പെട്രോളേ വിട, ഡീസലേ വിട... കുഞ്ഞൻ ഇലക്ട്രിക് വാഹനത്തിൽ മീനാക്ഷി

എംജിയുടെ ചെറു ഇലക്ട്രിക് കാർ സ്വന്തമാക്കി മീനാക്ഷി അനൂപ്. ബാലതാരമായും അവതാരികയായും തിളങ്ങുന്ന മീനാക്ഷി, പുതിയ വാഹനം സ്വന്തമാക്കിയ വിവരം സമൂഹമാധ്യമങ്ങളിലൂടെയാണ് ആരാധകരെ അറിയിച്ചത്. ഇനി കുതിക്കാൻ വെമ്പുന്ന...പെട്രോളെ... വിട... ഡീസലെ... വിട... എന്ന കുറിപ്പോടെയാണ് വാഹനത്തിന്റെ ചിത്രങ്ങൾ താരം പങ്കുവെച്ചിരിക്കുന്നത്. 

എംജി ഇന്ത്യൻ വിപണിയിലെത്തിക്കുന്ന രണ്ടാമത്തെ ഇലക്ട്രിക് കാറാണ് കോമറ്റ്. കഴിഞ്ഞ വർഷം മെയ് മാസത്തിലാണ് കോമറ്റിന്റെ എംജി ഇന്ത്യൻ വിപണിയിൽ എത്തിച്ചത്. ഇന്ത്യയിൽ ഏറ്റവും കുറഞ്ഞ വിലയുള്ള ഇലക്ട്രിക് കാറാണ് കോമറ്റ്. എക്‌സ്‌ക്ലൂസീവ്, എക്‌സൈറ്റ്, എക്‌സിക്യൂട്ടീവ് എന്നീ വേരിയന്റുകളുള്ള ഇലക്ട്രിക് വാഹനത്തിന് 6.98 ലക്ഷം രൂപ മുതല്‍ 9.23 ലക്ഷം രൂപ വരെയാണ് എക്‌സ്‌ഷോറൂം വില. ഇതില്‍ ഏത് വേരിയന്റാണ് മീനാക്ഷി സ്വന്തമാക്കിയത് എന്ന കാര്യത്തില്‍ വ്യക്തതയില്ല.

ഒറ്റത്തവണ ചാര്‍ജ് ചെയ്താല്‍ 230 കിലോമീറ്റര്‍ റേഞ്ച് കോമറ്റിന് ലഭിക്കും. 17.3 കിലോവാട്ട് അവര്‍ ശേഷിയുള്ള ഇലക്ട്രിക് ബാറ്ററിയാണ് ഇതിലുള്ളത്. 42 പിഎസ് കരുത്തും 110 എന്‍എം ടോര്‍ക്കുമേകുന്ന ഇലക്ട്രിക് മോട്ടോറാണ് ഈ വാഹനത്തിലുള്ളത്. 2974 എംഎം നീളവും 1505 എംഎം വീതിയും 1640 എംഎം ഉയരവും 2010 എംഎം വീല്‍ബേസുമുള്ള ചെറുകാറാണ് കോമറ്റ്. എം.ജി. വാഹനങ്ങളുടെ മുഖമുദ്രയായ കണക്ടഡ് ഫീച്ചറുകള്‍ ഉള്‍പ്പെടെയുള്ള നിരവധി ഫീച്ചറുകൾ ഈ കുഞ്ഞന്‍ വാഹനത്തില്‍ നല്‍കിയിട്ടുണ്ട്.