അജ്മാൻ ഫ്രീ സോണുകളുടെ അറ്റാദായത്തിൽ 18 ശതമാനം വളർച്ച

അജ്മാൻ ∙ അജ്മാനിലെ ഫ്രീ സോൺ അതോറിറ്റി 2024 ആദ്യ പാദത്തിൽ അറ്റാദായത്തിൽ 18% വർധനവ് രേഖപ്പെടുത്തി. ഇത് ശക്തമായ സാമ്പത്തിക വൈവിധ്യവൽക്കരണ തന്ത്രത്തെയും എമിറേറ്റിൽ പ്രവർത്തിക്കുന്ന കമ്പനികളുടെ എണ്ണത്തിൽ ഗണ്യമായ വർധനയെയും സൂചിപ്പിക്കുന്നു. എമിറേറ്റിൽ പ്രവർത്തിക്കുന്ന കമ്പനികളുടെ എണ്ണത്തിൽ 70% വളർച്ചയാണ് അതോറിറ്റി റിപോർട്ട് ചെയ്തത്.

കഴിഞ്ഞ ആറ് മാസത്തിനിടെ ആകെ കമ്പനികളുടെ നിരക്ക് 96% ആണ്. സേവന നിലവാരം ഉയർത്തുന്നതിനും അതിന്റെ സോണുകളിൽ പ്രവർത്തിക്കുന്ന കമ്പനികളുടെ ആവശ്യകതകൾ നിറവേറ്റുന്നതിനുമുള്ള വിജയകരമായ തന്ത്രങ്ങളുടെ ഫലമാണ് ഈ ശ്രദ്ധേയമായ ഫലങ്ങൾ എന്ന് അജ്മാൻ ഫ്രീ സോണിന്റെ ബോർഡ് ഓഫ് ഡയറക്‌ടേഴ്‌സ് ചെയർമാൻ ഷെയ്ഖ് അഹമ്മദ് ബിൻ ഹുമൈദ് അൽ നുഐമി പറഞ്ഞു. സേവന നിലവാരം മെച്ചപ്പെടുത്തുന്നതിനും ഉപയോക്തൃ സംതൃപ്തി ഉറപ്പാക്കുന്നതിന് നൂതന പദ്ധതികൾ നടപ്പിലാക്കുന്നതിനുമുള്ള അതോറിറ്റിയുടെ ശ്രമങ്ങൾക്ക് ഊന്നൽ നൽകിയതായി അജ്മാനിലെ ഫ്രീ സോൺ അതോറിറ്റി ഡയറക്ടർ ജനറൽ ഇസ്മായിൽ അൽ നഖി പറഞ്ഞു.

അജ്മാൻ തുറമുഖത്തിനും പ്രധാന റോഡുകളുടെ ശൃംഖലയ്ക്കും സമീപമുള്ളതിനാൽ, ബിസിനസ് വിപുലീകരണത്തിന് അനുയോജ്യമായ അന്തരീക്ഷം പ്രദാനം ചെയ്യുന്നതിനായി ഫ്രീ സോൺ സേവനങ്ങളിലെ ആഗോള ട്രെൻഡുകൾക്കൊപ്പം അതോറിറ്റി സഞ്ചരിക്കുന്നതായി അദ്ദേഹം ചൂണ്ടിക്കാട്ടി. കൃഷി, ഓട്ടോമോട്ടീവ്, രാസവസ്തുക്കൾ, സാങ്കേതികവിദ്യ, നിർമാണം, വിദ്യാഭ്യാസം, വിനോദം, ഭക്ഷണം, പാനീയങ്ങൾ, ആരോഗ്യ സംരക്ഷണം, ഇൻഷുറൻസ്, ആഭരണങ്ങൾ, നിയമ സേവനങ്ങൾ, കടൽ, എണ്ണ, വാതകം, കടലാസ്, പാക്കേജിങ്, റിയൽ എസ്റ്റേറ്റ്, ഷിപ്പിങ്, തുണിത്തരങ്ങൾ എന്നിവ ഉൾപ്പെടുന്ന അജ്മാൻ ഫ്രീ സോണിലെ ബിസിനസ് മേഖല വൈവിധ്യമാണെന്നും അദ്ദേഹം പറഞ്ഞു.