സ്വർഗ്ഗ പറുദീസ – ഷഹീർ എം. എഴുതിയ കവിത

സ്വർഗ്ഗലോകം നിങ്ങൾ കണ്ടിട്ടുണ്ടോ?

ഞാൻ കണ്ടിട്ടുണ്ട്..

സ്നേഹ വ്യാധിയാൽ 

ബാല്യത്തിലേക്ക് തെന്നിവീണ -

പൈതലുകളാൽ -

കളങ്കമറ്റ ഹൃദയങ്ങളുടെ 

പറുദീസയാണവിടം..
 

കുറിയകവാടത്തിനപ്പുറമാഭൂവിൽ 

കുളിരും, സുഗന്ധവുമണിഞ്ഞ -

മാരുതൻ നാസനാഴിയെ 

ഉന്മാദമാക്കിക്കൊണ്ടിരുന്നു,

വിശുദ്ധർ തെളിച്ചു വളർത്തിയ 

മരങ്ങളാണത്രെയവിടെ സർവതും..
 

കറുത്ത മേഘങ്ങളിൽ 

തെളിയുന്ന നക്ഷത്രങ്ങളെ..

ആത്മാവിൻ കണ്ണാടിയിൽ 

അന്ത്യച്ചുളിവുകൾ 

തലോടിയിരിക്കുന്നവരെ..

നോക്കുവിനിവിടം,

മരണത്തിനു മുന്നേ 

സ്വർഗ്ഗലോകം കണ്ട് 

ഉന്മാദമാടുന്നവരെ..
 

തെളിയാറിലൽപ്പം നീന്തി രസിച്ചു 

ഭാരങ്ങളൊക്കെയുമൊഴുക്കി -

മടങ്ങും നേരം,

ജനലഴികൾക്കിടയിലൂടെ 

നിലക്കാതെയാ കൊതി വന്നു 

കർണ്ണമിൽ പതിച്ചു..
 

"പോവ്വാണോ... കുറച്ചേരം കൂടി 

മ്മക്ക് കളിക്കാം"..

മേഘവിസ്‌ഫോടനം 

നടന്നാന്തരത്തിലന്നേരം -

കണ്ണിലുരുൾ പൊട്ടിയൊഴുകി..
 

(പഠനത്തിന്റെ ഭാഗമായി മെന്റൽ ഡിസോഡർ കെയർ സെന്ററിൽ പോവുകയും അൽപസമയം അവരോടൊപ്പം ചിലവഴിക്കുകയും ചെയ്തപ്പോൾ തോന്നിയ വരികൾ)