പുതിയ നിയമവുമായി ബഹ്റൈൻ; സ്‌കിൽ അസസ്‌മെന്റ് ടെസ്റ്റും യോഗ്യതാ പരീക്ഷയും പാസായില്ലെങ്കിൽ ജോലിയില്ല!

മനാമ ∙ രാജ്യത്ത് വിവിധ മേഖലകളിൽ ജോലി ചെയ്യുന്ന സാധാരണ തൊഴിലാളികൾക്കും ലൈസൻസ് നിർബന്ധമാക്കുന്ന നിയമം നടപ്പിലാക്കാൻ ബഹ്റൈൻ. ഈ നിയമം നടപ്പാക്കുന്നതോടെ തൊഴിലാളികളും യോഗ്യതാ പരീക്ഷ വിജയിച്ച് ലൈസൻസ് നേടേണ്ടതുണ്ട്. ലൈസൻസും സ്‌കിൽ അസസ്‌മെന്‍റ് ടെസ്റ്റിലെ പാസിങ് സ്‌കോറും ഇല്ലാതെ ഒരു തൊഴിലും ചെയ്യാൻ കഴിയില്ലെന്ന് തൊഴിൽ മന്ത്രി ജമീൽ ഹുമൈദാൻ വ്യക്തമാക്കി.

ലേബർ ഫണ്ട് (തംകീൻ), ലേബർ മാർക്കറ്റ് റെഗുലേറ്ററി അതോറിറ്റി (എൽഎംആർഎ), ബഹ്‌റൈൻ ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രി (ബിസിസിഐ) എന്നിവ ഉൾപ്പെടെയുള്ള വിവിധ വകുപ്പുകളുമായി കൂടിയാലോചിച്ചാണ് ഈ നിയമ ഭേദഗതി വരുത്താൻ തീരുമാനിച്ചിരിക്കുന്നത്.

സ്വകാര്യ കേന്ദ്രങ്ങൾ, സ്ഥാപനങ്ങൾ, സർവകലാശാലകൾ എന്നിവയ്ക്ക് യോഗ്യത നിർണയത്തിനും വിലയിരുത്തലിനും ലൈസൻസ് നൽകും. ആദ്യ ഘട്ടത്തിൽ ഈ നയം 25 ഓളം പ്രായോഗിക തൊഴിലുകൾ ഉൾപ്പെടെ നടപ്പിലാക്കും. ഇതിൽ വെൽഡർമാർ, ഇൻസുലേഷൻ ഇൻസ്റ്റാളർമാർ, തൊഴിൽ ആരോഗ്യവും സുരക്ഷയും ഉദ്യോഗസ്ഥരും ഉൾപ്പെടുന്നു. ടൈൽ ഇൻസ്റ്റാളറുകൾ, കൺസ്ട്രക്ഷൻ ഡീ-വാട്ടറിങ് സ്പെഷ്യലിസ്റ്റുകൾ, മരപ്പണിക്കാർ, കാർ മെക്കാനിക്കുകൾ, വിവിധ മെഷീനറി മെക്കാനിക്കുകൾ തുടങ്ങിയ കൂടുതൽ തൊഴിലുകൾ ഭാവിയിൽ ഈ പദ്ധതിയിൽ ഉൾപ്പെടുത്തും . യോഗ്യതാ വിലയിരുത്തലിൽ പരാജയപ്പെടുന്ന വിദേശ തൊഴിലാളികളുടെ വർക്ക് പെർമിറ്റ് റദ്ദാക്കപ്പെടും. ഈ നിയന്ത്രണം നടപ്പിലാക്കുന്നതിനുള്ള കൃത്യമായ തീയതി ഇതുവരെ പ്രഖ്യാപിച്ചിട്ടില്ല. യോഗ്യതാ മാനദണ്ഡങ്ങളുടെ  കരട് ചട്ടം അന്തിമ അനുമതിക്കായി ഉടൻ മന്ത്രിസഭയ്ക്ക് സമർപ്പിക്കുമെന്നാണ് കരുതുന്നത്. 

