ബുള്ളറ്റ് വിൽപനയെ മുന്നിൽ നിന്ന് നയിച്ച് ക്ലാസിക് 350

കൊറോണ വൈറസ് വ്യാപനം സൃഷ്ടിച്ച വെല്ലുവിളികളെയും വിപണിയിലെ പ്രതികൂല സാഹചര്യങ്ങളെയും അതിജീവിച്ച് കഴിഞ്ഞ സാമ്പത്തിക വർഷം 5,72,438 മോട്ടോർ സൈക്കിളുകൾ വിറ്റതായി ‘ബുള്ളറ്റ്’ നിർമാതാക്കളായ റോയൽ എൻഫീൽഡ്. 2019 – 20ൽ വിറ്റ 6,09,932 യൂണിറ്റിനെ അപേക്ഷിച്ച് 6.15 ശതമാനത്തോളം കുറവാണിത്. 

‘കോവിഡ് 19’ മഹാമാരിയും തുടർന്നു പ്രഖ്യാപിച്ച രാജ്യവ്യാപക ലോക്ക്ഡൗണും 2020 – 21ൽ വാഹന വ്യവസായത്തിനാകെ തന്നെ വമ്പൻ വെല്ലുവിളിയാണു സൃഷ്ടിച്ചത്. ഇത്രയേറെ പ്രതിബന്ധങ്ങൾക്കിടയിലും 2019 — 20നെ അപേക്ഷിച്ച് വിൽപ്പനയിൽ 37,493 യൂണിറ്റ് ഇടിവു മാത്രമാണു കഴിഞ്ഞ സാമ്പത്തിക വർഷം നേരിട്ടത് എന്നത് ഐഷർ ഗ്രൂപ്പിൽപെട്ട റോയൽ എൻഫീൽഡിന് ആത്മവിശ്വാസം പകരുന്ന നേട്ടമാണ്.

റോയൽ എൻഫീൽഡ് ശ്രേണിയിൽ ‘ക്ലാസിക് 350’ തന്നെയാണു വിൽപ്പന കണക്കെടുപ്പിൽ മുന്നിൽ; കഴിഞ്ഞ സാമ്പത്തിക വർഷം 3,61, 140 ‘ക്ലാസിക് 350’ ആണു കമ്പനി വിറ്റത്. 2019 — 20ൽ വിറ്റ 3,98,144 എണ്ണത്തെ അപേക്ഷിച്ച് 9.29% കുറവാണിത്. മൊത്തം 98,008 യൂണിറ്റ് വിൽപ്പനയുമായി ‘ബുള്ളറ്റ് 350’ ആണു പട്ടികയിൽ രണ്ടാം സ്ഥാനത്ത്; 50,579 യൂണിറ്റ് വിൽപ്പന നേടി ‘ഇലക്ട്ര 350’ മൂന്നാമതെത്തി. 

റോയൽ എൻഫീൽഡിന്റെ പുത്തൻ അവതരണമായ ‘മീറ്റിയൊർ 350’ കഴിഞ്ഞ സാമ്പത്തിക വർഷം 38,893 യൂണിറ്റ് വിൽപ്പനയാണു കൈവരിച്ചത്. 2020 നവംബറിലായിരുന്നു ‘മീറ്റിയൊർ 350’ വിൽപ്പനയ്ക്കെത്തിയത്. 

അഡ്വഞ്ചർ ബൈക്കായ ‘ഹിമാലയ’ന്റെ 2020 — 21ലെ വിൽപ്പന 13,562 എണ്ണമാണ്; മുൻ സാമ്പത്തിക വർഷം വിറ്റ 15,302 യൂണിറ്റിനെ അപേക്ഷിച്ച് 11.37% കുറവാണിത്. എൻജിൻ ശേഷിയേറിയ ‘കോണ്ടിനെന്റൽ ജി ടി 650’, ‘ഇന്റർസെപ്റ്റർ ജി ടി 650’ എന്നിവ ചേർന്ന് 10,256 യൂണിറ്റ് വിൽപ്പനയാണ് 2020 - 21ൽ കൈവരിച്ചത്; മുൻ സാമ്പത്തിക വർഷം ഇരു മോഡലുകളും ചേർന്ന് 20,188 യൂണിറ്റ് വിൽപ്പന നേടിയിരുന്നു. 

English Summary: Royal Enfield FY 2021 Sales