പൂസല്ല ഇനി പൂജ

മദ്യാസക്തിയിൽ നിന്നു മോചിതയായ ബോളിവുഡി നടിയും സംവിധായകയുമായ പൂജാ ഭട്ട് പറയുന്നു. ‘ എനിക്ക് സാധിക്കുമെങ്കിൽ നിങ്ങൾക്കും കഴിയും.’ 

‘ ലഹരിയില്ലാത്ത 2 വർഷവും 10 മാസവും’ എന്ന കുറിപ്പോടെ തന്റെ ചിത്രങ്ങൾ പങ്കുവച്ചുകൊണ്ടാണ് പൂജ മറ്റു മദ്യപന്മാർക്കു പ്രചോദനം നൽകിയത് !

മദ്യത്തെ ഒഴിവാക്കാനുള്ള തന്റെ ശ്രമങ്ങൾ ഇൻസ്റ്റഗ്രാമിലൂടെ പൂജ സ്ഥിരമായി പങ്കുവച്ചിരുന്നു. മുൻപു തനിക്കു മദ്യം നൽകിയിരുന്ന കച്ചവടക്കാരൻ തന്നെയാണ് മദ്യാസക്തിയിൽ നിന്നു മോചിതയാകാൻ സഹായിച്ചതെന്നു പൂജ പറഞ്ഞിരുന്നു. ‘ ഞാൻ അദ്ദേഹത്തിന്റെ ഏറ്റവും വലിയ ഉപഭോക്താവായിരുന്നു. എന്നിട്ടും അദ്ദേഹം എന്റെ ഒപ്പം നിന്നു’ എന്നാണ് പൂജ പറഞ്ഞത്

മദ്യത്തെ ചവിട്ടി പുറത്താക്കിയ പൂജ ഇപ്പോൾ സിനിമയുടെ തിരക്കിലാണ് 1991 ൽ പുറത്തിറങ്ങിയ ‘ സടക്’ എന്ന സിനിമയുടെ രണ്ടാം ഭാഗത്തിന്റെ ചിത്രീകരണം തുടരുകയാണ്. അച്ഛൻ മഹേഷ് ഭട്ട് സംവിധാനം ചെയ്യുന്ന ചിത്രത്തിൽ പഴയ നായകൻ സഞ്ജയ് ദത്തും അഭിനയിക്കുന്നുണ്ട്. പുതുതലമുറയിൽ നിന്ന് ആലിയ ഭട്ടും ആദിത്യ റോയ് കപൂറും ഒപ്പം.