പരീക്ഷയ്ക്ക് സഹായി; അനർഹർ കൂടുന്നുവെന്ന് മന്ത്രി

തിരുവനന്തപുരം ∙ സ്കൂൾ പൊതുപരീക്ഷ എഴുതാൻ സവിശേഷ പരിഗണന അർഹിക്കുന്ന വിഭാഗങ്ങളിൽ അനർഹരായവർ വർധിക്കുന്നുവെന്ന് പൊതുവിദ്യാഭ്യാസ വകുപ്പ് സൂചന നൽകുന്നു. പരീക്ഷ എഴുതാൻ താഴ്ന്ന ക്ലാസിലെ വിദ്യാർഥിയെ സഹായിയായി അനുവദിക്കുന്നതും എഴുതി നേടിയ മാർക്കിന്റെ 25% ഗ്രേസ് മാർക്കായി ലഭിക്കുന്നതുമുൾപ്പെടെയുള്ള ആനുകൂല്യങ്ങൾ അനർഹമായി ലഭിക്കാനുള്ള തട്ടിപ്പ് മന്ത്രി വി.ശിവൻകുട്ടി സൂചിപ്പിച്ചത് വർഷംതോറും ഈ വിഭാഗങ്ങളിലുണ്ടാകുന്ന കുട്ടികളുടെ വർധനയുടെ കണക്കു നിരത്തിയാണ്. എസ്എസ്എൽസിക്ക് കഴിഞ്ഞ വർഷം 26,518 കുട്ടികൾ ഈ വിഭാഗത്തിൽ പരീക്ഷയെഴുതി. അതിനു മുൻപത്തെ 4 വർഷങ്ങളിൽ ഇത് 13,294, 13,566, 17,534, 21,452 എന്നിങ്ങനെയാണ്. പൊതുവേ കുട്ടികളുടെ എണ്ണം കുറഞ്ഞുവരുമ്പോഴാണ് ഈ വിഭാഗത്തിൽ മാത്രം എണ്ണം കൂടുന്നത്. 

അപേക്ഷ 15 മുതൽ
തിരുവനന്തപുരം ∙ എസ്എസ്എൽസി, ടിഎച്ച്എസ്എൽസി, എഎച്ച്എസ്എൽസി, എസ്എസ്എൽസി (ഹിയറിങ് ഇംപയേഡ്), ടിഎച്ച്എസ്എൽസി (ഹിയറിങ് ഇംപയേഡ്) പരീക്ഷകളുടെ വിജ്ഞാപനം പ്രസിദ്ധീകരിച്ചു. പരീക്ഷാ ഫീസ് പിഴ കൂടാതെ ഈ മാസം 15 മുതൽ 20 വരെയും പിഴയോടെ 22 മുതൽ 26 വരെയും പരീക്ഷാ കേന്ദ്രങ്ങളിൽ സ്വീകരിക്കും.