വീണ്ടും ഇലക്ട്രിക് സ്കൂട്ടറിന് തീപിടിച്ചു; വിളപ്പിൽശാലയിൽ ഓല കത്തിനശിച്ചു; വിഡിയോ

തിരുവനന്തപുരം വിളപ്പിൽശാലയിൽ ഓല സ്കൂട്ടറിന് തീപിടിച്ച് കത്തി നശിച്ചു. ഓടിക്കൊണ്ടിരുന്ന സ്കൂട്ടറിന് കടുത്ത ചൂട് അനുഭവപ്പെട്ടപ്പോൾ യാത്രക്കാരൻ വാഹനം റോഡിന് വശത്തേയ്ക്ക് നിർത്തിയതോടെ വാഹനത്തിൽ തീ പടരുകയായിരുന്നു. 

സ്കൂട്ടർ നിർത്തിയ ഉടനെ കൂടുതൽ പുക ഉയരുകയും വാഹനം കത്തുകയുമായിരുന്നു. കാട്ടാക്കടയിൽ നിന്നും ഫയര്‍ യൂണിറ്റ് എത്തിയാണ് തീ കെടുത്തിയത്. ആർക്കും പരുക്കുകളില്ല, എന്നാൽ സ്കൂട്ടർ പൂർണമായും കത്തിനശിച്ചു. 2021 ൽ വിപണിയലെത്തിയ ഓല സ്കൂട്ടർ രാജ്യത്ത് ഏറ്റവും അധികം വിൽക്കുന്ന ഇലക്ട്രിക് സ്കൂട്ടറുകളിലൊന്നാണ്.

ഇതിന് മുമ്പും ഓലയുടെ സ്കൂട്ടറുകൾക്ക് തീപിടിച്ചിട്ടുണ്ട്. നേരത്തെ മലപ്പുറത്തും ഓല സ്കൂട്ടറിന് തീടിപിച്ച് കത്തി നശിച്ചിരുന്നു. അന്ന് ഒല എസ്1 പ്രൊയ്ക്കായിരുന്നു തീപിടിച്ചത്. രാത്രി ചാര്‍ജു ചെയ്യുന്നതിനിടെയായിരുന്നു സംഭവം.