‘സ്വപ്നങ്ങൾ യാഥാർഥ്യമാകുമ്പോൾ’ ടൈഗൂണിനെ കൂട്ടുപിടിച്ച് ഗ്രേസ് ആന്റണി

കൈ നിറയെ ചിത്രങ്ങൾ, പ്രേക്ഷക ശ്രദ്ധ നേടുന്ന മികച്ച കഥാപാത്രങ്ങൾ... സ്വപ്നങ്ങൾ യാഥാർഥ്യമാകുന്നതിന്റെ ത്രില്ലിലാണ് നടി ഗ്രേസ് ആന്റണി. ഇപ്പോഴിതാ പുതിയ വാഹനവും താരം ഗാരിജിലെത്തിച്ചിരിക്കുന്നു.

സ്വപ്നങ്ങള്‍ യാഥാർഥ്യമാക്കാം എന്ന അടിക്കുറിപ്പോടെയാണ് പുതിയ വാഹനത്തിന്റ ചിത്രങ്ങൾ ഗ്രേസ് ആന്റണി സമൂഹമാധ്യമങ്ങളിലൂടെ പങ്കുവച്ചത്. ടൈഗൂണിന്റെ ഏതു മോഡലാണ് സ്വന്തമാക്കിയത് എന്ന് വ്യക്തമല്ല.

ചെറു എസ്‌യുവി ടൈഗൂൺ

ഫോക്സ്‌വാഗണിന്റെ ചെറു എസ്‍യുവി ടൈഗൂൺ കഴിഞ്ഞ വർഷം അവസാനമാണ് വിപണിയിലെത്തിയത്. രണ്ട് ടിഎസ്​ഐ പെട്രോൾ എൻജിൻ മോഡലുകളോടെയാണ് ടൈഗൂണിന്റെ വരവ്. ഒരു ലീറ്റർ, ടി എസ് ഐ എൻജിനോടെയെത്തുന്ന ടൈഗുണിന്റെ എക്സ്ഷോറൂം വില ആരംഭിക്കുന്നത് 10.99 ലക്ഷം രൂപയിലാണ്. 1.5 ലീറ്റർ ടി ഡി ഐ എൻജിനുള്ള വകഭേദത്തിന്റെ വില ആരംഭിക്കുന്നത് 15.39 ലക്ഷം രൂപയിലും.

115 പിഎസ് കരുത്തും 178 എൻഎം ടോർക്കുമുള്ള ഒരു ലീറ്റർ എൻജിനു കൂട്ടായി മാനുവൽ, ആറു സ്പീഡ് ഓട്ടമാറ്റിക് ഗീയർബോക്സുകളുണ്ട്. 150 പിഎസ് കരുത്തും 250 എൻഎം ടോർക്കുമുള്ള 1.5 ലീറ്റർ എൻജിനൊപ്പം ആറു സ്പീഡ് മാനുവൽ, ഏഴു സ്പീഡ് ഡി എസ് ജി ഓട്ടമാറ്റിക് ഗീയർബോക്സുകളുണ്ട്.

English Summary: Grace Antony Bought Volkswagen Taigun