സാങ്കൽപ്പിക ലോകം, കഥാപാത്രങ്ങൾ അമാനുഷികർ; വായനക്കാരെ പുതുലോകത്ത് എത്തിച്ച പുസ്തക പരമ്പരകൾ

സാങ്കൽപ്പിക ലോകങ്ങൾ കെട്ടിടുക്കുവാനുള്ള ഒരു എഴുത്തുകാരന്റെ കഴിവാണ് സാഹിത്യത്തില്‍ നിന്ന് പ്രചോദനമുൾകൊണ്ട് സിനിമകളും ഗെയിമുകളും നിർമ്മിക്കുവാൻ പ്രധാന കാരണം. തങ്ങൾ സൃഷ്ടിച്ച ലോകത്തെ ദൃശ്യവൽക്കരിക്കാൻ ചലച്ചിത്ര നിർമ്മാതാക്കൾക്കും ഗെയിം ഡെവലപ്പർമാർക്കും നൽകുന്നതിലൂടെ നിലനിൽക്കാത്ത, മനസ്സിൽ മാത്രം കണ്ടിരുന്ന കാര്യങ്ങളെ വായനക്കാർക്കായി സമ്മാനിക്കുകയാണ് എഴുത്തുകാർ ചെയ്യുന്നത്.

ടോൾകീന്റെ മിഡിൽ എർത്തിന്റെ പ്രകൃതിദൃശ്യങ്ങൾ, റൗളിംഗിന്റെ ഹാരി പോട്ടർ പരമ്പരയിലെ ഹൊഗ്‌വാർട്ട്സിന്റെ ഗോഥിക് വാസ്തുവിദ്യ, ഓർവെലിന്റെ 1984ലെ ഡിസ്റ്റോപ്പിയൻ നഗരദൃശ്യങ്ങൾ എന്നിങ്ങനെ ദൃശ്യസമ്പന്നതയ്ക്ക് പേരുകേട്ട പല സിനിമകളും ഗെയിമുകളും സാഹിത്യം ദൃശ്യപരമായി അതിശയിപ്പിക്കുന്ന അനുരൂപീകരണങ്ങളെ എങ്ങനെ പ്രചോദിപ്പിച്ചു എന്നതിന്റെ ഉദാഹരണങ്ങളാണ്.

ഫാന്റസി, യംഗ് അഡൽറ്റ്, മിസ്റ്ററി, ത്രില്ലർ, റൊമാൻസ്, ബാലസാഹിത്യം എന്നീ വിഭാഗങ്ങളിലാണ് ഏറ്റവും ജനപ്രിയമായ സീരീസ് വരുന്നത്. ഈ വിഭാഗത്തിലുള്ള പുസ്‌തകങ്ങൾക്ക് വലിയ ആരാധകവൃന്ദയുണ്ട്. ജനപ്രിയ പുസ്‌തക പരമ്പരകളുടെ ചലച്ചിത്രാവിഷ്‌കാരങ്ങളും പുസ്തക വിൽപ്പനയിൽ വർദ്ധനവിന് കാരണമാകുന്നുണ്ട്.

പഴയകാല പുസ്തകങ്ങളുടെയും പണ്ടു മുതലേ നിലനിന്നു പോരുന്ന ഐതിഹ്യങ്ങളുടെയും സ്പിന്‍ ഓഫുകളാണ് ഇതിൽ ഏറ്റവും പ്രധാനം. അമാനുഷിക കഥാപാത്രങ്ങളോട് വായനക്കാർക്കുള്ള താൽപര്യവും എടുത്തു പറയേണ്ട ഘടകമാണ്. കോടിക്കണക്കിന് ആരാധകരുള്ള പുസ്തകപരമ്പരകളിൽ ചിലതിനെ ചുരുങ്ങിയ വാക്കുകളിലൂടെ പരിചയപ്പെടാം.

