മെഡിക്കൽ പിജി പ്രവേശനം ‌ഓൺലൈൻ വഴി മാത്രം:എൻഎംസി

ന്യൂഡൽഹി ∙ മെഡിക്കൽ പിജി പ്രവേശനത്തിനുള്ള കൗൺസലിങ് ഓൺലൈനായി മാത്രമേ നടത്താവൂ എന്നു ദേശീയ മെഡിക്കൽ കമ്മിഷൻ (എൻഎംസി) നിർദേശിച്ചു. കോളജുകൾ സ്വന്തം നിലയ്ക്കു വിദ്യാർഥികളെ പ്രവേശിപ്പിക്കുന്നത് വിലക്കിയ കമ്മിഷൻ ഓരോ പ്രോഗ്രാമിനും സ്ഥാപനങ്ങൾ മുൻകൂട്ടി ഫീസ് പ്രഖ്യാപിക്കണമെന്നും വ്യക്തമാക്കി. ഇതുപ്രകാരം, എല്ലാ പിജി സീറ്റുകളിലേക്കും പ്രവേശനം കേന്ദ്ര, സംസ്ഥാന തലത്തിൽ ഓൺലൈനായി നടക്കും.

അതതു പ്രവേശനപരീക്ഷകളുടെ മെറിറ്റ് ലിസ്റ്റിന്റെ അടിസ്ഥാനത്തിൽ മാത്രമായിരിക്കും കൗൺസലിങ്ങെന്നും എൻഎംസി പുറത്തിറക്കിയ പിജി മെഡിക്കൽ എജ്യുക്കേഷൻ റഗുലേഷൻസിൽ പറയുന്നു. പരീക്ഷയുടെ ചോദ്യരീതിയിലും മാറ്റങ്ങൾ നിർദേശിച്ചു. ജില്ലാ റസിഡൻസി പ്രോഗ്രാം (ഡിആർപി) നിബന്ധനകളിലും മാറ്റമുണ്ട്. ഡിആർപിക്കായി 100 കിടക്കകളുള്ള ആശുപത്രി എന്നായിരുന്നു മുൻപുണ്ടായിരുന്ന നിബന്ധന. ഇത് 50 കിടക്കകൾ എന്നാക്കി. ഫലത്തിൽ, ചെറിയ ഇടത്തരം ആശുപത്രികളിലും ഡോക്ടർമാർക്കു പരിശീലനം നടത്താം.