ഗൾഫ് കപ്പ് ഫുട്ബോൾ ഫൈനൽ ജനുവരി 4ലേക്ക് മാറ്റി

കുവൈത്ത് സിറ്റി∙ കുവൈത്തിൽ നടക്കുന്ന അറേബ്യൻ ഗൾഫ് കപ്പ് ഫുട്ബോൾ ചാംപ്യൻഷിപ്പ് ഫൈനൽ മത്സരം ജനുവരി നാലിലേക്ക് മാറ്റി. നേരത്തെ ജനുവരി 3ന് നടത്താനാണ് തീരുമാനിച്ചിരുന്നത്. അറേബ്യൻ ഗൾഫ് കപ്പ് ഫുട്ബോൾ ഫെഡറേഷൻ (എജിസിഎഫ്എഫ്) ആണ് മാറ്റം പ്രഖ്യാപിച്ചത്. എജിസിഎഫ്എഫ് കോമ്പറ്റീഷൻസ് കമ്മിറ്റി ചെയർമാൻ ഖാലിദ് അൽ മുഖ്രൻ പ്രസ്താവനയിലൂടെയാണ് ഇക്കാര്യം അറിയിച്ചത്.

ഇന്ന് ഉച്ചയ്ക്ക് ശേഷമാണ് ഇതുസംബന്ധിച്ച് അറിയിപ്പ് വന്നത്. എന്നാൽ, സെമി ഫൈനൽ മത്സരങ്ങൾ മുൻ നിശ്ചയപ്രകാരം ചൊവ്വാഴ്ച നടക്കും. വൈകുന്നേരം 5.30 ന് ഒമാൻ - സൗദി അറേബ്യ മത്സരമാണ് ആദ്യത്തേത്. രണ്ടാം സെമി വൈകിട്ട് 8.45 ന് കുവൈത്ത് - ബഹ്റൈൻ പോരാട്ടം. അർദിയായിലെ ഷെയ്ഖ് ജാബർ സ്റ്റേഡിയത്തിലാണ് മത്സരം.