കുറുക്കനെ വരിഞ്ഞുമുറുക്കി പെരുമ്പാമ്പ്; തലയിൽ ചിറകുവിരിച്ച് ചിത്രശലഭം, വേറിട്ട ചിത്രം!

മറ്റു ജീവികളേക്കാൾ അധികം എല്ലാവരും ഭയപ്പെടുന്നത് പാമ്പുകളെയാണ്. അത് വിഷമുള്ളതായാലും വിഷമില്ലാത്തതായാലും അങ്ങനെതന്നെ. പാമ്പുകൾ ഇരകളായ മൃഗങ്ങളെ വരിഞ്ഞു മുറുക്കുന്നതും ഭക്ഷിക്കുന്നതുമായ നിരവധി വിഡിയോകളും ചിത്രങ്ങളും സൂഹമാധ്യമങ്ങളിൽ പങ്കുവയ്ക്കാറുണ്ട്. നിരവധി കാഴ്ചക്കാരും ഇത്തരം വിഡിയോകൾക്കും ചിത്രങ്ങൾക്കുമുണ്ട്. അത്തരമൊരു ചിത്രമാണ് ഇപ്പോൾ സമൂഹമാധ്യമങ്ങളുടെ ശ്രദ്ധനേടുന്നത്.

കുറുക്കനെ വരിഞ്ഞുമുറുക്കുന്ന കൂറ്റൻ പെരുമ്പാമ്പിന്റെ ചിത്രമാണിത്. കുറുക്കന്റെ കണ്ണിലെ നിസ്സഹായതയും പാമ്പിന്റെ വന്യതയും വെളിവാക്കുന്ന ചിത്രത്തിൽ പാമ്പിന്റെ തലയിൽ വന്നിരിക്കുന്ന ചിത്രശലഭമാണ് വേറിട്ട കാഴ്ച. സൂക്ഷിച്ച് ചിത്രത്തെ നിരീക്ഷിച്ചാൽ മാത്രമേ ചിറക്‌വിരിച്ചു പാമ്പിന്റെ തലയിൽ വന്നിരിക്കുന്ന ചിത്രശലഭത്തെ കാണാൻ കഴിയൂ.

റെബേക്ക ഹെർബർട്ട് ആണ് ട്വിറ്ററിലൂടെ ഈ ചിത്രം പങ്കുവച്ചത്. ‘കുറുക്കനെ വരിഞ്ഞു മുറുക്കുന്ന പെരുമ്പാമ്പിനോട് എന്താകും ആ ചിത്രശലഭം പറയുന്നത്?’ എന്ന അടിക്കുറിപ്പോടെയാണ് റെബേക്ക ചിത്രം പങ്കുവച്ചത്. ചിത്രം കാണുന്നവരൊക്കെയും ഇപ്പോൾ ചിത്രശലഭത്തിനു പിന്നാലെയാണ്. കുറുക്കന്റെ മൂക്കിൽ വന്നിരിക്കുന്ന ഈച്ചയേയും ചിത്രത്തിൽ കാണാനാകും. കുറുക്കന്റെ ദൈന്യത കണ്ട് വന്നവർ ചിത്രശലഭത്തെ കണ്ടു മടങ്ങുന്ന കാഴ്ചയാണ് ഇവിടെ കാണാൻ കഴിയുക.

English Summary: Python Strangles Jackal In This Incredible Photo But Can You Spot The Butterfly Sitting With Its Wings Spread?