സൗദിയിലെ ആദ്യ ഹൈഡ്രജൻ ട്രെയിനിന്റെ പരീക്ഷണ ഓട്ടം വിജയം

റിയാദ് ∙  മധ്യപൂർവ്വ മേഖലയിലെ ആദ്യത്തെ ഹൈഡ്രജൻ ട്രെയിനിന്റെ പരീക്ഷണ ഓട്ടത്തിൽ സൗദി അറേബ്യ വിജയിച്ചതായി റെയിൽവേ കമ്പനി സിഇഒ ഡോ. ബഷർ അൽ മാലിക്. രാജ്യം പരിസ്ഥിതിക്ക് അനുയോജ്യമായ സാങ്കേതിക വിദ്യകൾ സ്വീകരിക്കുന്നതിന്റെ അനന്തരഫലമാണ് ഈ പദ്ധതി. അത്തരം സാങ്കേതികവിദ്യകൾ അവലംബിക്കുമ്പോൾ വിടവുകൾ കണ്ടെത്തി അവ പരിഹരിക്കാൻ ശ്രമിക്കുകയാണെന്നും അദ്ദേഹം പറഞ്ഞു.

കഴിഞ്ഞ വർഷം കാലാവസ്ഥാ വാരത്തിന്റെ ഉദ്ഘാടന വേളയിൽ സൗദി ഊർജ മന്ത്രി അബ്ദുൽ അസീസ് ബിൻ സൽമാൻ രാജകുമാരൻ മധ്യപൂർവ്വ മേഖലയിലെ ആദ്യത്തെ ഹൈഡ്രജൻ പ്രവർത്തിക്കുന്ന ട്രെയിൻ രാജ്യത്തിനുണ്ടാകുമെന്ന് പ്രഖ്യാപിച്ചിരുന്നു. രാജ്യത്തുടനീളമുള്ള എല്ലാ മേഖലകളെയും പിന്തുണയ്ക്കുന്നതിനായി പുതിയ ലക്ഷ്യസ്ഥാനങ്ങളിലേക്കും സാമ്പത്തിക മേഖലകളിലേക്കും റെയിൽവേ ശൃംഖല വികസിപ്പിക്കുന്നതിനുള്ള പ്രവർത്തനങ്ങൾ നടന്നുവരികയാണെന്ന് അൽ മാലിക് പറഞ്ഞു. വാണിജ്യ മേഖലയിൽ സ്വീകരിക്കുന്നതിനുള്ള സന്നദ്ധത ഉറപ്പാക്കാൻ സൗദി അറേബ്യ ഹൈഡ്രജൻ സാങ്കേതികവിദ്യ പിന്തുടരുന്നത് തുടരുകയാണ്.