അടിമുടി മാറി, സ്റ്റൈലൻ ലുക്കിൽ മഹീന്ദ്ര എക്സ്യുവി 3എക്സ്ഒ; വില 7.49 ലക്ഷം മുതൽ
![XUV 3XO XUV 3XO](https://img-mm.manoramaonline.com/content/dam/mm/mo/fasttrack/auto-news/images/2024/4/30/mahindra-xuv-3xo.jpg?w=1120&h=583)
Mail This Article
മഹീന്ദ്ര എക്സ് യു വി 300 മുഖം മിനുക്കിയെത്തി. പേര് എക്സ്യുവി 3എക്സ്ഒ. വില- 7.49 ലക്ഷം മുതല് 15.49 ലക്ഷം രൂപ വരെ. രൂപത്തില് മഹീന്ദ്രയുടെ ബി ഇ കുടുംബത്തിലെ വൈദ്യുത എസ് യു വികളുമായിട്ടാണ് സാമ്യത. ഫീച്ചറുകളില് മാറ്റങ്ങളുണ്ട്. ഓട്ടമാറ്റിക് ഓപ്ഷന് കൂടി ഉള്പ്പെടുത്തിയാണ് മഹീന്ദ്ര എക്സ് യു വി 3എക്സ് ഒ അവതരിപ്പിച്ചിരിക്കുന്നത്.
![XUV 3XO XUV 3XO](https://img-mm.manoramaonline.com/content/dam/mm/mo/config-assets/mo-default.jpg)
പെട്രോള്, ഡീസല് എന്ജിനുകളില് എക്സ് യു വി 3എക്സ് ഒ എത്തുന്നു. പെട്രോളില് 111എച്ച്പി, 130എച്ച്പി കരുത്തുള്ള മാനുവല്, ഓട്ടമാറ്റിക് മോഡലുകളും ഡീസലില് 117 എച്ച്പി കരുത്തുള്ള മാനുവല് ഓട്ടമാറ്റിക് മോഡലുകളുമാണുള്ളത്. എക്സ്യുവി 300യ്ക്ക് ആകെ 25 വേരിയന്റുകളുണ്ടെങ്കിൽ എക്സ്യുവി 3എക്സ്ഓയിലേക്കെത്തുമ്പോള് അത് 18 ആയി കുറക്കുന്നുണ്ട് മഹീന്ദ്ര. ഓട്ടമാറ്റിക് മോഡലിന്റെ വില 9.99 ലക്ഷം രൂപ മുതലാണ് ആരംഭിക്കുന്നത്. സണ്റൂഫുള്ള MX2 PRO മോഡലിന്റെ വില 8.99 ലക്ഷം രൂപ മുതലാണ്.
പുതിയ മോഡലിന്റെ അടിസ്ഥാന മോഡലിന്റെ വില അരലക്ഷം രൂപ കുറവാണ്. ഉയര്ന്ന മോഡലിന് AX7Lന് 15.49 ലക്ഷം രൂപയാണ് മഹീന്ദ്ര വിലയിട്ടിരിക്കുന്നത്. കടുത്ത മത്സരം നടക്കുന്ന കോംപാക്ട് എസ് യു വി വിഭാഗത്തിലെ കിയ സോണറ്റിനേക്കാളും(7.99 ലക്ഷം- 15.75 ലക്ഷം രൂപ) ടാറ്റ നെക്സോണിനേക്കാളും(8.15 ലക്ഷം- 15.80 ലക്ഷം രൂപ) കുറഞ്ഞ വിലയാണിത്.
