ലണ്ടൻ കോട്ടയിൽ താമസിക്കുന്ന വിചിത്രകാക്കകൾ; ഇവ പറന്നുപോയാൽ ബ്രിട്ടൻ തകരുമെന്ന് വിശ്വാസം

ബ്രിട്ടനിലെ ഏറ്റവും ഐക്കോണിക് ആയ ചരിത്രനിർമിതികളിലൊന്നാണ് ടവർ ഓഫ് ലണ്ടൻ. ബ്രിട്ടന്റെ തലസ്ഥാനമായ ലണ്ടൻ നഗരത്തിൽ തെംസ് നദിയുടെ വടക്കൻ തീരത്ത് ഈ കോട്ട തലയുയർത്തി നിൽക്കുന്നു. ചരിത്രവും വിശ്വാസങ്ങളും പേറി.

ലണ്ടൻ ടവറിൽ ഒരുകൂട്ടം കാക്കകൾ താമസിക്കുന്നുണ്ട്. ഇവയുമായി ബന്ധപ്പെട്ട് ചില വിചിത്രവിശ്വാസങ്ങളുമുണ്ട്. ബ്രിട്ടിഷ് രാജകുടുംബാംഗങ്ങളിൽ പോലും ഈ വിശ്വാസം പിടിമുറുക്കിയിട്ടുണ്ടെന്നതാണ് വസ്തുത. ഏതെങ്കിലും കാലത്ത് ഈ കാക്കകൾ കോട്ട വിട്ടുപോയാൽ ടവർ ഓഫ് ലണ്ടൻ കോട്ട തകർന്നുവീഴുമെന്നും ബ്രിട്ടന്റെ ആധിപത്യത്തിന് അവസാനമാകുമെന്നുമായിരുന്നു പഴയകാലത്തെ വിശ്വാസം.

ബ്രിട്ടനിലെ മധ്യകാലഘട്ടത്തിലെ രാജാവായ ചാൾസ് രണ്ടാമൻ  ഈ കാക്കകളെ ലണ്ടൻ ടവറിൽ നിന്ന് ഒഴിപ്പിക്കാൻ ശ്രമിച്ചിരുന്നു. ഈ കാക്കകളുടെ കരച്ചിൽ ശല്യമാകുന്നെന്ന പരാതിയെത്തുടർന്നായിരുന്നു ഇത്. എന്നാൽ അദ്ദേഹത്തിന്റെ സഭാംഗങ്ങൾ അതിനു സമ്മതിച്ചില്ല. അന്നു മുതൽക്കാണ് കാക്കകളെക്കുറിച്ചുള്ള ഈ വിശ്വാസം ഉറച്ചത്.

ലണ്ടൻ ടവറിന്റെ കാവൽക്കാർക്കാണ് കാക്കകളുടെ പരിപാലനത്തിന്റെ ചുമതല. ഇറച്ചിയും ബിസ്‌ക്കറ്റുകളും ഇവയ്ക്ക് ഭക്ഷണമായി കാവൽക്കാർ നൽകും. ഈ കാക്കകൾക്ക് പേരുകളുമുണ്ട്. റെക്‌സ്, ജൂബിലി, ഹാരിസ്, പോപ്പി, ജോർജി, എഡ്ഗാർ, ബ്രാൻവെൻ തുടങ്ങിയവയാണ് കോട്ടയിൽ ഇപ്പോഴുള്ള ചില കാക്കകളുടെ പേരുകൾ. ഈ കാക്കകളുടെ മേൽനോട്ടത്തിനും പരിപാലനത്തിനുമായി റാവൻമാസ്റ്റർ എന്ന തസ്തികയിൽ ഒരാളെ നിയമിച്ചിട്ടുമുണ്ട്.

ഈ കാക്കകൾക്ക് കൃത്യമായ ഇടവേളകളിൽ വൈദ്യപരിശോധനയുമുണ്ട്. ഇടയ്ക്കിടയ്ക്ക് ഇവയെ പുറത്തുകൊണ്ടുപോകാറുമുണ്ട്.

Content Highlights: London | Crow | Manorama