കുട്ടികളെ ലൈംഗികമായി പീഡിപ്പിച്ച കേസിലെ പ്രതി 27 വർഷത്തിന് ശേഷം പിടിയിൽ

ലണ്ടൻ∙ കുട്ടികളെ ലൈംഗികമായി പീഡിപ്പിച്ച സംഭവത്തിൽ 27 വർഷമായി  ഒളിവിൽ കഴിഞ്ഞിരുന്ന പ്രതി പിടിയിൽ. റിച്ചഡ് ബറോസ് (80) ആണ് പിടിയിലായത്. 1997 ൽ ചെസ്റ്റർ ക്രൗൺ കോടതിയിൽ ‌വിചാരണ തുടങ്ങിയ കാലം മുതൽ പ്രതി കോടതിയിൽ ഹാജരായിരുന്നില്ല. വ്യാഴാഴ്ച ഹീത്രൂ വിമാനത്താവളത്തിൽ നിന്നാണ് പ്രതിയെ അറസ്റ്റ് ചെയ്തതെന്ന്  ചെഷയർ പൊലീസ് അറിയിച്ചു. തായ്​ലൻഡിൽ നിന്നും യുകെയിലേക്ക് മടങ്ങിവരുന്നതിനിടെയാണ് പ്രതിയെ പൊലീസ് പിടികൂടിയത്. 

1969 നും 1971 നും ഇടയിലാണ് കേസിന് ആസ്പദമായ സംഭവം നടന്നത്. കോൺഗ്ലിറ്റണിലെ കുട്ടികളുടെ ഭവനത്തിലും   വെസ്റ്റ് മിഡ്‌ലാൻഡിലുമാണ് പ്രതി കുറ്റം നടത്തിയതെന്ന് പൊലീസ് പറയുന്നു. 13 കേസുകളാണ് പ്രതിക്കെതിരെ ചുമത്തിയിരിക്കുന്നത്.