ഒഐസിസി യുകെ സംഘടിപ്പിച്ച ഉമ്മൻ‌ ചാണ്ടി അനുസ്മരണം വികാരനിർഭരമായി

മാഞ്ചസ്റ്റർ ∙ ഉമ്മൻ ചാണ്ടിയുടെ ദീപ്ത ഓർമകൾക്ക് മുന്നിൽ പ്രണാമം അർപ്പിച്ചു ഒഐസിസി (യു കെ) നോർത്ത് വെസ്റ്റ് റീജൻ മാഞ്ചസ്റ്ററിലെ ക്രംസാൽ സെന്റ്. ആൻസ് പാരിഷ് ഹാളിൽ 'നീതിമാന്റെ ഓർമകൾക്ക് പ്രണാമം' എന്ന തലക്കെട്ടിൽ സംഘടിപ്പിച്ച അനുസ്മരണ സമ്മേളനം വികാരനിർഭരമായി. 

മാഞ്ചസ്റ്ററിലെ വിവിധ യൂണിറ്റികളിൽ നിന്നും എത്തിച്ചേർന്ന പ്രവർത്തകരും ഉമ്മൻ ചാണ്ടിയെ ഇന്നും ഹൃദയത്തിൽ സൂക്ഷിക്കുന്ന സുമനസുകളും അദ്ദേഹത്തിന്റെ ഛായചിത്രത്തിന് മുന്നിൽ പുഷ്പാർച്ചന അർപ്പിച്ചു.

ഒഐസിസി യുകെ ഉമ്മൻ‌ ചാണ്ടി അനുസ്മരണം

ഒഐസിസി (യുകെ) വർക്കിങ് പ്രസിഡന്റ്  ഷൈനു ക്ലെയർ മാത്യൂസ് അനുസ്മരണ സമ്മേളനം ഉദ്ഘാടനം ചെയ്‌തു. ഒഐസിസി നോർത്ത് വെസ്റ്റ് റീജൻ പ്രസിഡന്റ്‌   സോണി ചാക്കോ അധ്യക്ഷത വഹിച്ചു.  റോമി കുര്യാക്കോസ് സ്വാഗതം ആശംസിച്ചു. 

ഒഐസിസി നോർത്ത് വെസ്റ്റ് റീജിൻ സെക്രട്ടറി  പുഷ്പരാജൻ,  ഷാജി ഐപ്പ്, ബേബി ലൂക്കോസ്,  ജിതിൻ തുടങ്ങിയവരും അനുസ്മരണ സന്ദേശങ്ങൾ നൽകി. ഉമ്മൻ ചാണ്ടിയുടെ ഓർമ്മകൾ കോർത്തിണക്കി ഒരുക്കിയ ഗാനാർച്ചനയോടെ അനുസ്മരണ സമ്മേളനം സമാപിച്ചു.