പാർലമെന്‍റിൽ എംപി അഹമ്മദ് അൽ സലൂമിന്റെ  ചോദ്യത്തിന് മറുപടിയായാണ്  മന്ത്രി ഈ നിയന്ത്രണത്തിന്റെ പ്രാധാന്യം വ്യക്താമാക്കിയത്. തൊഴിൽ വിപണിയിൽ വലിയൊരു വിഭാഗം  തൊഴിലാളികൾ മേൽപ്പറഞ്ഞ  25ഓളം മേഖലകളിൽ  ജോലി ചെയ്യുന്നു, ഇവരിൽ  അനുയോജ്യമായ തൊഴിലാളികളെ  തിരിച്ചറിയുന്നതിന് വ്യക്തമായ മാനദണ്ഡങ്ങൾ ആവശ്യമാണ്. ഉൽപന്നങ്ങളുടെയും സേവനങ്ങളുടെയും ഗുണനിലവാരം മെച്ചപ്പെടുത്താനും വിദഗ്ധരുടെ വിടവ് നികത്താനും ബഹ്‌റൈനികൾക്ക് ഈ മേഖലകളിൽ തൊഴിലവസരങ്ങൾ സൃഷ്ടിക്കാനുമാണ് ഈ നീക്കം ലക്ഷ്യമിടുന്നത്.

മറ്റ് സർക്കാർ സ്ഥാപനങ്ങൾ  ലൈസൻസുകൾ നൽകി വരുന്നതിനാൽ  ഇലക്ട്രീഷ്യൻ, പ്ലംബർ, എയർ കണ്ടീഷനിങ് റിപ്പയർ ടെക്നീഷ്യൻമാർ തുടങ്ങി മൂന്ന് മേഖലകൾ പുതിയ ഭേദഗതിയിൽ നിന്ന് ഒഴിവാക്കിയിട്ടുണ്ട്. പ്രഫഷനൽ നിലവാരം പുതുക്കുന്നതിന് തൊഴിൽ മന്ത്രാലയവുമായും ബിസിനസ് ഉടമകളുമായും തംകീൻ ഏകോപിപ്പിച്ചിട്ടുണ്ടെന്ന് മന്ത്രി ചൂണ്ടിക്കാട്ടി. മന്ത്രാലയവും തംകീനും നിശ്ചയിച്ചിട്ടുള്ള രാജ്യാന്തര മാനദണ്ഡങ്ങൾ പാലിക്കുന്ന അംഗീകൃത സ്ഥാപനങ്ങൾ നടത്തുന്ന  യോഗ്യതാ നിർണയത്തിൽ വിജയിച്ച ശേഷം ഈ തൊഴിലുകൾ ചെയ്യാൻ ആഗ്രഹിക്കുന്ന വ്യക്തികൾക്ക് തൊഴിൽ മന്ത്രാലയം പ്രഫഷ‌നൽ ലൈസൻസുകൾ നൽകും. ഈ മൂല്യനിർണയങ്ങൾ നടത്താൻ ആഗ്രഹിക്കുന്ന സ്ഥാപനങ്ങൾക്കും ലൈസൻസുകൾ അനുവദിക്കും. ലൈസൻസുകൾ  രാജ്യാന്തര നിലവാരത്തെ അടിസ്ഥാനമാക്കിയവയായിരിക്കും. മന്ത്രാലയത്തിന്റെ ഇലക്ട്രോണിക് ലൈസൻസിങ് സംവിധാനത്തെ എൽഎംആർഎയുടെ വർക്ക് പെർമിറ്റ് സംവിധാനവുമായി സമന്വയിപ്പിച്ചുകൊണ്ട് ഈ  ലൈസൻസുകൾ വർക്ക് പെർമിറ്റുകളുമായി ബന്ധിപ്പിക്കും.

യോഗ്യതാ നിർണയത്തിൽ പരാജയപ്പെടുന്ന തൊഴിലാളികളുടെ വർക്ക് പെർമിറ്റ് റദ്ദാക്കും. വാണിജ്യ-വ്യവസായ മന്ത്രാലയത്തിൽ നിന്ന് വാണിജ്യ റജിസ്ട്രേഷൻ ഉണ്ടെങ്കിൽ, പ്രത്യേക കേന്ദ്രങ്ങൾക്കും സ്വകാര്യ പരിശീലന സ്ഥാപനങ്ങൾക്കും യോഗ്യതാ നിർണയം നടത്താൻ അധികാരം നൽകും. സ്വകാര്യ സ്ഥാപനങ്ങൾക്കൊപ്പം നിലവിലുള്ള പരിശീലന സ്ഥാപനങ്ങൾക്കും സർവകലാശാലകൾക്കും ഈ വിലയിരുത്തലുകൾ നടത്താൻ അനുമതി നൽകും. ഇതിനായി നിയോഗിക്കപ്പെട്ടിട്ടുള്ള സംയുക്ത സംഘം സ്വകാര്യ സ്ഥാപനങ്ങളുമായി നിരവധി യോഗങ്ങൾ  നടത്തിയിട്ടുണ്ട്, അവരിൽ ഭൂരിഭാഗവും ഈ പ്രവർത്തനം ഏറ്റെടുക്കാൻ തയ്യാറാണ് എന്നും അധികൃതർ പറഞ്ഞു.