∙ ലോർഡ് ഓഫ് ദ റിംഗ്സ്

രചയിതാവ്: ജെ.ആർ.ആർ. ടോൾകീൻ

വിഭാഗം: ഫാന്റസി

പ്രസിദ്ധീകരണ തീയതി: 1954-1955

ഇംഗ്ലീഷ് എഴുത്തുകാരനും ഭാഷാശാസ്ത്രജ്ഞനുമായ ജെ.ആർ.ആർ. ടോൾകീൻ എഴുതിയ ഒരു ഇതിഹാസ ഫാന്റസി ട്രൈലോജിയാണ് ലോർഡ് ഓഫ് ദ റിംഗ്സ്. 1937-ൽ ടോൾകീന്‍ എഴുതിയ കുട്ടികളുടെ പുസ്തകമായ ദി ഹോബിറ്റിന്റെ തുടർച്ചയായിട്ടാണ് ഈ കഥ ആരംഭിച്ചതെങ്കിലും ലോർഡ് ഓഫ് ദ റിംഗ്സ് ഒരു വലിയ കൃതിയായി വികസിക്കുകയായിരുന്നു. 1937 നും 1949 നും ഇടയിൽ ഘട്ടം ഘട്ടമായി എഴുതപ്പെട്ട പുസ്തകങ്ങൾ, 1954–55 കാലഘട്ടത്തിൽ മൂന്ന് വാല്യങ്ങളായി പ്രസിദ്ധീകരിച്ചു.

ടോൾകീൻ സൃഷ്ടിച്ച ഒരു സാങ്കൽപ്പിക ഭൂഖണ്ഡമായ മിഡിൽ എർത്തിലാണ് കഥ നടക്കുന്നത്. സൗറോൺ സൃഷ്ടിച്ച മാന്ത്രിക മോതിരം നശിപ്പിക്കാൻ വിയോഗിക്കപ്പെട്ട ഫ്രോഡോ ബാഗിൻസ് എന്ന ഹോബിറ്റാണ് പ്രധാന കഥാപാത്രം. 80-ലധികം ഭാഷകളിലേക്ക് വിവർത്തനം ചെയ്യുകയും ലോകമെമ്പാടും 150 ദശലക്ഷത്തിലധികം കോപ്പികൾ വിറ്റഴിക്കുകയും ചെയ്ത സീരീസിന്റെ വായനാക്രമം ദ ഫെല്ലോഷിപ്പ് ഓഫ് ദ റിംഗ് (1954), ദ ടു ടവറുകൾ (1954), ദി റിട്ടേൺ ഓഫ് ദി കിംഗ് (1955) എന്നതാണ്. 

ഹ്യൂഗോ അവാർഡ്, നെബുല അവാർഡ്, ലോക്കസ് അവാർഡ് തുടങ്ങി നിരവധി പുരസ്കാരങ്ങൾ ലോർഡ് ഓഫ് ദ റിംഗ്സ് നേടിയിട്ടുണ്ട്. കൂടാതെ ഒരു ചലച്ചിത്ര ത്രയമായും നിരവധി  റേഡിയോ പരമ്പരകൾ, വീഡിയോ ഗെയിമുകൾ, സ്റ്റേജ് നാടകങ്ങൾ എന്നിവയിലേക്ക് ഈ ട്രൈലോജി രൂപാന്തരപ്പെടുത്തിയിട്ടുണ്ട്.

∙ ട്വിലൈറ്റ് സീരീസ്

രചയിതാവ്: സ്റ്റെഫെനി മേയർ

വിഭാഗം: റൊമാന്റിക് ഫാന്റസി

പ്രസിദ്ധീകരണ തീയതി: 2005–2008

സ്റ്റെഫിനി മേയർ എഴുതിയ ട്വിലൈറ്റ് സീരീസ്, ബെല്ല സ്വാൻ എന്ന കൗമാരക്കാരിയായ പെൺകുട്ടിയും എഡ്വേർഡ് കുള്ളൻ എന്ന വാമ്പയറും തമ്മിലുള്ള പ്രണയത്തിന്റെ കഥയാണ് പറയുന്നത്. മികച്ച ആദ്യ നോവലിനുള്ള ബ്രാം സ്റ്റോക്കർ അവാർഡ് ഉൾപ്പെടെ നിരവധി അവാർഡുകൾ ലഭിച്ച ഈ പരമ്പര ലോകമെമ്പാടും 100 ദശലക്ഷത്തിലധികം കോപ്പികൾ വിൽക്കപ്പെടുകയും 37-ലധികം ഭാഷകളിലേക്ക് വിവർത്തനം ചെയ്യപ്പെടുകയും ചെയ്തു.

