കപ്പൽചേതത്തിൽ നിന്നു രക്ഷപ്പെട്ടത്. ഇതിൽ 18 പേരെ കേപ്ടൗണിലെത്തിച്ചു അധികൃതർ. ബാക്കിയുള്ളവർ പിന്നീട് മരിച്ചു. കപ്പൽ തകർന്ന മേഖലയ്ക്കടുത്തുണ്ടായിരുന്ന ബാൻടു ഗോത്രവർഗക്കാരുടെ ആക്രമണത്തിലാണ് പലരും മരിച്ചത്. കപ്പലിനോടൊപ്പമുണ്ടായിരുന്നെന്നു കരുതുന്ന വലിയ നിധി കണ്ടെത്താൻ പല ശ്രമങ്ങളും നടന്നെങ്കിലും വിജയിച്ചില്ല.
![lutine-the-ship-that-refuses-to-give-up-treasure Representative image. Photo Credits: Andrea Izzotti/ Shutterstock.com](https://img-mm.manoramaonline.com/content/dam/mm/mo/config-assets/mo-default.jpg)
ക്യാപ്റ്റൻ കോക്സോനായിരുന്നു കപ്പലിന്റെ കപ്പിത്താൻ.അദ്ദേഹത്തിന്റെ കണക്കുകൂട്ടലുകൾ തെറ്റിയതാണ് ഈ കപ്പൽ മുങ്ങാനിടയാക്കിയതെന്നു കരുതപ്പെടുന്നു. ഈ കപ്പലിലെ നിധിയെക്കുറിച്ചുള്ള കഥകൾ പരക്കാൻ തുടങ്ങിയത് 1880ൽ ആണ്. ഈ കപ്പൽ തകർന്നടിഞ്ഞ മേഖലയിൽ കുറച്ച് സ്വർണ, വെള്ളി നാണയങ്ങൾ കരയ്ക്കടിഞ്ഞതാണ് ഇതിനു വഴിവച്ചത്. എന്നാൽ ചില ചരിത്രകാരൻമാർ കപ്പലിൽ നിധിയൊന്നുമില്ലായിരുന്നെന്ന് വാദിക്കുന്നവരാണ്.