![XUV 3XO XUV 3XO](https://img-mm.manoramaonline.com/content/dam/mm/mo/config-assets/mo-default.jpg)
എക്സ്റ്റീരിയര്
പുതിയ ഡിആര്എല്ലുകള്, മാറ്റങ്ങളുള്ള ഫ്രണ്ട് ബംപറും ഹെഡ്ലാംപ് അസംബ്ലിയും രണ്ട് ഭാഗങ്ങളുള്ള ഗ്രില്ലും കൂടുതല് വലിയ എയര് ഇന്ടേക്കും എന്നിങ്ങനെ ഒറ്റനോട്ടത്തില് തന്നെ XUV 3XOയുടെ പുറംമോടിയില് മാറ്റങ്ങളുണ്ട്. പിന്നില് മുഴുനീളത്തിലുള്ള എല്ഇഡി ലൈറ്റ് ബാറാണ് നല്കിയിട്ടുള്ളത്. C രൂപത്തിലുള്ള ടെയില് ലാംപുകളും കൂടുതല് സ്മൂത്തായി തോന്നിക്കുന്ന ടെയില് ലൈറ്റുകളുമുണ്ട്. ടെയില്ഗേറ്റിലായിരുന്ന രജിസ്ട്രേഷന് പ്ലേറ്റിന്റെ സ്ഥാനം പിന്നില് ബംപറിലേക്കു മാറ്റിയിരിക്കുന്നു. ഉയര്ന്ന മോഡലിൽ പുതിയ ഡാര്ക്ക് ക്രോം അലോയ് വീലാണ്.
![mahindra-xuv-3xo-3 mahindra-xuv-3xo-3](https://img-mm.manoramaonline.com/content/dam/mm/mo/config-assets/mo-default.jpg)
സിട്രൈന് യെല്ലോ, ഡ്യൂണ് ഡസ്റ്റ്, നെബുല ബ്ലൂ, ഡീപ്പ് ഫോറസ്റ്റ്, സ്റ്റെല്ത്ത് ബ്ലാക്ക്, എവറസ്റ്റ് വൈറ്റ് എന്നിവ അടക്കം ഏഴു നിറങ്ങളിലാണ് മഹീന്ദ്ര XUV 3XO പുറത്തിറക്കുന്നത്. ഉയര്ന്ന മോഡലുകളിൽ ഡ്യുവല് ടോണ് കളര് ഓപ്ഷനുകളും ലഭിക്കുന്നു. 350 എംഎം വരെ ആഴത്തിലുള്ള വെള്ളത്തിലൂടെയും ഈ എസ് യു വി എളുപ്പം ഓടിച്ചുകൊണ്ടുപോകാനാവും. 23.6 ഡിഗ്രിയും 39.6 ഡിഗ്രിയുമാണ് ഡിപാര്ച്ചര് ആങ്കിളുകള്.
ഇന്റീരിയറും ഫീച്ചറുകളും
എക്സ് യു വി 400 ഇവിയോടാണ് ഇന്റീരിയറിലും ഡാഷ് ബോര്ഡ് ഡിസൈനിലും ഫീച്ചറുകളിലുമെല്ലാം XUV 3XOക്ക് സാമ്യത. 10.25 ഇഞ്ച് ഇന്ഫോടെയിന്മെന്റ് സ്ക്രീനും ഡ്രൈവര് ഡിസ്പ്ലേയും പനോരമിക് റൂഫ്, ഡ്യുവല് ടോണ് ക്ലൈമറ്റ് കണ്ട്രോള് എന്നിവയാണ് ഫീച്ചറുകളില് പ്രധാനം. ഉയര്ന്ന മോഡലുകളിൽ ഓള് എല്ഇഡി ലൈറ്റിങ്, സെവന് സ്പീക്കര് ഹര്മന് കാര്ഡോണ് ഓഡിയോ സിസ്റ്റം(380W ആംപ്ലിഫയര്), അഡ്രെനോക്സ് കണക്ട് കണക്ടിവിറ്റി സ്യൂട്ട്, വയര്ലെസ് ആന്ഡ്രോയിഡ് ഓട്ടോ ആപ്പിള് കാര്പ്ലേ, 65W ടൈപ്പ് സി ചാര്ജിങ് പോട്ട്, വയര്ലസ് ചാര്ജര്, പിന്നില് എസി വെന്റുകള് എന്നിങ്ങനെ പോവുന്നു ഫീച്ചറുകളുടെ പട്ടിക. ബൂട്ട് സ്പേസ് 257 ലീറ്ററില് നിന്നും 295 ലീറ്ററാക്കിയെന്നും മഹീന്ദ്ര അറിയിച്ചിട്ടുണ്ട്. 60:40 സ്പ്ലിയുട്ട്- ഫോള്ഡിങ് സീറ്റുകളും സ്റ്റാന്ഡേഡ് ഓപ്ഷനായെത്തുന്നു.
