പെരക്കിന് സെലിബ്രിറ്റി ഉടമ, ജാവയുടെ ചുണക്കുട്ടനെ സ്വന്തമാക്കി യുവനടൻ

ജാവ പെരകിന്റെ കേരളത്തിലെ ആദ്യ സെലിബ്രിറ്റി ഉടമയായി നടൻ വിനു മോഹൻ. കൊച്ചിയിലെ ജാവ വിതരണക്കാരിൽ നിന്നാണ് താരം പെരക് സ്വന്തമാക്കിയത്. കഴിഞ്ഞ മാസം മുതലാണ് ജാവയുടെ ഇന്ത്യയിലെ മൂന്നാമത്തെ മോഡലായ പെരകിന്റെ വിതരണം കമ്പനി ആരംഭിച്ചത്. ബോബർ സ്റ്റൈലിലുള്ള ഈ ബൈക്കിന്റെ വില 1.94 ലക്ഷം രൂപയാണ്.

ബിഎസ്‍ 6 നിലവാരത്തിലുള്ള 334 സിസി സിംഗിള്‍ സിലിണ്ടര്‍ എയര്‍കൂള്‍ഡ് എൻജിനാണ് വാഹനത്തിന് കരുത്തേകുക. 30.6 പിഎസ് കരുത്തും 32.74 എന്‍എം ടോര്‍ക്കുമുണ്ട് ഈ എൻജിന്, ആറു സ്പീഡാണ് ഗിയർബോക്സ്.

ക്ലാസിക് മോട്ടർസൈക്കിളുകളുടെ സമവാക്യം തന്നെ മാറ്റാൻ പോന്ന രൂപഭംഗിയാണ് പെരക്കിന് എന്നാണ് ജാവ പറയുന്നത്. വിപണിയിലെ ഏതൊരു ബൈക്കിനേയും വെല്ലുവിളിക്കുന്ന രൂപഗുണത്തിലെത്തുന്ന പെരക് യുവാക്കൾക്ക് ഹരമാകുമെന്നാണ് ജാവയുടെ പ്രതീക്ഷ.

English Summary: Vinu Mohan Bought Jawa Perak