മസ്ക് മെലൺ കൃഷിയിൽ സൗദി അറേബ്യ സ്വയംപര്യാപ്തത കൈവരിച്ചു

റിയാദ്∙ സൗദി അറേബ്യ മസ്ക് മെലൺ ഉത്പാദനത്തിൽ 100% സ്വയംപര്യാപ്തത നേടി. രാജ്യത്തെ വിവിധ പ്രദേശങ്ങളിൽ നിന്ന് വർഷം തോറും 55,400 ടൺ മസ്ക് മെലൺ വിളവെടുക്കുന്നുണ്ട്. റിയാദ് മേഖലയാണ് ഏറ്റവും കൂടുതൽ മസ്ക് മെലൺ ഉത്പാദിപ്പിക്കുന്നത്. മാർച്ച് അവസാനം മുതൽ ഏപ്രിൽ അവസാനം വരെയാണ് റിയാദ് മേഖലയിൽ മസ്ക് മെലൺ കൃഷിക്ക് ഏറ്റവും അനുയോജ്യമായ സമയമെന്ന് പരിസ്ഥിതി, കൃഷി മന്ത്രാലയം അറിയിച്ചു.

മസ്ക് മെലൺ ആരോഗ്യത്തിന് ഏറെ ഗുണകരമാണ്. ആസ്ത്മ, രക്തസമ്മർദ്ദം, ദഹനക്കേട് എന്നിവയ്ക്ക് പരിഹാരമായി ഇത് ഉപയോഗിക്കാം. കൂടാതെ, എല്ലുകളെ ശക്തിപ്പെടുത്തുക, രക്തത്തിലെ പഞ്ചസാരയുടെ അളവ് നിയന്ത്രിക്കുക, നിർജ്ജലീകരണം തടയുക എന്നീ ഗുണങ്ങളും ഇതിനുണ്ട്. വിളവെടുപ്പ് കാലത്ത് പ്രാദേശികമായി ഉത്പാദിപ്പിക്കുന്ന പഴങ്ങൾ കഴിക്കുന്നത് പരമാവധി പ്രയോജനം നൽകും.

സൗദി അറേബ്യയുടെ ഈ നേട്ടം രാജ്യത്തെ കാർഷിക മേഖലയിലെ വളർച്ചയെ സൂചിപ്പിക്കുന്നു. മസ്ക് മെലൺ കൃഷിയിലെ സ്വയംപര്യാപ്തത രാജ്യത്തെ ഭക്ഷ്യ സുരക്ഷയ്ക്ക് കൂടുതൽ ശക്തി പകരും.