തലയിൽ മുടിയില്ല, ചുളിവുകൾ നിറഞ്ഞ മുഖം; ആരാധകരെ അതിശയിപ്പിച്ച ലുക്കുമായി ഹോളിവുഡ് താരം

ന്യൂയോർക്ക്∙ ലോക പ്രശസ്ത ഹോളിവുഡ് താരത്തിന്‍റെ പുതിയ ലുക്ക് കണ്ട് അതിശയിച്ചിരിക്കുകയാണ് ആരാധകർ. ഇൻസ്റ്റഗ്രാമിൽ പ്രശസ്ത നടി ഡെമി മൂർ പങ്കുവച്ച ലുക്കാണ് ആരാധകരെ ഞെട്ടിച്ചിരിക്കുന്നത്.  ബോഡി ഹൊറർ ചിത്രമായ ദി  സബ്‌സ്റ്റൻസിന്‍റെ  സെറ്റിൽ വച്ച് എടുത്ത ചിത്രമാണ് ഹാലോവീനിന്‍റെ സമയത്ത് താരം പങ്കുവച്ചിരിക്കുന്നത്.

ചുളിവുകൾ നിറഞ്ഞ മുഖത്തിനു പുറമെ തലയിൽ മുടിയില്ലാത്ത മേക്കപ്പിലാണ് താരം ഇൻസ്റ്റഗ്രാമിലെ പോസ്റ്റിൽ പ്രത്യക്ഷപ്പെടുന്നത്.  ദി സബ്‌സ്റ്റൻസിൽ നടി മാർഗരറ്റ് ക്വാലിയ്‌ക്കൊപ്പമാണ് ഡെമി മൂർ അഭിനയിക്കുന്നത്. ഇൻസ്റ്റഗ്രാമിൽ പങ്കുവച്ച  ചിത്രത്തിനൊപ്പം ആരാധകർക്ക്  ഹാലോവീൻ ആശംസയും താരം നേരുന്നുണ്ട്. 

പുതിയ മേക്കപ്പിൽ താരത്തെ തിരിച്ചറിയാൻ കഴിയുന്നില്ലെന്നാണ് ആരാധകരുടെ അഭിപ്രായം. മാർഗരറ്റ് ക്വാലിയെ നായികയാക്കി കോറലി ഫാർഗേറ്റ് സംവിധാനം ചെയുന്ന ദി  സബ്‌സ്റ്റൻസ് ശരീര പ്രതിച്ഛായ, സ്ത്രീകളോടുള്ള സാമൂഹിക പ്രതീക്ഷകൾ, പ്രായമാകൽ തുടങ്ങിയ പ്രമേയങ്ങളാണ് ചർച്ച ചെയ്യുന്നത്.