ഊർമ്മിള – ഹർഷ നമ്പ്യാർ എഴുതിയ കവിത

മരവുരി ധരിക്കാതെ കമണ്ഡലം കൈയ്യിലേന്താതെ,

നഗ്‌നപാതയായി കാനനത്തിൻ 

സഞ്ചാരപാതകളെയറിയാതെ 

പതിന്നാലു സംവത്സരങ്ങൾ 

സന്യാസിയായവൾ-അവൾ ഊർമ്മിള.
 

ഭ്രാതൃ സ്നേഹത്തിന്റെ അന്ധകാരത്തിൽ

പത്നീധർമ്മം വെടിഞ്ഞ പതിയുടെ 

പാതിധർമ്മം നിറവേറ്റി ദാസിയായി 

കഴിഞ്ഞ രാജപുത്രിയാണവൾ!

നിദ്ര വെടിഞ്ഞൊരാ പതിയുടെ 

ആലസ്യങ്ങളെ പാതിവ്രത്യത്താൽ 

തന്നിലേക്കാവാഹിച്ചവൾ ഊർമ്മിള..
 

വാഴ്ത്തിയില്ലൊരു ശാരിക പൈതലുമാ 

ജനകപുത്രിയെ-

രാജഗേഹത്തെ പർണ്ണശാലയാക്കിയ, 

വൽക്കലമുടുക്കാതെ സന്യാസിയായ

ദുഃഖപുത്രിയാം വൈദേഹീ സോദരിയെ....