യേശുദാസിന്റെ മടങ്ങിവരവിനായി പ്രാർഥിച്ച് കേന്ദ്രമന്ത്രി സുരേഷ് ഗോപി

ഹരിപ്പാട് ∙ കെ.ജെ.യേശുദാസിനെ അമേരിക്കയിൽ നിന്നു തിരിച്ചു കൊണ്ടു വരാൻ നാഗരാജസ്വാമിയുടെ അനുഗ്രഹം  ഉണ്ടാകട്ടെ എന്നു പ്രാർഥിക്കുന്നുവെന്നു കേന്ദ്രമന്ത്രി സുരേഷ് ഗോപി. ശ്രീനാഗരാജ പുരസ്കാര  സമർപ്പണം സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കലാകാരൻമാരെ എന്നും ആദരിക്കാറുള്ള മണ്ണാറശാല ശ്രീനാഗരാജ ക്ഷേത്രത്തിൽ കെ.ജെ.യേശുദാസിനെ ആദരിച്ചിരുന്ന വിവരം അനുസ്മരിച്ചപ്പോഴാണ് അദ്ദേഹത്തിന്റെ മടങ്ങി വരവിനായി സുരേഷ് ഗോപി പ്രാർഥിച്ചത്. 

മണ്ണാറശാല ഇല്ലത്തെ മുതിർന്ന കുടുംബാംഗം എം.ജി. ജയകുമാർ അധ്യക്ഷത വഹിച്ചു. കുടുംബത്തെ ഇളയ കാരണവർ എം.കെ. കേശവൻ നമ്പൂതിരി പുരസ്കാരങ്ങൾ സമ്മാനിച്ചു. നഗരസഭാ അധ്യക്ഷൻ കെ.കെ. രാമകൃഷ്ണൻ സമാദരണവും മുതിർന്ന കുടുംബാംഗം എം.എസ്. വാസവൻ പ്രശംസ പത്ര സമർപ്പണവും നടത്തി.

എസ്.നാഗദാസ്, വി.കലാധരൻ, മാവേലിക്കര ഗോപകുമാർ, എൻ.ജയദേവൻ, പത്മശ്രീ ടി.കെ. മൂർത്തി, മാടമ്പി സുബ്രഹ്മണ്യൻ നമ്പൂതിരി, കലാമണ്ഡലം കെ.ജി. വാസുദേവൻ നായർ, കലാമണ്ഡലം പത്മിനി എന്നിവർ പ്രസംഗിച്ചു. പത്മശ്രീ ടി.കെ. മൂർത്തി (വാദ്യം), മാടമ്പി സുബ്രഹ്മണ്യൻ നമ്പൂതിരി (ഗീതം), കലാമണ്ഡലം കെ.ജി. വാസുദേവൻ നായർ (നാട്യം), കലാമണ്ഡലം പത്മിനി (നൃത്തം) എന്നിവരെയാണ് പുരസ്കാരം നൽകി ആദരിച്ചത്.