വിവേചനവും ‘സെനോഫോബിയ’യും: കുടിയേറ്റക്കാര്‍ നേരിടുന്ന വെല്ലുവിളികൾ

ബർലിൻ∙ കഴിഞ്ഞ ദശകങ്ങളിൽ ലോകത്തെ പല രാജ്യങ്ങളിലും വലതുപക്ഷ രാഷ്ട്രീയ പാർട്ടികൾ ശക്തി പ്രാപിച്ചുകൊണ്ടിരിക്കുന്നു. ജർമനി ഇതിന് ഒരു ഉദാഹരണമാണ്. ഈ പാർട്ടികൾ പലപ്പോഴും ദേശീയത, യാഥാസ്ഥിതികത്വം എന്നീ ആശയങ്ങളെ മുൻനിർത്തിയാണ് പ്രവർത്തിക്കുന്നത്.

∙ കുടിയേറ്റവും വലതുപക്ഷ ഉയർച്ചയും
വലതുപക്ഷ പാർട്ടികളുടെ ഉയർച്ചയ്ക്ക് പിന്നിലെ പ്രധാന കാരണങ്ങളിലൊന്ന് വർധിച്ചുവരുന്ന വിദേശ കുടിയേറ്റമാണ്. പല രാജ്യങ്ങളിലെയും തദ്ദേശീയർ കുടിയേറ്റക്കാർ തങ്ങളുടെ സംസ്കാരം, പാരമ്പര്യങ്ങൾ എന്നിവയ്ക്ക് ഭീഷണിയാകുമെന്ന ഭയം പ്രകടിപ്പിക്കുന്നു. കൂടിയാതെ, കുടിയേറ്റം സൃഷ്ടിക്കുന്ന സാമൂഹിക, സാമ്പത്തിക പ്രശ്നങ്ങളെക്കുറിച്ചുള്ള ആശങ്കകളും ഇതിന് കാരണമാകുന്നു.

∙ ഇന്ത്യൻ സമൂഹത്തിനുള്ള വെല്ലുവിളികൾ
ജർമനിയിലെ ഇന്ത്യൻ സമൂഹത്തിന് ഈ സാഹചര്യം ഗണ്യമായ വെല്ലുവിളികൾ ഉയർത്തുന്നു. വലതുപക്ഷ പാർട്ടികളുടെ ഉയർച്ച ഇന്ത്യൻ കുടിയേറ്റക്കാർക്കെതിരായ വിദ്വേഷ പ്രവർത്തനങ്ങൾക്ക് കാരണമാകാം. കൂടാതെ, ഇന്ത്യക്കാർ തങ്ങളുടെ സമൂഹത്തിൽ സുരക്ഷിതരാണെന്ന തോന്നൽ നഷ്ടപ്പെടാനും ഇടയാക്കും. കുടിയേറ്റം സൃഷ്ടിക്കുന്ന സാമ്പത്തിക ഭാരവും ദേശീയ സുരക്ഷയെക്കുറിച്ചുള്ള ആശങ്കകളും വലതുപക്ഷ രാഷ്ട്രീയത്തിന്‍റെ ഉയർച്ചയ്ക്ക് പ്രധാന ഇന്ധനമായിട്ടുണ്ട്.

∙ സാമ്പത്തിക ഭാരം
 പല പൗരന്മാരും വിശ്വസിക്കുന്നത്, കുടിയേറ്റക്കാർ പ്രാദേശിക ജോലികൾ അപഹരിക്കുകയും പൊതു സേവനങ്ങളിൽ സമ്മർദ്ദം ചെലുത്തുകയും ചെയ്യുന്നു എന്നാണ്. സമ്പദ്‌വ്യവസ്ഥ പ്രതിസന്ധി നേരിടുമ്പോൾ ഈ ആശങ്കകൾ കൂടുതൽ ശക്തിപ്പെടുന്നു. തദ്ദേശീയർക്ക് ജോലിയും വിഭവങ്ങളും ലഭ്യമാക്കുമെന്ന് വാഗ്ദാനം ചെയ്യുന്ന വലതുപക്ഷ പാർട്ടികൾ ഈ സാഹചര്യത്തിൽ വോട്ടർമാരെ ആകർഷിക്കുന്നു.

