മഴക്കാലത്ത് ഈ അഭ്യാസം വേണ്ട; നിയന്ത്രണം നഷ്ടപ്പെട്ട എസ്‌യുവി അപകടത്തില്‍- വിഡിയോ

മഴക്കാലമാണ്, നനഞ്ഞറോഡിൽ വാഹനങ്ങൾക്കു നിയന്ത്രണം നഷ്ടപ്പെടുകയും തെന്നി നീങ്ങി അപകടങ്ങൾ സംഭവിക്കുകയും ചെയ്യുന്ന നിരവധി വിഡിയോകളും വാർത്തകളും സമൂഹ മാധ്യമങ്ങളിലൂടെ നാം കാണുന്നുണ്ട്. ഇക്കഴിഞ്ഞ ദിവസം അത്തരത്തിൽ അപകടത്തിൽപ്പെടുകയും ഇലക്ട്രിക് പോസ്റ്റിൽ ഇടിച്ച് സാരമായ രീതിയിൽ നാശനഷ്ടങ്ങളുണ്ടാകുകയും ചെയ്ത എസ് യു വിയുടെ അപകട വിഡിയോയാണ് സോഷ്യൽ ലോകത്തിന്റെ ശ്രദ്ധയിൽപ്പെട്ടിരിക്കുന്നത്. 

റോഡരികിൽ സ്ഥാപിച്ചിട്ടുള്ള സിസിടിവിയിൽ പതിഞ്ഞ ദൃശ്യങ്ങൾ വ്യാപകമായ രീതിയിൽ സമൂഹമാധ്യമങ്ങളിൽ പ്രചരിക്കുന്നുണ്ട്. മഴ പെയ്യുകയും റോഡിന്റെ ഉപരിതലം നനഞ്ഞു കിടക്കുന്നതും വിഡിയോയിൽ കാണാൻ കഴിയും. റോഡിൽ അധികം വാഹനങ്ങൾ ഇല്ല എന്നത് കൊണ്ടുതന്നെ വലിയ അപകടമാണ് ഒഴിവായത്. ബസിനെ മറികടന്നു വരാനുള്ള ശ്രമത്തിനിടയിൽ നിയന്ത്രണം നഷ്ടപ്പെട്ട എസ് യു വി തെന്നി നീങ്ങി റോഡിന് അരികിലെ ഇലക്ട്രിക് പോസ്റ്റിൽ ഇടിച്ച് തകർന്നു.  

വാഹനം അമിത വേഗത്തിലായിരുന്നു എന്നത് തന്നെയാണ് അപകടത്തിന്റെ പ്രധാന കാരണങ്ങളിലൊന്ന്. ഇടിയുടെ ആഘാതത്തിൽ വാഹനത്തിന്റെ മുൻഭാഗം പൂർണമായും തകർന്നു എന്നുള്ളത് ദൃശ്യങ്ങളിൽ വ്യക്തമാണ്. അമിത വേഗവും നനഞ്ഞ റോഡും അപകടങ്ങളിലേക്കു വഴി തുറക്കുമെന്നതു വാഹനം ഓടിക്കുന്ന ഏതൊരു വ്യക്തിയും മനസിലാക്കേണ്ട പ്രാഥമിക പാഠങ്ങളിലൊന്നാണ്. ഇത്തരം സാഹചര്യങ്ങളിൽ വാഹനം വേഗം കുറച്ച് ഓടിക്കണം. അല്ലാത്തപക്ഷം നിയന്ത്രണം നഷ്ടപ്പെടാനും തെന്നി നീങ്ങാനും അപകടങ്ങൾക്കും സാധ്യതയുണ്ട്.

∙ എന്താണ് ഹൈഡ്രോപ്ലെയിനിങ്?

നിരത്തുകളിൽ വാഹനത്തിന്റെ മുന്നോട്ടുള്ള കുതിപ്പും (Traction) ബ്രേക്കിങ്ങും സ്‌റ്റീയറിങ് ആക്‌ഷനുകളും എല്ലാം വാഹനത്തിലെ യാന്ത്രികമായ ഭാഗങ്ങളുടെ പ്രവർത്തനം മൂലമാണെങ്കിലും അന്തിമമായി പ്രവർത്തന പഥത്തിലേക്കെത്തുന്നത് ടയറും റോഡും തമ്മിലുള്ള ഘർഷണം മൂലമാണ് (ഓർക്കുക, മിനുസമുള്ള തറയിൽ എണ്ണ ഒഴിച്ചാൽ നമുക്ക് നടക്കാൻ പോലും കഴിയാത്തതും ഈ ഘർഷണത്തിന്റെ അഭാവമാണ്). 

വെള്ളം കെട്ടി നിൽക്കുന്ന റോഡിൽ വേഗത്തിൽ വാഹനം ഓടിക്കുമ്പോൾ ടയറിന്റെ പമ്പിങ് ആക്‌ഷൻ മൂലം ടയറിന്റെ താഴെ വെള്ളത്തിന്റെ ഒരു പാളി രൂപപ്പെടുന്നു. സാധാരണ ഗതിയിൽ ടയർ റോഡിൽ സ്പർശിക്കുന്നിടത്തെ ജലം ടയറിന്റെ ത്രെഡിന്റെ സഹായത്തോടെ (Impeller action) ചാലുകളിൽ കൂടി (Spill way) പമ്പ് ചെയ്ത് കളഞ്ഞ്, ടയറും റോഡും തമ്മിലുള്ള Contact നിലനിർത്തും. എന്നാൽ ടയറിന്റെ വേഗം (Peripheral speed) കൂടുന്തോറും പമ്പ് ചെയ്ത് പുറന്തള്ളാൻ കഴിയുന്ന അളവിനേക്കാൾ കൂടുതൽ വെള്ളം ടയറിനും റോഡിനും ഇടയിലേക്ക് അതിമർദ്ദത്തിൽ ട്രാപ് ചെയ്യപ്പെടുകയും വെള്ളം കംപ്രസിബിൾ അല്ലാത്തതുകൊണ്ടുതന്നെ ഈ മർദ്ദം മൂലം ടയർ റോഡിൽനിന്ന് ഉയരുകയും ചെയ്യും.അങ്ങിനെ ടയറിന്റെയും റോഡിന്റെയും ബന്ധം വിച്ഛേദിക്കുന്ന അത്യന്തം അപകടകരമായ പ്രതിഭാസമാണ് ഹൈഡ്രോപ്ലെയിനിങ് അഥവാ അക്വാപ്ലെയിനിങ്.

