നിശ്വാസത്തടവറകൾ – പ്രമോദിനിദാസ് എഴുതിയ കവിത

ഹാ കഷ്ടമീ ലോകം ചുമപ്പത് 

വിഷപ്രതീകങ്ങളിൻ

കറുത്തപുകമാത്രമല്ലെ.

തരളതീരങ്ങളിൻ സുഖദഭാവങ്ങളെ

നക്കിത്തുടച്ചിട്ട

മണ്ണിൻ മാറിലെ

മുലപ്പാലു തിരയുന്ന,

ജനിമൃതിതൻ

ജരാനരകളിലൂടെ 

നിരതെറ്റി നീങ്ങുന്ന 

മർത്യവേഷങ്ങളെക്കണ്ടു
 

കരളുതേങ്ങിയ 

കാലമിങ്ങനെയോതിയെങ്കി-

ലെന്തതിശയിപ്പാനിരിപ്പൂ.

ഒരുക്കിവച്ച ചോദ്യശരങ്ങൾക്കുമുൻപി-

ലൂടുത്തരത്തുണ്ടുകൾ

ചിതറിവീണനേരത്ത്

കാലം കുറിച്ചിട്ടതൊക്കെയും

തോറ്റുകീറിയ കടലാസ്സിലെ

തോൽക്കാൻ മടിച്ചെഴുതിയ 

ഹൃദയാക്ഷരങ്ങളെക്കുറിച്ചായിരുന്നു.
 

നരച്ചുവീണ

മുടിനാരുകൾക്കിടയിൽനിന്നും

മുളച്ചുപൊന്തിയ 

കറുത്തമുടിയിഴകളെക്കണ്ടു

കാലം കുറിച്ചിട്ടതൊക്കെയും

കരഞ്ഞുതീർത്ത രാവുകളുടെയും

പിടഞ്ഞുതിർന്ന പകലുകളുടെയും

ചിതയെരിഞ്ഞ,

തീനാമ്പുകളെക്കുറിച്ചായിരുന്നു.

ഒഴിഞ്ഞചഷകത്തിന്നോ- ർമ്മക്കുറിപ്പുമായ്

വിരുന്നിനെത്തിയമൗനത്തിനെക്കണ്ട്,

കാലം കുറിച്ചിട്ടതൊക്കെയും 

മറിഞ്ഞുവീണ യൗവ്വനത്തിൻ 

ശേഷിപ്പുകളെക്കുറിച്ചായിരുന്നു.
 

പുഴുതിന്നപൂക്കളിന്നിതളുകൾ നിറയുന്ന

പെരുവഴിത്തിണ്ണതൻപൊയ്മുഖം കണ്ടപ്പോൾ 

കാലം കുറിച്ചിട്ടതൊക്കെയും, മൂകപ്രണയത്തിൻ 

പ്രതീക്ഷകളെക്കുറിച്ചായിരുന്നു.

ഇന്ന്, കാലം കണക്കെടുപ്പിലാണ്.

അഴിഞ്ഞു തീരാത്ത

ചേലയുടെയും

അഹങ്കാരമിടിയാത്ത

ദുര്യോധനന്റെയും

അന്തരത്തിന്നറിവു

ചുമന്നുകൊണ്ട്

കാലം കണക്കെടുപ്പിലാണ് !!