∙ ദേശീയ സുരക്ഷ
 ഭീകരാക്രമണം, കുറ്റകൃത്യം തുടങ്ങിയ സംഭവങ്ങൾ വലതുപക്ഷ പാർട്ടികൾക്ക് തങ്ങളുടെ വാദങ്ങൾക്ക് ബലം നൽകാൻ ഉപയോഗിക്കുന്നു. കുടിയേറ്റക്കാരെ ഈ സംഭവങ്ങളുമായി ബന്ധപ്പെടുത്തി ചിത്രീകരിക്കുന്നത് മുഖേന, ദേശീയ സുരക്ഷയെക്കുറിച്ചുള്ള ഭയം വർധിപ്പിക്കുകയും വലതുപക്ഷത്തെ പിന്തുണയിലേക്ക് നയിക്കുകയും ചെയ്യുന്നു.

മെച്ചപ്പെട്ട ജീവിതം തേടിയുള്ള മനുഷ്യന്‍റെ സ്വാഭാവിക പ്രവണതയാണ് കുടിയേറ്റം. സാമ്പത്തിക അവസരങ്ങൾ, സുരക്ഷ, വിദ്യാഭ്യാസം എന്നിവയുടെ അന്വേഷണത്തിലാണ് പലരും തങ്ങളുടെ ജന്മദേശം വിടുന്നത്. രാഷ്ട്രീയ അസ്ഥിരത, യുദ്ധം, ദാരിദ്ര്യം തുടങ്ങിയ പ്രശ്നങ്ങൾ നേരിടുന്ന രാജ്യങ്ങളിൽ നിന്നുള്ളവരാണ് പല കുടിയേറ്റക്കാരും.

∙ കുടിയേറ്റത്തിന്‍റെ ഗുണങ്ങളും ദോഷങ്ങളും​
കുടിയേറ്റം സ്വീകരിക്കുന്ന രാജ്യത്തിന്‍റെ സമ്പദ്‌വ്യവസ്ഥയ്ക്ക് ഗുണകരമായ പല മാറ്റങ്ങളും കൊണ്ടുവരാറുണ്ട്. തൊഴിൽ വിപണിയിലെ വിടവുകൾ നികത്തൽ, സാമ്പത്തിക വളർച്ച, സാംസ്കാരിക വൈവിധ്യം എന്നിവ ഇതിൽ ചിലത്. എന്നാൽ അതേസമയം, ദ്രുതഗതിയിലുള്ള കുടിയേറ്റം സാമൂഹിക പിരിമുറുക്കങ്ങൾക്ക് കാരണമാകുകയും പ്രാദേശിക സമൂഹത്തിലെ സേവനങ്ങളിൽ സമ്മർദ്ദം ചെലുത്തുകയും ചെയ്യാം.

∙ സാംസ്കാരിക ആശങ്കകളും ദേശീയ സുരക്ഷയും
കുടിയേറ്റത്തിന്‍റെ ഏറ്റവും വലിയ വിമർശനം അത് സ്വീകരിക്കുന്ന രാജ്യത്തിന്‍റെ സാംസ്കാരിക സ്വത്വത്തെ ദുർബലപ്പെടുത്തുമെന്നുള്ളതാണ്. വിവിധ സംസ്കാരങ്ങളിൽ നിന്നുള്ള ആളുകൾ ഒരേ മൂല്യങ്ങളും വിശ്വാസങ്ങളും പങ്കിടുന്നില്ലെന്നും പ്രാദേശിക സമൂഹവുമായി ഇഴുകിച്ചേരാൻ തയ്യാറല്ലെന്നും പലരും വിശ്വസിക്കുന്നു.

കൂടാതെ, ഭീകരാക്രമണം, കുറ്റകൃത്യം തുടങ്ങിയ സംഭവങ്ങളുമായി കുടിയേറ്റത്തെ ബന്ധപ്പെടുത്തി ചിത്രീകരിക്കുന്നത് മുഖേന, ദേശീയ സുരക്ഷയെക്കുറിച്ചുള്ള ഭയം വർധിപ്പിക്കുകയും വലതുപക്ഷ രാഷ്ട്രീയ പാർട്ടികളുടെ ഉയർച്ചയ്ക്ക് കാരണമാകുകയും ചെയ്യുന്നു.

