മലകയറിയ പെൺകുട്ടിയുടെ കഥകളുമായി സ്വപ്ന ബഷീർ

ഷാർജ∙ പതിവുപോലെ ഇപ്രാവശ്യവും ഷാർജ രാജ്യാന്തര പുസ്തകമേളയിൽ പുസ്തകം പ്രകാശനം ചെയ്യുന്നവരിൽ കൂടുതലും വനിതകളാണ് എന്ന സൂചന നൽകി ഒട്ടേറെ പേർ അവരുടെ പുസ്തകം പരിചയപ്പെടുത്തുന്നു. വിദ്യാഭ്യാസ കാലത്ത് എഴുതിത്തുടങ്ങി പിന്നീട് ദാമ്പത്യ ജീവിതത്തിലേക്ക് പ്രവേശിക്കുന്നതോടെ സർഗാത്മകതയിൽ നിന്ന് മനപ്പൂർവം വിട്ടുനിൽക്കുന്നവർ. ഇവരിൽ പലരും പിന്നീട് പ്രവാസ ലോകത്തെത്തി എഴുത്തിലേക്കും ചിത്രരചനയിലേക്കും മറ്റു കലാരംഗത്തേക്കും പുനഃപ്രവേശനം നടത്തുന്നു. അതേസമയം, സാഹസികയാത്രയ്ക്ക് തയ്യാറാകുന്ന വനിതകളുടെ എണ്ണം കൂടി അടുത്തകാലത്ത് വർധിച്ചുവരുന്നതായി കാണുന്നു. 

ഇത്തരത്തിൽ തന്‍റെ   അനുഭവങ്ങൾ കഥയാക്കിയിരിക്കുകയാണ്, കിളിമഞ്ചാരോ, എവറസ്റ്റ്, ബട്ടൂർ എന്നീ കൊടുമുടികൾ കീഴടക്കിയിട്ടുള്ള ഖത്തറിൽ പ്രവാസിയായ പർവതാരോഹക മലപ്പുറം കാട്ടുങ്ങൽ സ്വദേശി സ്വപ്നാ ബഷീർ: ‌

എന്‍റെ  ആദ്യത്തെ ഇംഗ്ലിഷ് കഥാസമാഹാരമാണ്, ആത്മകഥാംശം നിറഞ്ഞ ദ് ഗേൾ ഹൂ ക്ലൈംബ്ഡ് മൗണ്ടെയിൻസ്. നമ്മളിൽ ഓരോരുത്തരിലും ഒരു സ്വപ്നാടകൻ ഉറങ്ങിക്കിടക്കുന്നു. ജീവിതവും ആഗ്രഹങ്ങളും പൂർത്തീകരിക്കാനും സാക്ഷാത്കരിക്കാനുമുള്ള മനോഹരമായ ലക്ഷ്യങ്ങൾ.  മലകയറിയ പെൺകുട്ടിയുടെ കഥ അങ്ങനെയാണ്. 

ജീവിതത്തിന്‍റെ   മാന്ത്രികതയുടെ ഉയർച്ച താഴ്ചകളിലൂടെ അവളുടെ ജീവിതത്തിന്‍റെ   ഓരോ പേജുകളിലൂടെയും ഓരോ ലക്ഷ്യസ്ഥാനത്തേയ്ക്കുള്ള യാത്ര. ഓരോരുത്തർക്കും ജീവിതത്തോടുള്ള അഭിനിവേശവും ഒളിഞ്ഞിരിക്കുന്ന ഉയർച്ചകളും അനുഭവിപ്പിക്കുന്നു. ഓരോ സാഹസിക പാതകളിലൂടെയും അവൾ എത്തിച്ചേരുന്ന ഓരോ കൊടുമുടികളിലൂടെയും തന്‍റെ   ജീവിതത്തിന്‍റെ   മാന്ത്രികതയും ലക്ഷ്യവും വീണ്ടും കണ്ടെത്തുന്നു. 

മറഞ്ഞിരിക്കുന്ന വെള്ളച്ചാട്ടങ്ങൾ, മഞ്ഞുമൂടിയ ഹിമാലയത്തിന്‍റെ   നിഗൂഢ പർവതങ്ങൾ, അഗ്നിപർവ്വതങ്ങൾ പൊട്ടിത്തെറിക്കുന്ന ലാവ എന്നിവയിലൂടെ പ്രകൃതിയുടെ അനുഗ്രഹത്തിന്‍റെ   മാന്ത്രികത അവളോടൊപ്പം കണ്ടെത്തൂ. ജീവിതത്തിന്‍റെ   നിഗൂഢതകൾക്കുള്ള ഉത്തരങ്ങൾ  പ്രഭാത മഞ്ഞുവീഴ്ചകളുടെ അലയൊലികളിലും ഒരാളുടെ സ്വപ്നങ്ങളുടെ ഉയരങ്ങളിലുമാണെന്ന് ഈ കഥകളിലൂടെ പറയാൻ ശ്രമിക്കുന്നു.

നവംബർ 6 മുതൽ 17 വരെ നടക്കുന്ന ഷാർജ രാജ്യാന്തര പുസ്തകമേളയിലെ റൈറ്റേഴ്‌സ് ഫോറ( ഹാൾ നമ്പർ– 7)ത്തിൽ എന്‍റെ   പുസ്തകം 13-ന് രാത്രി 8.30 ന്  പ്രകാശനം ചെയ്യും.

എഴുത്തുകാർക്ക് പുസ്തകങ്ങൾ പരിചയപ്പെടുത്താം
പ്രിയ സുഹൃത്തുക്കളേ,

നവംബർ ആറിന് ആരംഭിക്കുന്ന ഷാർജ രാജ്യാന്തര പുസ്തകമേള 2024ൽ പ്രകാശനം ചെയ്യുന്ന പ്രവാസികളുടെ പുതിയ പുസ്തകങ്ങൾ പരിചയപ്പെടുത്താൻ ഇപ്രാവശ്യവും മനോരമ ഓൺലൈൻ അവസരമൊരുക്കുന്നു. എന്താണ് പുസ്തകത്തിലൂടെ പറയാൻ ഉദ്ദേശിക്കുന്നത്, എഴുത്തിന് പിന്നിലെ അനുഭവങ്ങൾ സഹിതം 500 വാക്കുകളിൽ കുറയാതെ സ്വന്തം പുസ്തകം പരിചയപ്പെടത്താം. അതോടൊപ്പം, പുസ്തകം പ്രകാശനം ചെയ്യുന്ന തിയതി, സമയം എന്നിവയുമെഴുതാം. പുസ്തകത്തിന്‍റെ   കവർ(jpeg ഫയൽ), രചയിതാവിന്‍റെ    5.8 x 4.2   സൈസിലുള്ള പടം(പാസ്പോർട്ട് സൈസ് സ്വീകാര്യമല്ല) എന്നിവ mynewbook.sibf@gmail.com  എന്ന മെയിലിലേയ്ക്ക് അയക്കുമല്ലോ. സബ്ജക്ടിൽ My BOOK@SIBF 2024 എന്ന് എഴുതാൻ മറക്കരുത്. കൂടുതൽ വിവരങ്ങൾക്ക്: ഇ– മെയിൽ-  mynewbook.sibf@gmail.com ,  0567 371 376 (വാട്സാപ്പ്).