![XUV 3XO XUV 3XO](https://img-mm.manoramaonline.com/content/dam/mm/mo/config-assets/mo-default.jpg)
സുരക്ഷയുടെ കാര്യത്തില് ഒട്ടും പിന്നിലല്ല എക്സ്യുവി 3എക്സ്ഒ. എക്സ്യുവി 700ലേതിനു സമാനമാണ് പുതിയ മോഡലിന്റെ സുരക്ഷയെന്നാണ് മഹീന്ദ്ര അറിയിക്കുന്നത്. എല്ലാ മോഡലുകളിലും 6 എയര്ബാഗുകള് റിയര് ഡിസ്ക് ബ്രേക്ക്, ഇഎസ്പി, ISOFIX ആങ്കറുകള് എന്നിവ ലഭ്യമാണ്. ഉയര്ന്ന വകഭേദങ്ങളില് പാര്ക്കിങ് ബ്രേക്ക് വിത്ത് ഓട്ടോ ഹോള്ഡ്, ഹില് സ്റ്റാര്ട്ട്- ഹില് ഡിസന്റ് അസിസ്റ്റ്, 360 ഡിഗ്രി ക്യാമറ, ബ്ലൈന്റ് സ്പോട്ട് മോണിറ്റര്, സെഗ്മെന്റില് ആദ്യമായി ലെവല് 2 അഡാസ് എന്നിങ്ങനെയുള്ള ഫീച്ചറുകള് ലഭ്യമാണ്. സോണറ്റ്, വെന്യു തുടങ്ങിയ എതിരാളികള്ക്ക് ലെവല് 1 ക്യാമറ ബേസ്ഡ് അഡാസ് സാങ്കേതികവിദ്യയാണുള്ളത്.
![XUV 3XO XUV 3XO](https://img-mm.manoramaonline.com/content/dam/mm/mo/config-assets/mo-default.jpg)
പവര് ട്രെയിന്
എന്ട്രി ലെവല് MX1, MX2 PRO, MX3, AX5 വകഭേദങ്ങളില് 111 എച്ച്പി, 1.2 ലീറ്റര് ടര്ബോ പെട്രോള് എന്ജിനാണ് നല്കിയിരിക്കുന്നത്. 6 സ്പീഡ് മാനുവല് ഗിയര്ബോക്സാണ് ഈ മോഡലുകളില്. ഇന്ധനക്ഷമത 18.89 കിമി. 6 സ്പീഡ് ടോര്ക്ക് കണ്വെര്ട്ടര് ഓപ്ഷന് സ്വീകരിച്ചാല് ഇന്ധനക്ഷമത 17.96 കിലോമീറ്ററായി കുറയും.
117 എച്ച്പി, 1.5 ലീറ്റര് ഡീസല് എന്ജിനില് 6 സ്പീഡ് മാനുവല്(ഇന്ധനക്ഷമത 20.6കിമി) 6 സ്പീഡ് എഎംടി(ഇന്ധനക്ഷമത 21.2 കിമി) ഓപ്ഷനുകള്. ഓട്ടമാറ്റിക് വകഭേദത്തിന് മാനുവലിനെ അപേക്ഷിച്ച് 80,000 രൂപയോളം കൂടുതലാണ്. AX5L മുതല് മുകളിലേക്കുള്ള വകഭേദങ്ങളില് കൂടുതല് കരുത്തുള്ള 131 എച്ച്പി, 1.2 ലീറ്റര് ഡയറക്ട് ഇന്ജക്ഷന് ടര്ബോ പെട്രോള് എന്ജിനാണ്. 6 സ്പീഡ് ടോര്ക് കണ്വെര്ട്ടര് ഓട്ടമാറ്റിക്(ഇന്ധനക്ഷമത 18.2 കിമി), 6 സ്പീഡ് മാനുവല്(ഇന്ധനക്ഷമത 20.1 കിമി) ഓപ്ഷനുകള്. ഓട്ടമാറ്റിക്കിന് 1.5 ലക്ഷം രൂപ കൂടുതലാണ്.