തീവ്ര വലതുപക്ഷ ഗ്രൂപ്പുകൾ കുടിയേറ്റത്തെ എതിർക്കുന്നതിനായി കൈക്കൊള്ളുന്ന കടുത്ത നടപടികൾ ഗുരുതരമായ ആശങ്കകൾ ഉയർത്തുന്നു. ശത്രുതാപരമായ പ്രചാരണങ്ങൾ മുതൽ നേരിട്ടുള്ള അക്രമങ്ങൾ വരെ, ഈ പ്രവർത്തനങ്ങൾ സമൂഹങ്ങളെ ധ്രുവീകരിക്കുകയും ഭയത്തിന്റെ അന്തരീക്ഷം സൃഷ്ടിക്കുകയും ചെയ്യുന്നു. ലോകത്തിലെ ഏറ്റവും വലിയ കുടിയേറ്റ സമൂഹങ്ങളിലൊന്നായ ഇന്ത്യൻ സമൂഹം ഈ പ്രവണതകളുടെ പ്രത്യാഘാതങ്ങൾ നേരിട്ട് അനുഭവിക്കുന്നു.

∙  വർധിച്ച വിവേചനവും സെനോഫോബിയയും
​കുടിയേറ്റ വിരുദ്ധ വികാരങ്ങൾ ശക്തിപ്പെടുന്നതോടെ, വിദേശത്തുള്ള ഇന്ത്യക്കാർക്ക് നേരിടേണ്ടി വരുന്ന വിവേചനം, മുൻവിധികൾ, വിദ്വേഷ പ്രവർത്തനങ്ങൾ എന്നിവ ഗുരുതരമായ ആശങ്കയാണ്. രാജ്യത്ത് എത്ര കാലം താമസിച്ചാലും, എത്ര നന്നായി പ്രാദേശിക സംസ്കാരവുമായി ഇഴുകിച്ചേർന്നാലും, ഇന്ത്യക്കാർ പലപ്പോഴും 'പുറത്തു നിന്നുള്ളവർ'  എന്ന നിലയിലാണ് കാണപ്പെടുന്നത്. ( സെനോഫോബിയ – വംശം, ദേശീയത, മതം അല്ലെങ്കിൽ സംസ്കാരം എന്നിവയുടെ അടിസ്ഥാനത്തിൽ തന്നിൽ നിന്ന് വ്യത്യസ്തരായി കരുതപ്പെടുന്ന ആളുകളോടുള്ള അനാവശ്യമായ ഭയം, വെറുപ്പ് അല്ലെങ്കിൽ അവിശ്വാസത്തെ വിശേഷിപ്പിക്കുന്ന പദമാണ്  സെനോഫോബിയ) 

∙ തൊഴിൽ സാധ്യതകളിലെ വെല്ലുവിളികൾ
വലതുപക്ഷ പാർട്ടികൾ പ്രാദേശിക തൊഴിലാളികൾക്ക് മുൻഗണന നൽകുന്ന നയങ്ങൾ സ്വീകരിക്കുന്നത് ഇന്ത്യക്കാർക്ക്, പ്രത്യേകിച്ച് താൽക്കാലിക വീസയിലുള്ളവർക്ക്, ജോലി ലഭിക്കുന്നതിനും ബിസിനസ് നടത്തുന്നതിനും വലിയ വെല്ലുവിളികൾ ഉയർത്തുന്നു. തൊഴിൽ വിപണിയിൽ കടുത്ത മത്സരം ഉണ്ടാകുകയും, ജോലി നഷ്ടപ്പെടാനുള്ള സാധ്യത വർധിക്കുകയും ചെയ്യും. ഇത് അവരുടെ സാമ്പത്തിക സ്ഥിരതയെ ബാധിക്കുകയും, ഭാവിയിലെ വളർച്ചയ്ക്കുള്ള അവസരങ്ങൾ നഷ്ടപ്പെടുത്തുകയും ചെയ്യും.