എണ്ണമറ്റ ഫാൻഫിക്ഷനുകളും കലാസൃഷ്‌ടികളും മറ്റ് സർഗ്ഗാത്മക ആവിഷ്‌കാരങ്ങളും കാരണമായി ട്വിലൈറ്റ് സീരീസ് അഞ്ച് സിനിമകളുള്ള പരമ്പര മാറ്റപ്പെട്ടു. ലോകമെമ്പാടുമായി $3.3 ബില്യൺ നേടിയ ഈ ഫ്രാഞ്ചൈസിയുടെ ആഗോള ജനപ്രീതി പിടിച്ചു പറ്റി.

ട്വിലൈറ്റ് (2005), ന്യൂ മൂൺ (2006), എക്ലിപ്സ് (2007), ബ്രേക്കിംഗ് ഡോൺ (2008) എന്നീ വായനാക്രമമുള്ള പുസ്തകത്തിന് പിന്നീട് ലൈഫ് ആൻഡ് ഡെത്ത്: ട്വിലൈറ്റ് റീമാജിൻഡ് (2015), മിഡ്‌നൈറ്റ് സൺ (2020) എന്നിങ്ങനെ ചില സ്പിന്‍ ഓഫുകളുമിറങ്ങി.

∙ ഹംഗർ ഗെയിംസ് ട്രൈലോജി

രചയിതാവ്: സുസെയ്ൻ കോളിൻസ്

വിഭാഗം: ഡിസ്റ്റോപ്പിയൻ ഫിക്ഷൻ

പ്രസിദ്ധീകരണ തീയതി: 2008–2010

സുസെയ്ൻ കോളിൻസ് എഴുതിയ ഒരു ജനപ്രിയ ഡിസ്റ്റോപ്പിയൻ യങ് അഡൽറ്റ് നോവൽ പരമ്പരയാണ് ഹംഗർ ഗെയിംസ് സീരീസ്. പന്ത്രണ്ട് ജില്ലകളായി വിഭജിച്ച് ക്യാപിറ്റോൾ ഭരിക്കുന്ന പനേം എന്ന പോസ്റ്റ്-അപ്പോക്കലിപ്റ്റിക് രാഷ്ട്രമാണ് കഥയുടെ പശ്ചാത്തലം. ഒരു ഡിസ്റ്റോപ്പിയൻ ഭാവിയിൽ സജ്ജീകരിച്ചിരിക്കുന്ന ഈ സീരീസിൽ, നായക കഥാപാത്രമായ കാറ്റ്‌നിസ് എവർ‌ഡീൻ ടെലിവിഷൻ പരിപാടിയായ ഹംഗർ ഗെയിംസ് എന്ന ഫൈറ്റ് ടു ദ ഡെത്ത് ടൂർണമെന്റിൽ മത്സരിക്കുന്നു. 

പരമ്പരയിൽ മൂന്ന് പുസ്തകങ്ങളാണുള്ളത്: ദി ഹംഗർ ഗെയിംസ് (2008), ക്യാച്ചിംഗ് ഫയർ (2009), മോക്കിംഗ്ജയ് (2010). 'ദി ബല്ലാഡ് ഓഫ് സോംഗ്ബേർഡ്സ് ആൻഡ് സ്നേക്ക്സ്' എന്ന തലക്കെട്ടിൽ ട്രൈലോജിയുടെ ഒരു പ്രീക്വലും 2020 മെയ് 19-ന് പുറത്തിറങ്ങിരുന്നു. ദി ഹംഗർ ഗെയിംസ് ഇവന്റുകൾക്ക് 64 വർഷം മുമ്പ്, പനേമില്‍ കലാപം നടന്ന 'ഡാർക്ക് ഡേയ്‌സ്' എന്ന കാലമാണ് നോവലിൽ പറയുന്നത്.

സർക്കാർ നിയന്ത്രണം, സാമൂഹിക അസമത്വം, അതിജീവനം തുടങ്ങിയ വിഷയങ്ങൾ കൈകാര്യം ചെയ്യുന്ന ഈ പരമ്പര വിജയകരമായ ഒരു ഫിലിം ഫ്രാഞ്ചൈസിയായി മാറിട്ടുണ്ട്. 50-ലധികം ഭാഷകളിലേക്ക് വിവർത്തനം ചെയ്യപ്പെട്ട ഹംഗർ ഗെയിംസ് യുവസാഹിത്യത്തിലെ ഏറ്റവും പ്രധാനപ്പെട്ട കൃതികളിലൊന്നായി കണക്കാക്കപ്പെടുന്നു.

(തുടരും)