ഖനനം, കാട്ടുതീ... ഇഞ്ചിഞ്ചായി ഇല്ലാതാകുന്ന ആമസോൺ: ചേർത്തുപിടിച്ച് ലുല, വരുമോ മരീന?

ബ്രസീൽ പ്രസിഡന്റ് തിരഞ്ഞെടുപ്പിൽ ലുല ഡസിൽവയുടെ വിജയത്തിൽ ‘സ്പോ‍ഞ്ച് പോലെയായ ഭൂമിയുടെ ശ്വാസകോശം’ ആശ്വാസം കൊള്ളുന്നുണ്ടോ? ലോകത്തെ പരിസ്ഥിതി വാദികൾക്ക് ഏതായാലും ആശ്വാസമുണ്ട്. ഭൂമിയുടെ ശ്വാസകോശമായ ആമസോൺ മഴക്കാടുകൾ ലുല ഡസിൽവയുടെ മടങ്ങി വരവിൽ ആശ്വാസത്തിലാണെന്ന് പരിസ്ഥിതി സ്നേഹികളും പറയുന്നു. ആമസോൺ മഴക്കാടുകൾ സംരക്ഷിക്കുമെന്ന് തന്റെ ആദ്യ പ്രസംഗത്തിൽത്തന്നെ നിയുക്ത പ്രസിഡന്റ് ലുല പ്രഖ്യാപിച്ചു കഴിഞ്ഞു. ആമസോണും ബ്രസീലും തമ്മിൽ എന്താണു ബന്ധമെന്ന ചോദ്യത്തിന് ലളിതമായ ഒരു ഉത്തരമേയുള്ളൂ– ബ്രസീലാണ് ആമസോണിന്റെ വിധി നിർണയിക്കുന്നത്. ‘‘ഭൂമിയിലെ ജീവജാലങ്ങൾ നേരിടുന്ന പ്രശ്നങ്ങൾ ചിന്തിച്ചാൽ, വെട്ടി വീഴ്ത്തുന്ന മരങ്ങൾ തരുമെന്നു നിങ്ങൾ കരുതുന്ന ലാഭത്തിന്റെ എത്രയോ മടങ്ങു മൂല്യമാണു തലയുയർത്തി നിൽക്കുന്ന ഒരു മരത്തിന്. ജന്തു ജാലങ്ങളെ നശിപ്പിക്കുകയും മനുഷ്യജീവനെ അപകടത്തിലാക്കുകയും ചെയ്യുന്ന മെർക്കുറിയുടെ ചെലവിൽ വേർതിരിച്ച് എടുക്കുന്ന സ്വർണത്തേക്കാൾ എത്രയോ വലിയ വില തെളിഞ്ഞ് ഒഴുകുന്ന ഒരു നദിക്കുണ്ട്.’’– ബ്രസീൽ പ്രസി‍ഡന്റ് സ്ഥാനത്തേക്ക് വീണ്ടും തിരഞ്ഞെടുക്കപ്പെട്ട ശേഷം ലുല ഡസിൽവ നടത്തിയ പ്രസംഗത്തിലെ വരികൾ ലോകമെങ്ങുമുള്ള പരിസ്ഥിതി സ്നേഹികൾക്കു നൽകിയ ആവേശം ചില്ലറയല്ല. ബ്രസീൽ പ്രസിഡന്റ് തിരഞ്ഞെടുപ്പും ആമസോൺ കാടും തമ്മിലുള്ള ബന്ധം വിശദമായി വിലയിരുത്തുകയാണ് ഐക്യരാഷ്ട്ര സംഘടനയുടെ ഗ്രീൻ ക്ലൈമറ്റ് ഫണ്ട് കോഓർഡിനേറ്ററും മലയാളിയുമായ ഷാജി തോമസ്...