∙ കർശന ഇമിഗ്രേഷൻ നയങ്ങളുടെ പ്രത്യാഘാതങ്ങൾ
വലതുപക്ഷ പാർട്ടികളുടെ കർശന ഇമിഗ്രേഷൻ നയങ്ങൾ ഇന്ത്യക്കാർക്ക് ജോലിക്കോ പഠനത്തിനോ അല്ലെങ്കിൽ കുടുംബാംഗങ്ങളുമായി ഒന്നിക്കുന്നതിനോ വേണ്ടി കുടിയേറുന്നത് ബുദ്ധിമുട്ടാക്കും. വിസ നടപടിക്രമങ്ങളിലെ കാലതാമസം, വർദ്ധിച്ച സുരക്ഷാ പരിശോധനകൾ എന്നിവ ഇന്ത്യക്കാർക്ക് വലിയ തലവേദനയായിരിക്കും.

∙ സാംസ്കാരിക സ്വാതന്ത്ര്യത്തിലെ നിയന്ത്രണങ്ങൾ
വലതുപക്ഷ പാർട്ടികൾ പലപ്പോഴും ഒറ്റ ദേശീയ സംസ്കാരത്തെ പ്രോത്സാഹിപ്പിക്കുന്നതിനാൽ, മൾട്ടികൾച്ചറലിസത്തോട് സഹിഷ്ണുത കുറവായിരിക്കും. ഇത് ഇന്ത്യക്കാർക്ക് അവരുടെ സാംസ്കാരികവും മതപരവുമായ പാരമ്പര്യങ്ങൾ സ്വതന്ത്രമായി ആചരിക്കുന്നതിന് വിലക്കുകളും നിയന്ത്രണങ്ങളും നേരിടേണ്ടി വരും.

സമീപകാലത്ത്, വിദേശത്തുള്ള ഇന്ത്യക്കാർ ഉൾപ്പെടെയുള്ള കുടിയേറ്റക്കാർ തങ്ങളുടെ ആതിഥേയ രാജ്യങ്ങളിൽ പ്രതിഷേധങ്ങളും പ്രകടനങ്ങളും നടത്തുന്നത് സർവ്വസാധാരണമായിരിക്കുന്നു. തങ്ങളുടെ ജന്മദേശത്തെ സംഭവങ്ങളിൽ ഇടപെടുകയും അവരുടെ അവകാശങ്ങൾക്കായി പോരാടുകയും ചെയ്യുന്നത് ഇവരുടെ ലക്ഷ്യമാണ്. എന്നാൽ ഈ പ്രതിഷേധങ്ങൾ പലപ്പോഴും വിവാദങ്ങൾക്ക് വഴി തെളിക്കുകയും ആതിഥേയ രാജ്യത്തെ സർക്കാരുകളെയും ജനങ്ങളെയും അസ്വസ്ഥരാക്കുകയും ചെയ്യുന്നു.

 ഇത്തരം പ്രതിഷേധങ്ങൾ ആതിഥേയ രാജ്യങ്ങളിലെ സർക്കാരുകളെ അസ്വസ്ഥരാക്കുകയും കർശന നിയമങ്ങൾ നടപ്പിലാക്കാൻ ഇടയാക്കുകയും ചെയ്യും. പ്രാദേശിക ജനങ്ങളുമായി സംഘർഷം ഉണ്ടാകാനും സാധ്യതയുണ്ട്. ഇത് കുടിയേറ്റ നിയമങ്ങൾ കൂടുതൽ കർശനമാക്കുന്നതിലേക്ക് നയിച്ചേക്കാം. രാജ്യാന്തര ബന്ധങ്ങളിൽ വിള്ളൽ വീഴുന്നതിനും ഇടയാക്കും.

ആതിഥേയ രാജ്യത്തിന്റെ നിയമങ്ങളും നിയമസമാധാനവും പാലിക്കണം. പ്രാദേശിക ജനങ്ങളുമായി സംവദിച്ച് തെറ്റിദ്ധാരണകൾ നീക്കം ചെയ്യണം. അക്രമാസക്തി ഒഴിവാക്കി സമാധാനപരമായ മാർഗങ്ങളിലൂടെ പ്രതിഷേധം രേഖപ്പെടുത്തണം. തങ്ങളുടെ ആശയങ്ങൾ പ്രതിനിധീകരിക്കുന്ന രാഷ്ട്രീയ പാർട്ടികളെ പിന്തുണയ്ക്കുന്നതിലൂടെ കുടിയേറ്റ സമൂഹത്തിന് പുതിയ രാജ്യത്തിൽ ഇഴുകി ചേരാൻ സാധിക്കും.