റോഡും ടയറുമായുള്ള സമ്പർക്കം വേർപെടുന്നതോടു കൂടി ബ്രേക്കിന്റെയും സ്റ്റിയറിങ്ങിന്റെയും ആക്സിലറേറ്ററിന്റെയും പ്രവർത്തനം സാധ്യമല്ലാതെ വരികയും വാഹനത്തിന്റെ നിയന്ത്രണം പൂർണമായും ഡ്രൈവർക്കു നഷ്ടമാകുകയും ചെയ്യും. തന്മൂലം വാഹനം നിയന്ത്രണം നഷ്ടപ്പെട്ട് തെന്നി മറിയുന്നതിന് ഇടയാക്കും.വാഹനത്തിന്റെ വേഗം വർധിക്കുന്നതോടു കൂടി ഹൈഡ്രോപ്ലെയിനിങ് സാധ്യതയും കൂടുന്നു. മാത്രമല്ല, തേയ്മാനം മൂലം ടയറിന്റെ സ്പിൽവേയുടെ കനം (groove) കുറയുന്നതോടെ പമ്പിങ് കപ്പാസിറ്റി കുറയുന്നതും അക്വാപ്ലെയിനിങ്ങിനു കാരണമാകും.ത്രെഡ് ഡിസൈൻ അനുസരിച്ചും വാഹനത്തിന്റെ തൂക്കം കൂടുന്നതനുസരിച്ചും ഹൈഡ്രോപ്ലെയിനിങ്ങിൽ ചെറിയ മാറ്റങ്ങൾ ഉണ്ടാകാം.

ഹൈഡ്രോപ്ലെയിനിങ്ങിനെ ബാധിക്കുന്ന പ്രധാന ഘടകങ്ങൾ ഇവയാണ്

1. വേഗം-വേഗം തന്നെയാണ് ഏറ്റവും പ്രധാന ഘടകം

2. ത്രെഡ് ഡിസൈൻ-ചില ത്രെഡ് ഡിസൈനുകൾ ഹൈഡ്രോപ്ലെയിനിങ്ങിന് സഹായകരമാകും.

3. ടയർ സൈസ്-സർഫസ് ഏരിയ കൂടുന്നത് ഹൈഡ്രോപ്ലെയിനിങ് കുറയ്ക്കും.

4. എയർ പ്രഷർ-ഓവർ ഇൻ ഫ്ളേഷൻ അക്വാപ്ലെയിനിങ്ങിന് സാധ്യത കൂട്ടും.

5. ജലപാളിയുടെ കനം

6. വാഹനത്തിന്റെ തൂക്കം- തൂക്കം കൂടുന്നതിനനുസരിച്ച് ഹൈഡ്രോ പ്ലെയിനിങ് കുറയും.

7. റോഡ് പ്രതലത്തിന്റെ സ്വഭാവം-മിനുസവും ഓയിലിന്റെ സാന്നിധ്യവും ഹൈഡ്രോപ്ലെയിനിങ്ങിനെ വർധിപ്പിക്കും..

നിയന്ത്രണം നഷ്ടമായാൽ

ഹൈഡ്രോപ്ലെയിനിങ് മൂലം വാഹനത്തിന്റെ നിയന്ത്രണം നഷ്ടമായാൽ ഉടൻ ആക്സിലറേറ്ററിൽനിന്ന് കാൽ പിൻവലിക്കണം. സഡൻ ബ്രേക്കിങ്ങും സ്റ്റിയറിങ് വെട്ടിത്തിരിക്കുന്നതും ഒഴിവാക്കുകയും വേണം.ജലപാളി പ്രവർത്തനം (ഹൈഡ്രോപ്ലെയിനിങ്) തടയുന്നതിന് ശ്രദ്ധിക്കേണ്ട കാര്യങ്ങളിൽ ഏറ്റവും പ്രധാനം, വാഹനത്തിന്റെ വേഗം കുറയ്ക്കുക എന്നതു തന്നെയാണ്, പ്രത്യേകിച്ച് വെള്ളം കെട്ടിക്കിടക്കുകയും ഒഴുകുകയും ചെയ്യുന്ന റോഡുകളിൽ (നല്ല വേഗത്തിന് സാധ്യതയുള്ള ഹൈവേകളിലെ ചില ഭാഗത്ത് മാത്രമുള്ള വെള്ളക്കെട്ട് വളരെയധികം അപകടകരമാണ്). കൂടാതെ ജലം സ്പിൽവേയ്ക്ക് സഹായിക്കുന്ന ത്രെഡ് പാസ്സേജുകൾ തേയ്മാനം സംഭവിച്ച ടയറുകൾ ഒഴിവാക്കണം. ശരിയായി ഇൻഫ്ളേറ്റ് ചെയ്യുകയും നനഞ്ഞ റോഡിൽ ക്രൂസ് കൺട്രോൾ ഒഴിവാക്കുകയും ചെയ്യണം.