തൊഴിലാളികൾക്ക് മികച്ച സൗകര്യം; പരിശോധന കടുപ്പിച്ച് യുഎഇ

അബുദാബി ∙ യുഎഇയിലെ ലേബർ ക്യാംപുകളിൽ തൊഴിലാളികൾക്ക് മികച്ച താമസ സൗകര്യം നൽകുന്നുണ്ടെന്ന് ഉറപ്പാക്കാൻ പരിശോധന ശക്തമാക്കി. തൊഴിലാളികളുടെ ആരോഗ്യസുരക്ഷയും ക്ഷേമവും ഉറപ്പാക്കുന്നതിന്റെ ഭാഗമായാണ് നടപടിയെന്ന് മാനവശേഷി, സ്വദേശിവൽക്കരണ മന്ത്രാലയത്തിലെ പരിശോധന വിഭാഗം അസി. അണ്ടർ സെക്രട്ടറി മുഹ്സിൻ അലി അല്ർ നസ്സി പറഞ്ഞു. മേയ് 20 മുതൽ ജൂൺ 7 വരെ നടത്തിയ പരിശോധനയിൽ 352 നിയമലംഘനങ്ങൾ കണ്ടെത്തിയിരുന്നു. 

കൊടും ചൂടിനെ അതിജീവിക്കാനുള്ള ശീതീകരണ സംവിധാനത്തിന്റെ അഭാവം, തീപിടിക്കാൻ സാധ്യതയുള്ള വസ്തുക്കൾ സുരക്ഷിതമായി സൂക്ഷിക്കാതിരിക്കുക, ശുചിത്വമില്ലായ്മ തുടങ്ങി ഒട്ടേറെ നിയമലംഘനങ്ങളാണ് കണ്ടെത്തിയത്.